مين هُمَّه الغلابة ؟

سطور جريئة

طالما أنت مصمم علي ابتزاز الدولة بكلمة »غلبان»‬ مستغلا تأثير قرارات الإصلاح الاقتصادي التي تتم الآن والتي لولاها لأعلنت مصر إفلاسها بسبب كثرة الديون التي تستدينها من أجل علاج آثار مرض عضال إنتشر في الواقع الاقتصادي المصري علي مدي سنوات طويلة اسمه »‬ الدعم »‬ وأصبح يلتهم كل مايمكن أن يخصص لأي مشروعات تنموية أو لإصلاح التعليم أو الصحة يبقي لازم نعرف مين الغلبان اللي أنت تقصده، وعامل متحدث رسمي باسمه وبتهاجمنا وبتهاجم الدولة علشانه !!
هل تقصد مثلاً ب »‬ الغلبان » سواق التاكسي اللي حاطط قدامه علبة السجاير المارلبورو وكل ماتخلص ينزل يجيب غيرها من ابتزاز الركاب والبلطجة عليهم في الأجرة ؟ !
ولا تقصد سواقين الميكروباص اللي نسبة كبيرة منهم بيجيبوا في اليوم بمبلغ وقدره ترامادول؟!
ولا تقصد سواق التوك توك اللي بيشتغل علشان يبرشم مش علشان بيصرف علي أهله زي مابتحاول تروج ؟!
ولا تقصد الموظف الحكومي اللي بيقبض فلوس من الدولة من غير مايشتغل، والموظفة اللي بتروح الشغل تقمع بامية وتلف محشي ويعطلوا مصالح المواطنين اللي بيقبضوا من الدولة علشان يخلصلوا مصالحهم ؟ !
ولا تقصد الصنايعي سواء كان سباكاً أو حداداً أو نجاراً أو ميكانيكياً اللي علشان بس يصلحلك حاجة بسيطة عايز 500 جنيه ودايماً بتلاقي ستاتهم في محلات الجزارة ومحلات الفراخ بيشتروا كمية أكل تكفي عمارة بكامل سكانها ؟!
ولا تقصد البواب اللي واكل شارب نايم ببلاش ومش بيدفع نور، ولا مياه، ولا كهرباء، وكل شغلته أنه يخلف في عيال ويزود عدد السكان ؟ !
ولا تقصد السايس اللي بيقولك »‬اكسر كله يمين» وياخد قصاد الجملة دي 10 جنيه منك ومن غيرك؟!
ولا تقصد اللي عمال يخلف بال 10 عيال وصحته تهد جبل ومش عايز يشتغل ولا ينتج وكل انتاجه متركز في العيال اللي بيخلفهم ويرميهم للدولة تعالج وتعلم وتوظف ويضيق عليك عيشتك !!
ولا تقصد الشغالة اللي بتيجي تنضف الشقة وبتاخد في ساعتين 200 جنيه وتطلع علي شقة تانية تاخد زيهم ؟!
ولا تقصد المتسول اللي في الشارع اللي لما بيتقبض عليه بيلاقوا معاه أكتر من ألف جنيه حصيلة يوم واحد من الشحاتة ؟!
ولا تقصد الغارمات اللي بيجهزوا بناتهم ب30 طقم سرير و50 ملاية و20 لحاف وهما عارفين انهم مش هيدفعوا وبالتالي الموضوع اسمه نصب مهما حاول البعض تجميل الاسم وتغليفه بلقب غارمات؟!
وبالمناسبة كل دول واخدين أكتر من حقهم من الدولة من أول رغيف العيش أبو »‬شلن»، مروراً بلبن الأطفال المدعم اللي بيتصرف للعيال اللي بيخلفوها، وعلاج لفيروس سي ومساكن محترمة وحتي تسديد ديونهم !!
فلو حد يستحق التعاطف بجد فهو إحنا الطبقة المتوسطة اللي واقفين ورا بلدنا ومحدش فينا اشتكي، واللي بيتخصم من رواتبنا ضرائب من المنبع وهي رواتبنا المعروفة للدولة مسبقا، واتنازلنا عن حاجات كتير علشان نحافظ علي بلدنا اللي عندنا أهم من أي حاجة، مش الفئة اللي اتسببت بعشوائيتها في كتير من اللي إحنا بنعاني منه دلوقتي وبندفع تمنه !! ومع ذلك ناس بتقول عليهم »‬ غلابة» رغم كل اللي أخدوه، وبيقولوا علينا منتفعين رغم كل التنازلات اللي إتنازلنا عنها علشان بلدنا.
** هذا ماتناقلته الطبقة المتوسطة علي وسائل التواصل الاجتماعي طوال الأيام الماضية.