بعد الإفراج عن زكريا عزمى بكفالة ..غضب عارم على تويتر ودعوات لثورة ثانية على الفيسبوك

يبدو أن خبر الإفراج عن زكريا عزمى الرئيس السابق لديوان رئيس الجمهورية وخروجه بكفالة 200 ألف جنية لأسباب تتعلق بكبر سنه وظروفه الصحية – كما ورد بعدة تقارير صحفية- كان القشة التى قسمت ظهر البعير، واستنفذت صبر المصريين وهدوءهم خاصة بعد تواتر أنباء عن الإفراج عن فتحى سرور و سوزان مبارك من قبل على الرغم من ورود أنباء حول استمرار التحقيق معهم، فضلا عن الجدل الذى أصبح أكثر اشتعالا حول قضية اعتذار الرئيس المخلوع مبارك وتنازله عن ممتلكاته فى مقابل إخلاء سبيله كما حدث مع زوجته.
كل ذلك أدى إلى اشتعال غضب المصريين بالأمس على مواقع التواصل الاجتماعى الفيسبوك وتويتر حيث اعتبر الكثير منهم بأن الثورة يتم سرقتها، وأن تلك المحاكمات شكلية لتهدئه الرأى العام وليس أكثر وتوقع الكثيرون الإفراج عن جميع رموز النظام السابق كما تم مع زكريا عزمى عدا أمين التنظيم أحمد عز و وزير الداخلية الأسبق حبيب العادلى معتبرينهم كبش الفداء الذى سيتم التضحية به من أجل سلامة الباقيين.
فعلى الفيسبوك دعا نشطاء إلى مليونية جديدة الجمعة القادم 20 مايو تحت مسمى "جمعة رفض الاعتذار" مؤكدين على رفضهم مبدأ الاعتذار والتصالح مع أى من رموز النظام السابق بما فيهم الرئيس المخلوع مبارك، وتأتى تلك الدعوة لما اعتبروه اتجاهًا من القائمين على شئون البلاد لعقد مصالحة مع الرئيس الخلوع فى مقابل تسليم ممتلكاتهم إلى الدولة والتى اعتبروها حق من حقوق الدولة وليست منة أو فضل منه خاصة بعد تصريحات المجلس حول تردى الأوضاع الاقتصادية للبلاد.
وقد طالبوا بتنفيذ مجموعة من المطالب حددوها كالآتى: إعادة اعتقال كل من أفرج عنهم تفعيلا لقانون الطوارىء، محاكمة مبارك على جرائم قتل المتظاهرين وتقديمه لمحاكمة عسكرية بتهمة الخيانة العظمى.
كما طالبوا بفتح ملف كنيسة القديسين والتحقيق العاجل فيه والإفراج عن كافة المعتقلين فى حادث السفارة الإسرائيلية وكافة النشطاء الذين تمت محاكمتهم عسكريا والوقف الفورى للمحاكمات العسكرية للمدنيين.
فى الوقت نفسه تم تدشين صفحات تدعو إلى ثورة غضب مصرية ثانية تنطلق الجمعة 27 مايو تحت شعار "أنا محستش بالتغيير ونازل تانى التحرير" بهدف إنقاذ الثورة، وقد ازداد عدد المنضمين لصفحة الدعوة على موقع الفيسبوك بشدة منذ بدء الجدل حول اعتذار مبارك وإخلاء سبيل زوجته وأخيرا الإفراج عن عزمى بكفالة، حيث اقترب عدد أعضاء تلك الصفحة من حاجز الإثنين والعشرين ألف عضو حتى كتابة تلك السطور وبعيدا عن تلك الصفحة الرئيسية تضامنت عدة صفحات ومجموعات أخرى مع الدعوة وأعلنت مشاركتها فى الثورة الثانية ودعت أعضائها للمشاركة فيها.
