على تويتر.. المصريون يقولون "الاختلاف في الثورة.. لا يفسد للوطن فرحة"

بعد أن تحقق ما كان يصفه الكثيرون بالأحلام، واعتبره البعض دربا من المستحيل والخيال، أن تقوم ثورة شعبية سلمية بمصر، ولا تكتفى فقط بمجرد إسقاط النظام بل ومحاكمته هو ورموزه بضغوط شعبية داخلية دون أى تدخل خارجى، عبر مصريون عن سعادتهم وفخرهم الشديد بما حققوه.
تحت شعار "التحرير علمنى" شهد موقع تويتر للتواصل الاجتماعى مداخلات وتعليقات استلهم المصريون من خلالها الدروس التى تعلموها من الثورة والاعتصام بميدان التحرير، وجسدت معظم التعليقات شعورا بالفخر والانتماء والرغبة الحقيقية فى التغيير والمساهمة فى بناء مستقبل مصر ونهضتها.
وراح كثيرون منهم يعددون ما تعلموه من تجربتهم فى المشاركة بالثورة، ومدى انعكاس ذلك على رؤيتهم لأنفسهم وللحياة ولمصر ومستقبلها، وكان من نماذج تلك التعليقات :
- إنى اتعلم إزاى اتقبل رأى الآخرين حتى لو كنت مختلف معاهم وأدافع عن حقهم فى التعبير عن الرأى ده.
- إن المصريين لما بينسوا انتماءاتهم السياسية وبيركزوا فى مصر ، بيلعبوها صح.
- إنى أقدر أطالب بحقوقى فى أى وقت وآخدها.
- مفيش حلاوة من غير نار ومفيش حرية وعدل من غير شهداء وضحايا عشان نحس بقيمتها ونحافظ عليها.
- لا يغير الله ما يقوم حتى يغيروا ما بأنفسهم والعدل أساس الحكم وللظلم نهاية وانتشار الفساد هو بداية سقوط الحكم.
- الاختلاف في الثورة.. لا يفسد للوطن فرحة.
-أول مرة فهمت بوضوح معنى إن الإنسان مسير ومخير فى نفس الوقت.
- إن الثورة حق لكل إنسان .. والتظاهر وسيلة مشروعة للتعبير وما ضاع حق وراءه مطالب.
- فسر لى معنى العبارة الشهيرة "في البداية يتجاهلونك، ثم يسخرون منك، ثم يحاربونك...ثم تنتصر" .
- إنه إذا الشعب يوما أراد الحياة .. فلابد أن يستجيب القدر.
- فهمت بجد يعنى إيه "مسلم مسيحى أيد واحدة".
- إن البلد ديه هتبقي محترمه بعد مبارك لأنها رجعت أم الدنيا و إني بحب مصر بجد مش مجرد شعارات.
- إن مصر مش مراة أبويا، لكن اللى كانوا حاكمينها هما اللى كانوا مكرهينى فيها ، ومخلينى فاكرة إنها مراة أبويا ، بس طلعت فى الآخر أمى .
- اتعلمت إن مفيش حد هيبقى فوق القانون بعد اانهاردة وانى لازم أثق فى الشعب وقوة إرادته و اننا نعتز بمصريتنا ونرفع راسنا فوق لأننا مصريين.
- إنى أقدر أغير من نفسي و أغير بلدى ومستقبلها للأحسن.و أننا نتمتع بقوة وملكات ربما لا نتخيل في أقصى أحلامنا جموحا أننا نملكها .
- إنى ابطل امشي جنب الحيط لأن اللى بيمشي جنب الحيط بيقع عليه .
- إن كل ما بتحس إن الدنيا اتقفلت في وشك خلاص ومالهاش حل ده بيبقى آخر مرحلة قبل وصول الحل .
- إن مفيش حاكم إلا من خيال محكوم وأن الحاكم مهما تجبر فهو ضعيف و الشعب مهما استكان فهو قدير.
- إن فى حاجة اسمها الوعى الجمعى المصرى أول مرة احس بيه و إن السياسة مش لازم تبقى لعبة قذرة وان الشعب المصرى ممكن يلعب سياسة كويس ويجيب جون.
- إني اكره الاستقرار .. و ازعزع الأمن .. و افسي عجلة الإنتاج عشان آخد حريتي.
- إنى أفكر فى مستقبل مصر ويكون عندى إيمان فى نفسي و فى كل اللى حواليه إننا نقدر نخلى بلدنا أحسن بلد فى الدنيا و أعرف معني الحريه بجد و قيمتها و أني مفرطش فيها تاني و أن مصر الدولة والشعب أقوى بكتير من مصر النظام .
- إنى أعرف يعني إيه وحدة الهدف رغم اختلاف الميول السياسية و الطبقية وانى مينفعش اتعاطف مع واحد قتل وسرق وعذب وانتهك كل حرمة .
- إني مسكتش علي الغلط تاني لأن مصر تستحق مننا أكثر مما يبذل فيها.
- إنى بفكر كل يوم من ساعة الثورة ازاى اخدم البلد و بقى فيه حدوتة جديدة احكيها لاولادى واحفادى حدوتة مصرية .
