"عيد مبارك بدون مبارك" و"عيد لطيف من غير نظيف"..أجواء الثورة تطغى على رسائل العيد

جاء عيد الفطر هذا العام مختلفا، فهو أول عيد يمر على مصر بعد الثورة، وأول عيد مبارك دون وجود مبارك ونظامه ، وقد تأثر المصريون بشدة بأجواء الثورة التى انعكست على رسائلهم المتبادلة فيما بينهم للتهنئة بالعيد هذا العام، وعلى مواقع التواصل الاجتماعى ابتدع المصريون رسائل للتهنئة بالعيد ساخرين من تصادف اقتران التهنئة بالعيد باسم رئيسهم السابق مبارك، وكأن هذا إلزاما أن يقترن العيد باسم الرئيس الذى يحكم مصر معلنين التمرد على تلك الصيغة الثابتة، مؤكدين أن العيد سيكون دوما مبارك لكن دون مبارك الرئيس السابق .
كما اندفعت تعليقاتهم الساخرة حول التهنئة بالعيد هذا العام والتى جاءت مختلفة بكل تأكيد عن كل عام ومن أمثلة تلك التهانى :
- بعد ما كنا بنقول عيد مبارك .. خلعنا مبارك والعيد السنة دى عيد طنطاوى عليكوا إن شاء الله
- طيب هو حكم المحكمة بعدم إزالة اسم مبارك ينطبق على العيد برضه؟ يعني هيبقى عيد مبارك زى كل سنة ولا هنخلع عنه الصفة دى السنة دى ؟
- واحد صاحبي بيقولي عيد سعيد قلت له مفيش مرشح رئاسة اسمه سعيد
- المشكلة إنهم عودوا الناس على عيد مبارك مع أنه عمره ما كان مبارك....لازم بقى الناس تتعود على عيد سعيد قبل ما يبقى عيد (........) الله أعلم الرئيس الجاى اسمه إيه
- مصر اليوم في عيد و مبارك في الحديد، هو مش حديد قوي بس مش مشكلة، خلينا نعيد
- عزيزي البوعزيزي، لا أعلم إن كنت تعلم ماذا فعل العرب من بعدك! كل عام وأنت بخير، هذا عيد البوعزيزي بحق
- عيد ثورى سعيد عليكم جميعا ..كل عام وأنتم بخير
- الشعب المصري يهنئ كلمة عيد بتحريرها من اختطاف مبارك لها طيلة ثلاثين عاما كل سنة وإنتو طيبين
- كل عيد وإحنا طيبين، مسلمين ومسيحيين وفي بلدنا مرتاحين و نشوف اللي قتلوا الشهداء متعلقين، وإن شاء الله علي كل واحد ظلمنا منتصرين. يارب
- عيد مبارك بدون مبارك، عيد لطيف من غير نظيف، عيد الأمل والأمال بدون جمال، عيد بالنور من غير سرور، عيد بط ووز من غير عز، عيد هنا وروقان بدون سوزان .
- عيد مبارك من غير مبارك. عيد نظيف من غير نظيف.عيد سرور من غير سرور. عيد شريف من غير الشريف.كل سنة واحنا طيبين من غير حرامية وكدابين ومطبعين.
- كل عام وأنتم بخير كل عيد وأنتم طيبين ..الشعب المصرى أعلن حظر كلمة عيد (مبارك) من الآن فصاعدا واستبدالها بعيد سعيد، إلا إن كان فيه حاكم ظالم اسمه سعيد
- كل عام وأنتم بخير عيد انتقالى خالد سعيد
- عمرو مصطفى: الناس كلها بتقول عيد سعيد !! عايز تقولِّى إن الرئيس اللى جاى اسمه "سعيد"! إنت بتلاعبنى فى الأعياد!!
اعرف انتماء اللى بيهنيك بالعيد من رسالته: الثوار: مفيش عيد حصري العيد بقى لكل مصري0 0الاشتراكيون: عيدكم عدالة اجتماعية، الإسلاميون: تقبل الله منا ومنكم صالح الأعمال 0 الليبراليون: عيدكم حرية غير المسيسين: عيد سعيد الفلول: عيد مبارك.
- كل سنة وأنتم طيبيين وعيدكم "عيد خالد سعيد"
- السنة اللي طلع فيها رئيسك حرامي ونصاب القرن شريف .. كان لازم نقولك عيدك ريان.
- مبارك بيهنيك بالعيد وبيقولك: أيها الأخوة والأخوات لقد جاءنا العيد وبلاش رخامة بقي .. شرم وحشتني.
- العيد السنة دى مختلف مبارك مش هيصلى فى شرم كالعادة .. عيدكم خالد سعيد بدون مبارك.