في بيان ناري.. "ألتراس أهلاوى" يعلن حضور افتتاحية الأهلى فى الدورى أمام الجيش

أعلنت رابطة ألتراس أهلوى المنتمية للنادى الأهلى حضور مباراة الفريق الأول لكرة القدم أمام طلائع الجيش فى الأسبوع الأول من الدورى الممتاز المقرر إقامتها غدا الخميس بملعب بتروسبورت.
كما أصدر الألتراس بيانا جاء نصه..
عجبكم شكل الجمهور فى السوبر؟ حسيتوا الجمهور مهم يبقى فى المباريات.. فهمتوا معنى الكرة للجماهير؟ اللى شفتوه هيفرق معاكوا فى حاجة؟ هيخليكم تفكروا فى حلول.
كلها تساؤلات غالبا محدش هيجاوب عليها.. وللعلم الجمهور المصرى هو الجمهور المصرى فى أي مكان لما بيحس بالمسئولية بيكون قدها.
جمهور الكورة عايز يرجع الاستاد.. عايز يبقى فى مكانة الطبيعى.. واضحة ومش محتاجة لا تفسير ولا شرح.
جمهور الأهلى تواجد فى مباراة أورلاندو فى البطولة الكونفدرالية.. ورغم هزيمة الأهلى لكن المباراة عدت بسلام.. ونفس الجمهور تواجد فى تدريبات الفريق مرات ومرات ومرات وبآلالاف وبردوا مفيش مشاكل حصلت.
الجمهور طرح أفكار كتير.. إما شركات خاصة للتأمين.. أو أن الجمهور يأمن نفسة بمساعدة أمن النادى الأهلى.. واستعداد الجمهور للتفتيش . لكن لا حياة لمن تنادى.
الحديث عن صعوبة حضور الجمهور بسبب الانتخابات شىء غريب.. وإذا كان المسئولين مشغولين بالانتخابات.. مفيش أى مشكلة يسيبوا الكورة للجمهور وهو على أتم الاستعداد للحضور وتنظيم نفسة بنفسة بمشاركة من أمن النادى الأهلى.
بداية الدورى الجديد بدون جمهور هو استمرار لقتل كرة القدم فى مصر.. وعلية تقرر تجمع جمهور الأهلى وجميع سكاشن أولتراس أهلاوى فى القاهرة والمحافظات يوم الخميس لحضور أولى مباريات الفريق فى الدورى العام أمام طلائع الجيش .. التجمع الساعة الخامسة مساء أمام بانوراما 6 أكتوبر – صلاح سالم.. للتجمع والتحرك إلى استاد بترو سبورت.