خريج التوك توك!

دخلت المقهي المعتاد في وقت متاخر وجدت عم محمد الذي يعمل في المقهي منذ سنوات. أنا: أخبارك ايه... شكلك مش مبسوط ليه؟.. عم محمد: بصراحة زهقت يا بيه. أنا: زهقت من ايه بس؟.. هو: من البهدلة والعيشة الغالية والسنين الطويلة والواقفة اللي أنا واقفها دي.
أنا: طيب ما تقعد يا عم محمد..( هههه) لا أنا كده أزعل منك.. احنا اتفقنا انك متزعلش عشان صحتك.
هو: مزعلش ازاي, حضرتك شوفت سواق التوك توك اللي كان مع عمرو الليثي امبارح, شوفت ازاي شبابنا واعي ومثقف وفاهم مش زي الحكومة اللي نايمه في العسل.
أنا: بصرف النظر عن الحكومة بس أنا فعلا شفت الشاب وتعاطفت معاه لكن مش كل كلامه صح.
هو: مش صح ليه دا كلامه مترتب ومضبوط, وبعدين دا بيتكلم زي اللي بيطلعوا في التليفزيون.
أنا: ما هو المصيبة ان مش كل اللي بيطلعوا في التليفزيون بيتكلموا صح.
هو: خد عندك مثلا هو اتكلم عن المشروعات العملاقة اللي ماكنش ليها أي ستين لزمة.
انا: مين قالك ان المشروعات العملاقة مش مفيدة, دي ذي الدينامو بيسموها في الاقتصاد محركات التنمية لان مفيش مستثمر أجنبي حيجي من غير ما يلاقي بنية تحتية من طرق ومياه وكهرباء.
هو: عايز تقولي ان المشاريع أهم من تعليم وصحة البني أدمين.
أنا: لا طبعا بس القضية في ترتيب الاولويات, التنمية البشرية من صحة وتعليم محتاجة فائض وموارد ومفيش موارد من غير مشاريع, يعني مثلا أما النهارده حد بيتعلم كويس والبلد بتصرف عليه مين اللي بيستفيد غير أمريكا كندا ودول الخليج لانه مش بيلاقي مشاريع محترمة والوظيفة والمكانة اللي يستحقها داخل البلد.
هو: يعني حضرتك عايز تقنعني ان الحكومة عظيمة والبلد ذي الفل.
أنا: لا طبعا, هناك أخطاء وقصور لدي بعض الوزراء خاصة وزراء المجموعة الاقتصادية, لكن الحلول مش سهلة فمثلا معضلة أزمة الدولار, الحكومة محتاجة قرض الصندوق عشان تعوم الجنيه ويستقر السعر والصندوق ممتنع عن منحنا القرض الا بعد التعويم وترشيد الدعم, تعمل ايه حضرتك.
هو: والله صحيح دي معضلة فعلا, بس الناس بتعاني والا حضرتك ليك رأي تاني؟
أنا: لا طبعا فيه فساد مستشري والاجهزة تلاحقه لكن مش محققة النتايج المطلوبة اللي ترضي الناس, بس اللي أنا عايز أقوله ان الحلول ليست بهذه السهولة والسطحية اللي البعض معتقدها, لان أغلب القرارات بيكون ليها تأثير ايجابي في حته وسلبي من ناحية تانية, ومتنساش ان أي إصلاح اقتصادي مؤلم وتجارب التنمية كلها بتقول كده.
هو: طيب ايه رايك في الشاب خريج التوك توك,حيطلع إخوان هو كمان؟
أنا: بالنسبة ليه أنا لا أميل في الغالب لنظرية المؤامرة, فيه ناس كتير تعبانة, لكن الحل مش مزيد من الكذب والتراجع عن الاصلاح الاقتصادي عشان الناس ترضي ومصر تضيع, لازم نواجه أزماتنا ونعرف اننا بندفع فاتورة سنين من غياب الإرادة الحقيقية لمواجهة الأزمات بالإصلاح وليس بالمسكنات, وبعدين سهتنا في الكلام يا عم محمد.
هو: حالا حعملك القهوة.. أنا: لا قهوة إيه بقي الساعة3 الفجر, حتيجي معايا أوصلك المرة دي.
هو: موافق اني اركب معاك العربية.. أنا: أمال كنت بتركب إيه قبل كده.. هو: كنت بركب التوك توك.