الألتراس يعلن حضور مباراة الأهلي وطلائع الجيش

أعلن جروب ألتراس أهلاوي الذي ينتمي للنادي الأهلي حضور مباراة الفريق الاحمر القادمة أمام طلائع الجيش المقرر إقامتها الخميس المقبل علي ملعب "بتروسبورت" في الجولة الأولي من الدوري.
ونشر الجروب بياناً عبر صفحته الرسمية علي موقع "فيس بوك" ينتقد فيه تقاعس المسؤولين عن كرة القدم في مصر عن إيجاد حلول لعودة الجماهير مرة أخري للمدرجات ، وأعلن الجروب حضور مباراة الأهلي والجيش القادمة في الجولة الأولي من الدوري.

وجاء نص البيان علي النحو التالي:
"عجبكم شكل الجمهور فى السوبر ؟؟ حسيتوا الجمهور مهم يبقى فى المباريات.. فهمتوا معنى الكرة للجماهير ؟؟ اللى شفتوه هيفرق معاكوا فى حاجة ؟؟ هيخليكم تفكروا فى حلول.
كلها تساؤلات غالبا محدش هيجاوب عليها .. وللعلم الجمهور المصرى هو الجمهور المصرى فى اي مكان لما بيحس بالمسئولية بيكون قدها.
جمهور الكورة عايز يرجع الاستاد .. عايز يبقى فى مكانة الطبيعى .. واضحه ومش محتاج لا تفسير ولا شرح
جمهور الاهلى تواجد فى مباراة اورلاندو فى البطولة الكونفدرالية .. ورغم هزيمة الاهلى لكن المباراة عدت بسلام .. ونفس الجمهور تواجد فى تدريبات الفريق مرات ومرات ومرات وبألالاف وبردوا مفيش مشاكل حصلت.
الجمهور طرح افكار كتير .. اما شركات خاصة للتأمين .. او ان الجمهور يأمن نفسة بمساعدة أمن النادى الاهلى .. واستعداد الجمهور للتفتيش .. لكن لا حياة لمن تنادى!!.
الحديث عن صعوبة حضور الجمهور بسبب الانتخابات شىء غريب .. واذا كان المسئولين مشغولين بالانتخابات .. مفيش اى مشكلة يسيبوا الكورة للجمهور وهو على اتم الاستعداد للحضور وتنظيم نفسة بنفسة بمشاركة من أمن النادى الاهلى
بداية الدورى الجديد بدون جمهور هو استمرار لقتل كرة القدم فى مصر .. وعلية تقرر تجمع جمهور الاهلى وجميع سكاشن أولتراس أهلاوى فى القاهرة والمحافظات يوم الخميس القادم لحضور اولى مباريات الفريق فى الدورى العام امام طلائع الجيش .. التجمع الساعة الخامسة مساءاً امام بانوراما 6 اكتوبر – صلاح سالم .. للتجمع والتحرك الى استاد بترو سبورت
الكرة للجماهير".