وجَّه الرئيس عبدالفتاح السيسي رسالة شديدة القوة والوضوح لجميع قطاعات الدولة واجهزتها بضرورة الاستفادة من جميع الإمكانات والتكنولوجيا الحديثة لترشيد الانفاق الحكومي.. جاءت رسالة الرئيس خلال افتتاحه امس للمقر الجديد لوزارة الداخلية بأكاديمية الشرطة.. حيث اعترض الرئيس علي اعتماد وزارة الداخلية علي ألف مجند لتأمين مقرها الجديد، مؤكداً أن استخدام هذا العدد الكبير من المجندين تكلفة مالية هائلة ويتنافي مع توجه الدولة بإخلاء العاصمة والاستفادة من اكاديمية الشرطة بما لا يكلف الدولة أي أعباء مالية. فور انتهاء اللواء ايمن جاد مساعد وزير الداخلية من تقديم شرح تفصيلي لمقر وزارة الداخلية الجديد وتأكيده علي نقل جميع القطاعات من مبني الوزارة القديم. سأل الرئيس السيسي اللواء مجدي عبدالغفار وزير الداخلية: كل الوزارة.. خلاص مافيش حد هناك. وقال الرئيس: «انا بس حأسال علي الخدمات.. الخدمات تساع قد إيه.. فرد اللواء أيمن: الخدمات يا أفندم 2400 مساحتها وتكلف بصيانة المباني في الوزارة والمسطحات الخضراء. فقال الرئيس: لا انا باتكلم هي لإعاشة المجندين.. المجندين قد إيه. فرد اللواء أيمن: حوالي ثلاثة آلاف مجند. وسأل الرئيس: هما اللي حايأمنوا الوزارة. واجاب اللواء أيمن: «لا يا أفندم.. اللي في الوزارة ألف مجند.. اللي حايأمن الوزارة كتيبة الأمن المركزي وفيها 800 مجند. وقال الرئيس: «شوف انا هاقولك حاجة.. يجب ان ننتبه لحاجة.. انا لما هكون هأمن بألف مجند بعد كل اللي انا عملته ده.. ده تكلفة مالية هائلة.. امال احنا جايين هنا ليه.. بنخلي العاصمة ليه.. عشان نستفيد بالاكاديمية كمكان بأسوار.. بتأمين وما اتكلفش انا كدولة ان أحط ألف مجند. وقال وزير الداخلية: ده يا افندم مرحليا ولسه.. ليقاطعه الرئيس قائلا: لا يا أفندم ولا مرحليا ولا غيره.. إحنا عندنا النظم الاليكترونية وطلبة كلية الشرطة.. انا لا انفق فلوس علي تأمين هذا المبني بألف مجند. وسأل الرئيس: هي تكلفة الالف مجند دول في السنة كام؟ ورد اللواء أيمن.. مبلغ كبير يا أفندم. الرئيس: احنا بنحسب كل حاجة.. ليه ده ممكن من مجموعات من الكلية «خفيف حركة» تقوم بكده مع الكاميرات.. لكن أوقف بني آدمين لمدة 24 ساعة ده كلام قديم.. ما بنعملوش خلاص ويكلفنا ملايين في السنة.. والمجند بأكله وشربه وعلاجه ولبسه اذا كلفني ألف جنيه في الشهر.. لألف مجند يعني مليون جنيه شهريا و12 مليون جنيه سنويا. اللواء أيمن: هنخفض العدد يا أفندم. الرئيس: لا مش هنخفض يا أفندم خلي بالك. وزير الداخلية: هننقل مرحليا يافندم.. ده الاستلام. الرئيس: عندي طلبة الكلية ويجب الاستفادة بالقوة البشرية وجيث هناك عشان كده.. وعندك نظم حديثة تقدر تعمل بيها اللي انت عايزه وتكون مطلع وشايف.. وعندما خفيف حركة تدريب.. وعندك نظم الانذار تتحرك بشكل سريع خلال ثانية.. والنهارده الوزارة ضمن الكيان الكبير وهو الاكاديمية.. ومقدرش اتكلم في الاطفاء ورفع الكفاءة.. أرجو اننا نستوعب. اللواء أيمن: متشكر يا افندم. الرئيس: متشكر والف مبروك.