صدقنا صوتك

البث مش حصري وكله ع المكشوف إيد النظام عميا كف الوطن بيشوف
يااللي رميت العلم
وطي عليه هاته
وبوس جبين الوطن
في كل أوقاته
وارفع دماغك لفوق
قول بكل افتخار
أنا مصري ابن الميدان
في ساحة التحرير
وقت ما ندهت بهية
مديت أنا إيدي
لا هربت منها
ولا نسيت مواعيدي
تحت النهار التقينا
لقينا الصبح مستني
يا حبيبتي مين اللي يقدر‏..‏
يبعدك عني
جوايا ساكنة
وساكن قلبك النني
ارخي عليك جفوني
ساعة ما يحمي الضرب
ألم روحي في روحك
ما يهمني إنسان
ألبس جدودي‏..‏ في عودي
وأركب حصان التاريخ
أكتب هنا في الميدان
الليل بيتوفي
والفجر كان طالع بيتكفي
مديت له إيدي
فتح لي سكة مقفولة بميت ترباس
غمض عينيك واقرا وجوه الناس
القصر فاضي والحرس خيالات
لحظات وقلبك يرجع لسكانه
حسك جميل‏..‏
ياحبيبتي والشباب صاحيين
باصين علي بكرة
علي فكرة‏..‏ مش محسوبة أحلامنا
صدقنا صوتك
وإنتي مشيت قدامنا‏.‏
إبراهيم مصطفي


إضافة تعليق

البيانات مطلوبة

اسمك
*


بريد الالكترونى *
البريد الالكتروني غير صحيح

عنوان التعليق *


تعليق
*