حكايات صحفية

زمان كان ممكن وزير الطيران ولا رئيس مصر للطيران يزعلوا لو حد قال كلمتين مش ولابد في حق شركتهم .. طبعاً قصدي أي كلمتين فيهم تجاوز لأن الفريق شفيق واللواء مسعود بيرحبوا دايماً بأي نقد بناء .. لكن المصيبة السودة إنهم دلوقتي ممكن يزعلوا لو حد قال كلمتين مش ولابد عن تحالف ستار اللي مصر بقت عضو فيه وده طبعا علي طريقة أنا وأخويا علي ابن عمي وأنا وابن عمي علي الغريب.
ركبت طيارة لوفتهانزا.. حاجة كدة تخض!! ألمانيا يا سيدي!!.. أكيد طيارات بنت ستين في سبعين وآخر أُبهة! لكن والله العظيم اللي شفته ما شافوش حد وكل اللي الواحد سمعه زمان عن عظمة طيارات أوروبا طلع كلام فشنك!!
الطيارة من نوع الأيرباص ولكن ايرباص بعد ما شاخت.. والطيارة من بره هلا هاالله ومن جوه يعلم الله .. عايزة ليفة حمرا.. زي الليفة بتاعت مواعين ستي الله يرحمها ويبشبش الطوبة اللي تحت دماغها .. ده لوما كانتش دماغ ستي ما بشبشتش الطوبة أصلا.
المهم الطيارة من جوه قذرة جدا.. ولكن سيبكوا من حكاية الطيارة وخلينا في الوجبة.. حاجة تقرف اللي ما ينقرف.. أسوأ وجبة أكلتها في حياتي.. 3 فتافيت لحمة باين الألمان عرفوا اللحمة الجملي.. وشوية تخديعة وحتتين بدنجان دبلان.. ومحدش يقولي يعني إيه تخديعة.. خليها صاص طماطم. والملح عليها زيادة.. أكن العملية ناقصة قرف.. المهم الرحلة كانت طويلة.. من القاهرة إلي بيونس أيرس في الارجنتين.. في وش عدوكم حوالي 81 ساعة منهم ساعتين غيرنا الطيارة في فرانكفورت.. في الوصلة التانية ما اسخم من سيدي إلا ستي.. وجبة عبارة عن مكرونة معجنة وعليها بشاميل مش عارف عملينه ازاي .. حاجة كدة معجنة وطعمها ربنا ما يوريك.. والله العظيم لو مراتي عملتها ليه لكنت ورتها.. طبعا قصدي كنت هزعق لها.. وطبعا كانت مش هتسكت وكنت هنام ليلتها برة البيت زي أي واحد يعمل سي السيد الأيام دي!!
المهم تصادف في نفس اليوم ان ابني أحمد الطالب بكلية الصيدلة بالجامعة الألمانية رايح المانيا مع زمايله علي نفس الشركة.. راحوا مطار القاهرة الفجر.. خدوا الشنط .. ثم نزلوا الشنط وقالوا لهم يا حلوين معلش الطيارة مجتش من ألمانيا.. حرنانة.. تعالوا بكره في نفس الميعاد... العيال سمعوا الكلام راحوا تاني يوم ... قالولهم يا حلوين ملكوش مكان علي الطيارة.. كلمة من هنا ومية من هناك قالوا لهم معلهش.. آسفين هنوديكم فندق علي حسابنا.
ساعتها بس عرفت قيمة مصر للطيران.. والله العظيم وبدون مبالغة مصر للطيران اليوم هي أفضل شركة طيران. أفضل معاملة. أفضل خدمة.. مواعيد فشر الجماعة الألمان.. والوجبه بتاعة مصر للطيران فاخرة وفيها هبر لحمه وشويه سلطات معتبرين .. ويارب مايوريكم اللي شفته علي طيارات حبايبنا الخواجات.