- الموت مش مخيف اوي كدا ومش مرعب مادام انت عندك دافع نبيل و دا بيخليك اقوي من اي حاجة.
- إن كل واحد فينا لازم يقتل مبارك اللى جواه وإن مصيرنا بإيدينا ودم المصريين مش رخيص.
- النظام ليس له فلول معينيين، بل لقد حوّل كثير من الشعب لفلول، عن طريق مسخهم فكريا، و قد كان ناجحا في ذلك.
- لما العالم كله اهتز لثورة مصر .. عرفت قد ايه مصر دي حاجة كبيرة اوي أوي .. بس اللي ماسكينها كانوا مضيعينها.
- إزاى احمى بيتى و اهلى بنفسى.
- إنك لو بتحب مصر تعمل كل اللى تقدرعليه عشان تخليها أحسن بلد فى الدنيا لأن حبك لوحده مش كفاية و إن التاريخ مش مجرد مادة بناخدها في المدرسة، لكن حاجة ممكن نصنعها بإيدينا.
- إن المصريين كلهم ممكن يكونوا مراسلين ومصورين لجميع القنوات الفضائية و ازاى وسط وبعد الضرب والنار والرصاص اقدر اضحك واهزر واحزن وافرح واخاف واعيش طبيعى .
- إننا نبات فأي جو برد حر مطر رعد برق .. بس ناخد حق بلدنا وحق شهدائنا .. ويكون الشارع احب عندنا من السرير واللحاف والراحة.
- إني ممكن أصبر عليك تلاتين سنة، لكن أقفش عليك قبل ما تكمل الست شهور اللي باقيين لك، عشان تبقى عبرة للعالم كله.
- إن الشعب يريد.. ويجب أن يُحترم وتتحقق مطالبه وارادته وإني مش لازم امتلك قوت يومي عشان امتلك حريتي .
- إن مبارك لما خيرنا بين الفوضى و الاستقرار إخترنا الاستقرار لأن حكمه هو الفوضى بعينها .
كما عبروا عن اكتشافهم لمعنى آخر للانتماء الحقيقي مستنكرين حالة الانتماء الزائف التى كان يخلقها النظام عبر صراعات كرة القدم فجاءت تعليقاتهم لتعبر عن الفخر بالعلم المصرى والانتماء لمصر :
- إن مصر مش مجرد منتخب كرة قدم وعلم مصر ليه أماكن تانية بيرفرف فيها غير استاد القاهرة.
- انى لأول مرة افكر اشترى علم للبلد اللى عايشه فيها و إنى أزعل لو شفته مبهدل ومقطع .
- إن الانتماء عمره ما كان ماتش كورة والناس بتحب مصر من غير ماتشات.
- إننا مش وطنيين وقت ماتش كورة بس ولا متدينين بس فى رمضان وصلاة الجمعة
وبطبيعة الحال لم تخل تعليقاتهم من الطرافة وخفة الدم التى اشتهر بها المصريون منذ بدء الثورة :
- التناحة سلاح فعال في وجه الحاكم البارد ، وإن اللي بياخد ابنه معاه الشغل بيروح السجن هو وابنه.
- إن العدالة ليها وجه واحد بس، موجود دلوقتي في طره لأن اللى بيسرق بيروح طره مش مارينا.
- إنه في حالات نادرة ممكن الطفل اللي عمره سنتين يتفطم على الريش.
- متلازمة ستوكهولم منتشرة بغباء فى مصر .
- غالي رخص و عز إتذل و شريف إتهان و سرور زعل و مبارك إتلعن.
- إن الحزب الوطني مكنش وطني خالص .
- إن مبارك بيسهر عادي مش بيحافظ على صحته ولا حاجة ... مش كل خطاباته كانت بعد نص الليل ، وكمان طلع ما عندوش فلوس ، ويستحق الصدقة.
- إن السواقة في وسط الدبابات مش صعبة أوي كدة زي ما كنت متخيل .
- ماكولش كتير عشان مدخلش حمام كتير لاني لو دخلت حمام هقف طول اليوم في الصف وعمر مكرم مش حيستحمل.
- إن مصطفى محمود لو كان عايش كان راح التحرير .
- إن كنتاكى من الثوار و الراعى الرسمى للثورة.
-اكتشفت ان صاحب نظرية "دفع عجلة الاستقرار" طلع عجلاتي ولذلك كان حريصا دوما علي "نفخنا ".
-إن البلطجي مش بس بمطوته البلطجي برعايته لشومته وسنجنته .
- إن كلمة إحنا آسفين دي لازم تتشال من قاموس اللغة.
- ان كل التوامر أوحش من بعض و إزاى اسم "تامر" ممكن يكون ليه تأثير سلبي وزي الزفت على صاحبه .
- إن حكومة شرف تكنوقراط و حكومة نظيف تكنوجاز.
-إن مصطفي محمود جلب العار علي حي المهندسن ومن الميادين ما قتل .
- البونبوني ممكن يوقع رئيس وزراء من منصبه .
- كل حد مش بيحبك او بيضايقك ممكن تعتبره ثورة مضادة.
- إن الشعب بقى عنده سي دي حتى لمرتضى منصور.
- عرفت يعنى ايه كلمة فلول و اكتشفت إن الجمل مش حيوان أليف.