فاستنكر عمرو حيثيات الإفراج عن عزمى "أساسا كلهم كبار فى السن يعنى كلهم براءة !! وقتلة خالد سعيد براءة !! أين الثورة لازم نبحث عنها" وأضاف محمد " ماتيجو نجمع لهم مليون جنيه ونخرجهم كلهم كفالة ولا كأن في ثورة قامت ولا شهدا استشهدوا، هو كلهم استحلوا موضوع أنا عيان ده ولا إيه؟ ولما انت عيان سرقت وقتلت ليه؟ اشمعنى دلوقتي عيان؟".
وتوعدت نيكول "والله ما هانسكت علي المهزله دي مش هانسيب حقنا وحق كل اللي ماتوا يضيع متياسوش وتعالوا نحط ايدينا في ايدين بعض وننزل نقول للظلم لا نصرخ وباعلي صوت حاكموهم حاكموهم اللي سرقوها حاكموهم" وأيدتها سارة " عشان شايفة ان الثورة بتضيع والحرامية هيطلعوهم من السجن قال ايه عشان سنهم كبير وعيانين لازم ننزل كلنا يوم 20 ويوم 27 الثورة لسة مخلصتش " واتفق معها محمود " شريك ممدوح إسماعيل فى قتل 1100 مصرى يتم الافراج عنه .... وثروتة التى تقدر ب 20 مليار جنية كلها جمعها من عمله فى القصر الجمهورى فعلا راجل شريف لازم كلنا ننزل نعتذر له فى التحرير" وأضاف أحمد " طب لو كل واحد سنه كبير ومريض مسجون هيخرج من السجن المفروض بقى متبقاش سجون نحولها دور للمسنين واهو كله بثوابه وهنيالك يافاعل الخير ... افتكرت دلوقتى منظر الظباط اللى ضرب راجل عجوز بالقلم اللقطه دى مشهوره قوى ... يعنى هو الراجل ده مكنش مسن"
وعلى تويتر انعكس غضب المصريين على تعليقاتهم التى انطوت على بعض السخرية كالعادة إلا أنهم دشنوا حملة عددوا فيها مطالبهم التى سيوجهونها للمجلس العسكرى وحكومة شرف الجمعة المقبلة فى ميدان التحرير ومن أمثلة تلك المطالب :
- أن يعامل الجميع بنفس الطريقة أمام القانون ..المدير مثل الغفير.
- التجاوب مع المطالب الفئوية التى تنبع من مطالب الثورة .
- التطهير الكامل والشامل لكافة مؤسسات الدولة .
- تطهير الإعلام من كافة القيادات الفاسدة التى مازالت تتملق الحاكم أيا كان .
- نزول وزير الداخلية في حملات مرور على المحافظات والضابط المتغيب عن عمله يتفصل
- ترشيد الاستهلاك الحكومى، ومافيش حاجة اسمها عربية الوزارة أو المؤسسة أو المصلحة بعد كده
- المحاكمة الفعلية العادلة لجميع المفسدين.
- الإفراج عن كافة النشطاء وإلغاء المحاكمات العسكرية للمدنيين .
- نريد القصاص العادل من قتلة شهدائنا.
- إقالة يحيي الجمل.
- تشكيل مجلس رئاسي مدنى.
- حل المحليات.
- مفيش تنازل عن حق الشهدا ولا عن محاكمة كل من أجرم فى حق مصر.
وحول حيثيات الإفراج عن زكريا عزمى كما أوردتها عدة تقارير صحفية فضلا عن إخلاء سبيل سوزان مبارك؛ جاءت تعليقات المصريين تمزج بين الرفض والاستنكار وبين التهكم والسخرية حيث حددوا أسباب افتراضية ساخرة أخرى للإفراج عن باقى رموز النظام على غرار عزمى ومن أمثلة تلك التعليقات:
- الناس فاكرة ان اللى بيحصل فى مصر ده مخطط! . . . . . .لا طبعا. . ده كاروهات
- هذا هو قانون ولاية ساكسونيا اذا اجرم الامير يعاقب ظله بالضرب أما لو أجرم أحد من عامة الشعب فالقتل له ولمن كان بجانبه.
