حدوتة ل «بُكرة»

ماما حدوتة كانت جايَّه بالشيكولاتة و العصافير الخضرا الطايرة برّه قفصها كانت جايبة للبنوتة الشاطرة عروسة بتقول ماما ف تونِّسها و مع اللعْب بتمشي معاها
ناحية بكره اللي هيحرسها
والهوا بيطيّر ضفايرها
تجري و تضحك
و نقول طيب إحدفي سُكَّر
تضحك أكتر
تتلوّن شرايطها البيضا
لون فُسْتان الحلم الوردي
يحضنها بستانُه الأخضر
تحضن هيّا كمان عروستها
و تلبِّسها .. من قصاقيصها
و امّا تبوسها ماما تبوسها
و يونِّسها حضن ل بابا بيحسسها
إن براح الحضن أمااان
قد الدنيا
و لِعَب تانيه معاها كمان
للصبيان فرسان وآمالهم
راكبة فرسها
ب لجام شادَُه الكف النونو
و عمرُه ما يسهَا
و إن غمَّض ع الحلم جفونه
بيحوِّش لُه الفجر الضي
و امّا الشمس تبوس لُه جبينُه
يفتح عينُه وْ
كسلُه بيصحا ب دُش نهارُه
ياكل كل فطارُه
و”هُبَّا” على مدرستُه
يكتب .. طَ لَ عَ الصبح ُ و نادى
علماً يتوضأُ بعبادة
على كراستُه
حروفه الخمسه
بتكوّن لُه الكلمة إرادة
و يصلي صلواتُه الخمسة
بالفاتحة
وسورة الإخلاص
ماما حدوتة باقي لْها شويَّه
و هتتأخّر ..
لكن جايَّه