من قصيدة (الرحمة)

يقيننا بالله هجّ فين؟ وإزاي بنقرا «الزلزلة» و«الرعد» وبنرجف من الشياطين على هيئة بشر ودموعنا لو نقرا «الزمر»
تغرق ف يأس يذلَّها
وننسى بعد ما نقرا «فاطر»
«مَا يَفْتَحِ اللَّهُ لِلنَّاسِ مِن رَّحْمَةٍ فَلَا مُمْسِكَ لَهَا»
يا أهلها ..ياللي نسيتوا شكلها
ولألف شكل وألف لون ..
اتْفرتطُّوا بعشوائية ف حجرها
اللي مشُوا ف سكة سراب
واللي اختشوا حد الغياب ..
واللي انتشوا حد الغباء
واللي ارتشوا:
من سيجارة ل عُمرة ل مضادات حَياء
وبكَتْمةْ ال لأ طول سنين
صرختوا شبكت لأ ف باء و بقت بلاء
يا أهلها ..
المبدروين على جسمها
وبتنهشوا
وقلوبكو شتى
اتمرمغوا ف حصار صراخ:
م اليَمَايْنة للشمالْنة
لاْقوى حزب ف مصر: «معلش ... احنا مالنا ،
اللي يكسب منّكو يبقى يناديلنا»
واللي بينهم زحمة فاضية
تشتهى أبسط حقوق النفْس: حريَّه وْرغيف
وثورة راضية بالوَنَس
من نبضتين لإيمان ضعيف
منظر مخيف
للضلمة لما بيتولد فيها الشروق
وبتوئدُه.. و ان عدّى ضوء
نيِّة صلاة الخوف تكلْبِش في العروق
«الله أكبر» ... بَعْدها دم الأمان
طرطش..
فسد تاني الوضوء..