- بعد الإفراج عن ماما سوزان وجدو عزمي .. النائب العام يأمر بحبس الشعب المصري 15 سنة بتهمة الثوره الكاذبة.
- كل سنة وأنت قرطاس يا شعبنا العظيم.
- حسنى عايز يمشيها زى ما سواق الميكروباص بيخبطك ويرضيك بأى حاجة ويمشى
- المجلس العسكرى: قرر إحالة الثورة للتقاعد بس مستنين النشرة.
- الإفراج عن صفوت الشريف بعد نفاد الصبغة.
- لولم يعين يحي الجمل في رئاسة الوزراء لهرول للدفاع عن حسني وعائلته ..وقد قال:ان فتحي سرور مش ها يتحاكم علشان صاحبي! وصدق
- واحنا اسفين يا ريس عن كل اللى حصل، وان احنا بعدناك على الكرسى لمدة 3 شهور.. اعتبرها اجازة مدفوعة يا سيدى..صافى يالبن؟
- نفسى ما يتعملوش معانا ان احنا لسه قطيع..نفسى ما يعملوش ناصحين الظاهر فيه احساس تأصل عند الحكام ان عيب يعملو اللى الشعب عايزه
- احب اقولها لكوا بصراحة جدا ... انا صعبان عليا حبيب العادلى .. لانه كبش فدا .. طب كنت سلك حالك يا راجل شوفت .. طلعوا اصيع منك
- تسجيل صوتي للشعب يذاع على قناة العربية و الشعب ينفي انه قام بثورة ويؤكد ان من قاموا بها قلة مندسة. ومبارك يحتج.
- الافراج عن جمال مبارك لأن دمه تقيل ومش لاقي حد طايقه في السجن وقاعد لوحده على طول
- هوه مبارك لسه ماقلش هيحلف اليمين امتى...؟؟!
- عودة مبارك إلى الحكم ومطالبة الشعب بتعويضه عن الخسائر الناتجة عن ايقافه عن العمل لمدة 3 شهور و تقدر ب 0.5 مليار جنيه
- الإفراج عن احمد فتحي سرور علشان خاطر حابايبنا فى السيده .. وسمعني صوت البراااااءه
- الافراج عن علاء مبارك لأنه البكري و أول فرحة باباه و مامته
- الافراج عن جمال مبارك عشان أومليت و المساجين إتخانئوا منو
- الافراج عن المغربي عشان عينيه خضرا وحواجبه تمانية
- وقبل كده افرجوا عن فتحي سرور لانه تخين وبياكل اكل كل المساجين
- بعد الافراج عن زيكو لكبر سنه.. الافراج عن جيمي وعلاء لينضما لحضانة الام
- سوزان مبارك تفتتح مهرجان البراءة للجميع
- حيثيات إخلاء سبيل عزمي: كبر السن والمرض ..... و حتمية وجودة لادارة الفلول نظرا لوجود صراع و تخبط الان على قيادة الفلول
- ثورة 27 مايو ستبدأ قبلها بأسبوع.. معادنا في التحرير الجمعة الجاية.. دمنا مش هيضيع ولو محتاجين شهدا تاني إحنا جاهزين
- الكل يخرج بكفالة ؟؟ هي الثورة اندلعت حتى يدفع المجرمون كفالة ويطلع الجميع براءة ؟؟ سحقا للثائرين اذن ,ليعودوا الى المعتقلات جميعهم
- هو ايه العك ده بيخلوا سبيل الحرامية وبيحاكموا شباب الثورة ..بنطالب المجلس العسكري بالإفراج عن المعتقلين السياسيين بيخرج السياسيين المعتقلين!!
- سوزان وزكريا فى يوم واحد وقبلهم سرور ومرتضي وبكرا عز .. ع الجمعة مبارك هيرجع رئيس
- بقدرة قادر سوزان رجعت بنت عشرين وقلبها زي الفل ومش محتاج قسطرة ولا حاجة.. سبحان من يحيي العظام و هي رميم.