نقطة نظام

«متضايق» من السيسي ؟

لو متضايق من السيسي أنا حاقول لك تعمل إيه عشان تفش غلك ومن غير يا سيدي ما تتظاهر ولا تتعب نفسك.. نزّل سكينة الكهربا خمس ساعات يوميا واقعدهم في الضلمة وخد عهد علي نفسك ما تستخدمش الطرق والكباري الجديدة اللي السيسي عملها ولما تكون عايز تموّن عربيتك بالبنزين ما تدخلش تموّن في دقايق وتخرج بالعكس خليك واقف قدام المحطة ست ساعات علي الأقل قبل التموين ولما تيجي تنام قدامك حاجة من اتنين يا تاخد عربيتك في حضنك عالسرير أو تنزل تنام جمبها في الشارع عشان تحرسها من السرقة وإذا كنت مشترك في منظومة التموين انسحب بسرعة وابقي اشتري كل حاجة من السوبر ماركت بأعلي سعر ولولا إن التثبيت انتهي كنت حاقول لك ما تنساش تنزل يوماتي بعد المغرب عشان الحرامية يثبتوك.. وبكده حترجع للفترة اللي كانت قبل السيسي وانسي السيسي يا سيدي بكل الإنجازات اللي عملها، عشان الحقيقة حرام تبقي بتتمتع بها إنت وأهلك وبعدين تيجي تقعد علي الفيس بوك وبإيدك اللي عايزة قطعها تنزل شتيمة فيه وفي الجيش وفي البلد.. الحقيقة هي نوعية غريبة من الشباب عيال كده ما بيستحموش وريحتهم وحشة وشعرهم منكوش تلاقيهم علي طول بيشتموا ومفيش علي لسانهم إلا كلمة الثورة مستمرة، تقول للواحد منهم طب ليه الثورة مستمرة أُمال حنبني ونعمّر إمتي يقول لك لازم أولا نسقط النظام، طب ومين يحكم لما نسقط النظام يقول لك فيه مجلس ثوري جاهز لإدارة شئون البلاد، طب همّا بيتشغلوا إيه، يقول لك ثوار وفيه زيهم كتير من الشباب الحر شغالين محللين سياسيين واقتصاديين وعسكريين وكمان خبراء أمنيين واستراتيجيين وقانونيين وبنشتم البلد في كل حين ونسب لها ملة ودين.. طب ليه يلا منك له بتسبوا لها ملة ودين، يقول لك عشان مفيش حاجة اتغيرت في مصر ومصر دولة كمعية واحنا شباب تاهر ونكي عايزين الحرية للموعتكلين.. نصيحة مني عزيزي القاريء إذا قابلت حد منهم ما تضيعش وقتك معاه عالفاضي واخلع اللي في رجلك وانزل بيه علي قفاه علي طول وقول له لما تبقي غبي وأهطل ما تلزمنيش ولما تبقي خاين وعميل فمصيبتك كبيرة وجريمتك لا تغتفر لأنك ارتضيت تكون أداة لتنفيذ مخطط شيطاني ضد بلدك صدرت به الأوامر من الخارج لك ولمن هم مثلك من خونة الداخل، الهدف منه عدم استمرار السيسي في الحكم بأي شكل وإدخال الجيش في صراع مع الشعب والعمل علي الرجوع بمصر لنقطة الصفر والسبيل إلي ذلك هو إثارة سخط المواطنين وإشاعة روح الإحباط بينهم والتشكيك في كل شيء.. هذا المخطط ظهر جانب منه مع حادث الطائرة الروسية لضرب السياحة ثم مع الحيلولة دون قيام المصريين العاملين بالخارج بتحويل مدخراتهم بالعملة الصعبة إلي البلاد فيما يشبه الحصار أو التركيع الاقتصادي.. هل هناك عزيزي القاريء أحقر من شخص المفروض أنه مصري ثم عندما يلتقي برئيس دولة أجنبية تسعي لعقد اتفاقيات اقتصادية وعسكرية مع بلده يطالبه بعزل مصر لأنه لا يستطيع أن يمارس حقه في ممارسة الفوضي فيرد عليه الرئيس الأجنبي بأن هناك فرقا بين الحرية والفوضي وبأنه يقدّر لمصر ما تقوم به من حرب ضد الإرهاب نيابة عن العالم كله.. ألا تتفق معي عزيزي القاريء في أن خونة الداخل أقذر بكثير من خونة الخارج..
ما قل ودل
هل تعلم أن ألم الرجل عند سماعه لباب سيارته يغلق بقوة يساوي ألم ثلاث سيدات عند الولادة.