خلال احتفالية "تحرير سيناء".. السيسى: الجيش حمى المصريين 18 شهرا.. وفؤاد يبكى قائلًا: "خلي بالك من مصر"

هتف الحضور المشاركون فى أوبريت حبيبى ياوطن، بعد كلمه ألقاها الفريق أول عبد الفتاح السيسى، القائد العام للقوات المسلحة، وجه خلالها التحية لصاحب فكرة احتفالية تحرير سيناء "جامعة المستقبل" وأعضاء هيئة التدريس.
ووجه السيسى التحية للإعلاميين الموجودين فى الحفل والكتاب، والفنانين والمثقفين، قائلا: "مش عاوز أنسى أقول لأهلى المسيحيين كل عام وأنتم بخير، وأنا عاوزكم توجهوا التحية لمصر".
وأضاف: "عاوز أقول كلمتين صغيرتين عن الجيش، الجيش المصرى، وطنى عظيم وشريف أوى وصلب أوى صلابته جايه من شرفه، لاتقلقوا أبدا على بلدكم مصر، وفرصة أقول أن المصريين لما أرادوا التغيير غيروا الدنيا كلها، لما جيش مصر نزل حماكم، وقعد 18 شهرا، إيده لم تمتد، خلوا بالكم من هذا الكلام جيدا، إحنا إيدينا تنقطع قبل ما تمسكم، من 3 أسابيع أقسمت قسم ياريت كلكم تكونوا سمعتوه، أنا قلته عشان كل مصرى قاعد فى بيته يكون مطمئن".
واستكمل السيسي قائلًا: "كان فيه 150 ألف جندى فى الشارع، احنا كنا نناضل من أجل عدم المساس بأى مصرى، ونحارب عشان لا يؤذي أى مصرى وعشان مصر تفضل مصر وهتفضل مصر، أنا مش هقدر أقول كلام جميل زى اللى قلتوه كلكم".
وبكى الفنان محمد فؤاد وقال للفريق أول السيسى: "خلى بالك من مصر يافندم"، وكذلك الفنانة آمال ماهر.
وقال السيسى: "الضباط اللى انتو شايفنهم دول والطلبة.. الدم اللى فى عروقهم بيحب مصر، ونحن لاننسى ولن ننسى شهداء رفح، لازم يكون عندنا أمل وثقة كبيرة فى بكرة، وبكرة تشوفوا مصر وهيا أم الدنيا وهتبقى أد الدنيا، وكل عام وأنتم بخير".
وفى نهاية الحفل هتف المشاركين فى الحفل هتف: "خلى السلاح صاحى صاحى".