يا خوفي

منك يا زمن
حيرتني
وأنا في أصعب المحن
أروح يمين ؟
يرجع لون السواد
اللي عشته من سنين
وإلا أروح شمال
ويعود الألم والأنين
ليه كدا يا زمن ؟
لامتى هتسيبني في حيرتي
وخوفي هو سيرتي
أنا خايف عليك يا وطن
***
يا خوفي منك يا زمن يا خوفي
خايف يضيع اسمي
خايف تتبعتر حروفي
وارجع في عز النهار
أشيل فانوس
اسأل عن الحقيقة
اللي تحمى ظروفي
آه منك آه يا خوفي
***
يا خوفي منك يا زمن
ليه دايما انت مغلبني
أناديك تبص لي
ولا تكلمني
اطلع من حفره
وأقول هي دي للخير نفره
توقعني تأنى في دحديره
أنا ما صدقت أشوف ضحتك
تقلبها تاني في وشى تكشيره
ليه انت معذبني ؟
أنام في حضنك تكسرني
يا خوفي ترجع تانى جوايا تسجني
***
يا خوفى منك يا زمن
ترسم كلمة خوف على باب السكن
تاخدني وأنا عطشان
وقلبي بيك لشمس بكره ولهان
وترجعني تاني لطريق طويل
وقلبي بالأمل عليل
يا خوفي ترجعني تاني لرحلة النسيان
***
يا خوفى منك يا زمن
أنا عايشه
الأمل ضفيرة حبيبتي
من ضوء القمر أنا ضفرته
من نسيج خيوط الشمس
أنا نسجته
وحلم قلبي بيتمناه
فيك يا وطن أنا عيشته
من آلاف السنين
تاريخك أنا سطرته
على جدران المعابد
أنا حفرته
أول حضارة للعالم
أنا علمته
اوعى ترجعني تاني
لخوف أنا بايديه خنقته
***
يا خوفي منك يا زمن
وآه منك يا زمن
قلبي سهران ليالي
يرسم بالورود آمالي
أنا قلبي
خايف على الوطن
ساعدني يا زمن
سامحني يا زمن
يا ربى
نور طريقي أخرجني من المحن
أعيش فيه يعيش جوايا
يا زمن
يجرى في دمنا
في ليلنا في صبحنا
اسمي رسمي جسمي
منسوج منك يا وطن
يا خوفي منك يا زمن