طريق النور

تعالوا نصدق بعضنا..

القطر فات يا بلدنا.. وعدي علي ولادنا وشبابنا.. محطة ورا محطة زاد فيهم تعبنا وعذابنا.. الفقر عشش علي بابنا.. وعروسنا بارت وشاخت من كتر ما كاتبنا.. لا فرح عاد ولا زادنا.. ولا ثورة غيرت أخلاقنا وعتابنا.. والضحكة غابت م العيون والحزن سكن القلب جوه حيطان أبوابنا.. وحق الشهيد ضاع في ليلة الوداع.. والمصاب أصبح مصابنا.. هو الغلابة مكتوب عليهم الشقا من ميلادهم لحد الممات.. واللي فات أهو مات ومات معاه سره وقهره وحزنه وساب لينا آهاتنا.. وجراح بتنزف من غير دم في قلوبنا..
يا آهة يا مكتومة.. قومي من دي النومة واصرخي في الحلق واطلبي حقك من اللي باعك واللي خانك ومن أيامك المعدومة.. عمر الحق ما بيجي بضربة شومة.. دا الحق صوته أعلي من طلقات الرصاص وصواريخ المدافع والقنابل المشئومة.. واعرف يا صاحبي ان الدنيا سكة سفر.. يا تركب قطرها الصبح.. يا تهرسك عجلاته في لحظة غشومة.. ساعتها راح تقول آه.. وصوتك ينعق في الفضا زي صوت البومة.. ما هو أنت اللي كنت السبب وسكت عن حقك وضعيته بسكاتك وجبنك وخوفك وفضلت أخرس زي الشيطان اللي سكته دايما ملعونة وملغومة..
زمن البراءة تاه.. في زحمة الأيام.. وكتر السكات خلاه يزيد آلامه آلام.. يا دمع عين مع آه.. امتي يعود اللي تاه.. الصدق غاب في سماه والوفاء أوهام والكدب خدنا معاه علي سكة م الأحلام ننام ونستناه.. ونهارنا كله كلام.. بنلف علي بعضنا ونغش علي نفسنا ونصدق كدبنا.. وغيره ما نسلاه.. زمن العبر يا ناس جبر لا علم علمنا.. ولا رب كريم نخشاه.. حتي سماحة الروح صبحت لا نافع معاه زكاة.. ولا شافع فيها صلاة.. ولا ركوع وقيام..
الذنب ده ذنبنا ودا كله من كدبنا.. ولو صدقنا القول ح يبارك لنا ربنا.. في رزقنا وفي عمرنا وفي حلمنا وفي صبرنا.. وثورتنا اللي قامت ترسي علي شطنا.. بلاش نخون بعضنا.. ونتهم بالزور ناس من أهلنا.. ومن دمنا.. وقسمنا لقمتنا كلنا مع بعضنا..
دي بلدنا بلد الخير.. بس الخير ضايع مننا.. وهرب مع سنين عمرنا.. وفاتنا زي القطر ما فاتنا وسابنا لجراحنا وحزننا.. يا بشر انحشر جنب شط النيل وطرح علي شطه من البشر ملايين تايهين ما بين ربيع عربي حزين وخريف بينهش لحمنا.. ومؤامرة محبوكة لسه بتحوم حولنا.. واللي باع فينا واشتري وزود فقرنا ناس مننا.. حكمونا بالحديد والنار سجنونا جوه خوفنا وجلدنا..
لو كنا عايزين بجد ناخد حقنا م اللي ظلمنا وهدنا.. تعالوا نجمع من تاني شملنا وكلمتنا تصبح حلمنا ح نحققه بايدينا مش بايدين اللي باعونا وباعوا أرضنا.. الصدق يصبح طريقنا ونخاف بس ما اللي خلق الخلق ربنا.. وضميرنا اللي نايم نصحيه ونداويه ونشفيه م الكدب والرياء والحقد ونبني بلدنا بعرقنا ودمنا.. ونشاور علي الحرية نلاقيها طلة من عيونا وسكنه جنبنا.. لو نصدق بس بعضنا.