«متضايق» من السيسى ؟

نقطة نظام

لو متضايق من السيسى أنا حاقول لك تعمل إيه عشان تفش غلك ومن غير يا سيدى ما تتظاهر ولا تتعب نفسك.. نزّل سكينة الكهربا خمس ساعات يوميا واقعدهم فى الضلمة وخد عهد على نفسك ما تستخدمش الطرق والكبارى الجديدة اللى السيسى عملها ولما تكون عايز تموّن عربيتك بالبنزين ما تدخلش تموّن فى دقايق وتخرج بالعكس خليك واقف قدام المحطة ست ساعات على الأقل قبل التموين ولما تيجى تنام قدامك حاجة من اتنين يا تاخد عربيتك فى حضنك عالسرير أو تنزل تنام جمبها فى الشارع عشان تحرسها من السرقة وإذا كنت مشترك فى منظومة التموين انسحب بسرعة وابقى اشترى كل حاجة من السوبر ماركت بأعلى سعر ولولا إن التثبيت انتهى كنت حاقول لك ما تنساش تنزل يوماتى بعد المغرب عشان الحرامية يثبتوك.. وبكده حترجع للفترة اللى كانت قبل السيسى وانسى السيسى يا سيدى بكل الإنجازات اللى عملها، عشان الحقيقة حرام تبقى بتتمتع بها إنت وأهلك وبعدين تيجى تقعد على الفيس بوك وبإيدك اللى عايزة قطعها تنزل شتيمة فيه وفى الجيش وفى البلد.. الحقيقة هى نوعية غريبة من الشباب عيال كده ما بيستحموش وريحتهم وحشة وشعرهم منكوش تلاقيهم على طول بيشتموا ومفيش على لسانهم إلا كلمة الثورة مستمرة، تقول للواحد منهم طب ليه الثورة مستمرة أُمال حنبنى ونعمّر إمتى يقول لك لازم أولا نسقط النظام، طب ومين يحكم لما نسقط النظام يقول لك فيه مجلس ثورى جاهز لإدارة شئون البلاد، طب همّا بيتشغلوا إيه، يقول لك ثوار وفيه زيهم كتير من الشباب الحر شغالين محللين سياسيين واقتصاديين وعسكريين وكمان خبراء أمنيين واستراتيجيين وقانونيين وبنشتم البلد فى كل حين ونسب لها ملة ودين.. طب ليه يلا منك له بتسبوا لها ملة ودين، يقول لك عشان مفيش حاجة اتغيرت فى مصر ومصر دولة كمعية واحنا شباب تاهر ونكى عايزين الحرية للموعتكلين.. نصيحة منى عزيزى القارىء إذا قابلت حد منهم ما تضيعش وقتك معاه عالفاضى واخلع اللى فى رجلك وانزل بيه على قفاه على طول وقول له لما تبقى غبى وأهطل ما تلزمنيش ولما تبقى خاين وعميل فمصيبتك كبيرة وجريمتك لا تغتفر لأنك ارتضيت تكون أداة لتنفيذ مخطط شيطانى ضد بلدك صدرت به الأوامر من الخارج لك ولمن هم مثلك من خونة الداخل، الهدف منه عدم استمرار السيسى فى الحكم بأى شكل وإدخال الجيش فى صراع مع الشعب والعمل على الرجوع بمصر لنقطة الصفر والسبيل إلى ذلك هو إثارة سخط المواطنين وإشاعة روح الإحباط بينهم والتشكيك فى كل شىء.. هذا المخطط ظهر جانب منه مع حادث الطائرة الروسية لضرب السياحة ثم مع الحيلولة دون قيام المصريين العاملين بالخارج بتحويل مدخراتهم بالعملة الصعبة إلى البلاد فيما يشبه الحصار أو التركيع الاقتصادى.. هل هناك عزيزى القارىء أحقر من شخص المفروض أنه مصرى ثم عندما يلتقى برئيس دولة أجنبية تسعى لعقد اتفاقيات اقتصادية وعسكرية مع بلده يطالبه بعزل مصر لأنه لا يستطيع أن يمارس حقه فى ممارسة الفوضى فيرد عليه الرئيس الأجنبى بأن هناك فرقا بين الحرية والفوضى وبأنه يقدّر لمصر ما تقوم به من حرب ضد الإرهاب نيابة عن العالم كله.. ألا تتفق معى عزيزى القارىء فى أن خونة الداخل أقذر بكثير من خونة الخارج..
ما قل ودل
هل تعلم أن ألم الرجل عند سماعه لباب سيارته يغلق بقوة يساوى ألم ثلاث سيدات عند الولادة.