الزمالك يعنى أفرحلي يومين وأحزن سنة..وأهلاوي يرد: زغرطي يا أميرة الدوري في الجزيرة

"إلياسو لاعب المصري رقم (5) جاب الجول الأول في الدقيقة (5) من الشوط الأول وبرده جاب الجول التاني في الدقيقة (5) من الشوط التاني.. وبعد فوزنا النهاردة الفرق بقى (5) نقط وعندنا (55) نقطة والفرق (5) نقط!! هو رقم 5 بيضحكك؟؟ طب 5 5 5 5 5 " دا كان تعليق أهلاوي على صفحة "أنا زملكاوي إذن أنا بواب".
أحد الأهلاوية على نفس الصفحة بمجرد أن رأى التعليق رد عليه بطريقة شعرية وقال:" الزمالكاوية بيقولو هناخد الكأس.. وهانفرح بقى لو مرة يا ناس، وأرقص يا حازم..غنى يا عباس.. واهو برضه فريقكم رجع محتاس.. كل ده وانتوا مش فاهمين.. والله جمهوركم فريق مساكين.. نصفه غلابة والباقى مجانين.. ربنا يهديكم.. قولوا آمين".
وتستمر فرحة جماهير الأهلي فيقول الماجيكو "الزمالكاوية طلّعوا عينا المرحلة الأولى والمرحلة التانية وعايزين يبهدلونا وبعد هزيمة الزمالك من المصري قال "زغرتي يا أميرة .. الدوري في الجزيرة.. وصوتي يا إنشراح.. الدوري من ميت عقبة راح.. واتفرج على اللعب والحركات.. من جدو ومحمد بركات وسمعني سلام الدوري للجدعان".
رضوى -على حد تأكيدها- سمعت زملكاوي يسألوه: "الدستور الأول ولا الانتخابات أولا؟ فرد والدموع في عينيه:الأهلي الأول".
الماجيكو أبدع في شعره مقسما ألا يترك الزمالكوية في حالهم فقال:
ستة أعوام : تتعالى عليهم الضحكات
ستة أعوام: تتعالى من جمهورهم الصرخات
ستة أعوام: شالوا بالخمسات والستات
ستة أعوام: فشلوا في جميع البطولات
...ستة أعوام: خسروا جميع الصفقات
...ستة أعوام: جدو وداهم النيابات
ستة أعوام: من تزوير الإنتخابات
ستة أعوام: للمئوية يتسولون الجنيهات
وفي ستة أشهر: ظنوا أنهم صنعوا البطولات
وهذا هو الفرق بين نادي القرن ونادي الجلابيات".
وفي رسالة على طريقة الvoice call قالت رشا " إلي جمهور نادي الزمالك.. الدرع الذي تحاول الفوز به غير متاح حاليا من فضلك حاول الموسم القادم".
بعد هزيمة نادي الزمالك عن طريق المصري البورسعيدي وجّهت الصفحة سؤالا لأعضائها كالتالي:"تقول إيه لكل زملكاوي كان بيحلم بالدوري؟؟؟". رد عليه عمر " لقد نفذ لعبكم عزيزى اللاعب يرجى الانسحاب من الدورى".
وقال زملكاوي عاشقا لناديه ومصصم على تشجيعه: يعنى إيه الزمالك !!؟ الزمالك يعنى أنا.. يعنى افرحلى يومين، واحزن سنة.. بس يومين الفرح دول، من قلبنا.. يعنى قليل لما اخد دورى.. بس دورى، من حقنا.. لو حسيتوا المتعة دى.. كنتوا تتمنوا فى يوم، تكونوا زينا.".
أمير لديه توقعات بمستقبل الزمالك بالدوري وتنبأ بالتالي:"الزمالك يتلقى هزيمة مذلة برباعية نظيفة على يد وادى دجلة هى الرابعة له على التوالى ويحتل المركز السادس ويفقد الأمل فى المركز الرابع والمشاركة فى الكونفيدرالية الإفريقية واتجاه قوى لتسريح اللاعبين وإقالة التوأم ههههههههههههههه".
أمير طلع بتاع حكم كمان " إذا أردت الدوري بشدة,, فأطلق سراحه.. فإن راح للأهلي فهو لم يكن لك من البداية.. وإن عاد إليك,, فروح إديه للأهلي عشان أكيد وقع منه".