قصيدة

يائسة

يا ساكنة ف ضميري حاسك أنا.. حابسك أنا... حابسك هنا...
جوا قفص صدري
خايف عليكي من عيون غيري
وبغزلك توب من نسيج شعري
أتلف بيكي وأجمع شتات طيري
وتكوني يوم اللقا دنيتي وقدري
ما عنيكي بتحدد طريقي ومصيري
أيامي وياكي هيا سنين عمري
يا مالكة فيا الروح وساكنة ف ضميري
وأنا اللي حبك أسرني فاسمعي أمري
ارعي ف جناين شوقي.. واتمرغي ب خيري
وأما بعادلك طال ونفد معاه صبري
ناديت ضميري اللي جعلك للعاشقين قاضي
بخاف عليكي من نفسي ومن غدري
وأنا ف حبك علي كل الحالات راضي
عرفتي ليه حبسك جوايا وبسببك
تجري ف دمي وروحي الهايمة بتنادي
وأطلق سراح الشعر ب وريدك
ينهال عليا الكلام يتهزله فؤادي
وتجمعي حروفي وتقريها ف بريدك
واتمد ف حدودك يا أرضي وبلادي
وتشكلي قصيدة من حروف اسمي
وترسمي ملامح عشقي بعنادك
وأنا اللي صورتك بكلمتي ورسمي
إيه لكل الخلق ف وشك حسادك
يا روح بتسري في دمي وف جسمي
حني لعاشق ست الحسن بودادك
دلوقتي خليني أكسر قيود أسرك
ما ضاق عليكي الحضن
وماعادشي بيساعك؟!!!
وأنا اللي خايف عليكي
وخايف علي كسرك!!!
رغم أنه نفس الحضن...
الشاقي لأوجاعك!!!!
ليه باصة من فوق شرفة..
ف جدار قصرك؟؟
وهان عليكي الأمان..
وكان سهل إخضاعك
ليه تنسي كل اللي كان
وبعيش علي ذكرك
وقلبي وسادة حنان..
تكفي لإشباعك!!!
وكنتي كاس الأمل...
مليانة حنية!!!!!
ليه بعتي قلبي وهجرتي..؟
وهوا ما باعك!!!!!!!!!!