مخاوف مركبة!

- الحقيني يا ام السعد... هاموت يا ناس... - احنا اصطبحنا بوش مين النهاردة...( شرارة ؟) بقالي30 سنة داية وماشفتش ولادة بالشكل ده ابدا..
العيل متكعور ونازل برجله الشمال
- يعني ايه... ام العيال هاتروح مني ؟
يغور اللي في بطنها.. بهية بتنزف.. انا هاتصل بالاسعاف تاخدها المستشفي..
( في المستشفي.. الام تصرخ علي النقالة والجميع مهرولا بجوارها)
- الام: غيتوني يا هوووه... مش قادرة اخد نفسي ولا عدت شايفة قدامي... وصيتك العيال يا محمد
- الزوج: فداكي الف عيل.. و تعيشي يا غالية
- الممرضة: اطمنوا يا جماعة مفيش خطر..( دي الام المخاض العادية في كل ولادة) بس لازم الست تدخل العمليات حالا
- هاتعملولها عملية قيصرية ؟
- لا... ده كان زمان حضرتك.. احنا هانعملها( عملية ديمقراطية)
- يعني ايه يا نيرس ؟ فهميني الله لا يسيئك ؟
- مراتك يا استاذ ولادتها متعسرة.. والعيل مقلوب علي وشه.. والست بتنزف وجسمها بيتصفي واحتمال كبير تروح فيها.. بس مش عيزاك تقلق خااااالص.. كل دي( ارهاصات عادية لعملية المخاض والولادة الديمقراطية).. اه والنعمة الشريفة
- و مين اللي هايعمل لها العملية الصعبة دي ؟
- الدكتورة با كينام..
- ودي شاطرة دي ؟ انا اول مرة اسمع عنها..
- انت بتقول ايه يا حضرة.. دكتورة باكينام اسم الله عليها تخصص في( تبديد المخاوف المركبة) واخدة الدكتوراه من امريكا
- من امريكا ؟!!
- كل الدكاترة بتوعنا( متدكترين) في امريكا بالذات.. ارجوك بقي.., سيبنا ندخل العمليات ونشوف شغلنا
-( في حجرة العمليات.. السيدة ما زالت تصرخ من الالم و كل من حولها في يده مشرط و مقص)
- اين دكتور التخدير ؟
- في الخزنة بيعد الفلوس وبيتأكد ان الحالة دفعت المعلوم كاش ومقدم ومن اللحم الحي
- اين الدكتور الجراح ؟
- اتكلم في التليفون واعتذر.. بيقول انه مضرب عن العمل بسبب ازمة السولار.. اصله عنده فرن واهله كلهم سواقين ميكروباص وحالهم واقف
- باكينام في عصبية: دي مش طريقة شغل ابدا.. وانا اللي سايبة العقيقة بتاعة ابن اخويا.. وجاية ؟ انتم عارفين العقيقة دي كان فيها كام خروف ؟؟؟
-الدكتور الاحتياطي: ما تعصبيش نفسك يا بيكي.. الواد( اجينست) ومش راضي ينزل.. انا شايفه في( الحالة المزنوقة) اللي هو فيها, ومش عارف اعمل حاجة.. حد يمليني.. حد يرشدني
-( تنقطع الكهرباء فجأة فتتوقف الاجهزة ويعم الظلام)
تخرج ام ايمن الممرضة بسرعة..
يسألها الملهوفين عند باب العمليات: خير طمنينا..
تجيبهم في برود: الحمد لله العملية الديمقراطية نجحت, بس العيل متخلف ومشوه و الدكتور قص شرايين ايديه
و الست قاطعة النفس ولسة مش عارفين( مين الحقير.. اللي طفي النور) ؟؟؟