وقفة تضامنية لأبناء الدقهلية مع الضباط المحالين للنيابة العسكرية

نظم اكثر من‏500‏ مواطن من ابناء مركز الكردي التابع لمحافظة الدقهلية وقفه تضامنية صباح امس مع الضباط المحالين للنيابة العسكرية في وقفة تعذيب بعض المتهمين بالبلطجة‏,‏ وهي الوقفة التي انتشرت علي المواقع الالكترونية وتظهر عددا من ضباط الجيش والشرطة وهم يتعاملون بعنف مع المتهمين‏.‏ وقالت اماني عوض إعلامية ومن اهالي برمبال ان اهالي الشهداء يئنون من كل مايقوم به البلطجية, والبلد تعرف هؤلاء البلطجية جيدا وكثيرا ماشكونا منهم ومن فجرهم وكانت الفرحة عارمة عندما تم القبض عليهم وقام الاهالي بالتهليل لحظة القاء القبض عليهم كما زغردت النساء.
واضافت: هو فين التعذيب اللي حصل دول مش حقوق انسان دول حقوق بلطجية كانوا فين لما الناس الغلابة اتسرقوا واتقتلوا
اما والدة الشهيد احمد الزقرد: فقالت ليه ابني يتقتل وليه يحرموني منه هل يكون الحل ان البلطجية ينزلوا الشوارع ونسيب البلطجية هما اللي ينزلوا ويحكموا البلد وتبقي مصر كده انتهت.
وتضيف: البلطجية دول معاهم سلاح وبيسرقوا العربيات ويقتلوا اولادنا وبيغتصبوا بناتنا كانت فين حقوق الانسان من يوم7/20 لما حدثت واقعة مقتل ابني العريس ليه مش جايين يتكلموا الا دلوقتي ليه انا مش عاوزه قانون الطواريء يتشال خايفين من قانون الطواريء ليه؟.
ويقول كرم عبدالمنعم( تاجر): انا عاوز اقول للمشير بعد اللي شفناه وبيحصل ليه الضابط اللي بيحمينا يتعاقب بدل مايكافأ وهيبقي مين اللي هيحمينا لما الضابط يتعاقب مينفعشي الضابط يتهان وهو صمام الامان انا عندي محل قطع غيار وكل يوم اللي شغالين عندي بيتسرقوا لان البلطجية بيقطعوا الطريق.
ويضيف محمد الجميل( سائق): مش عاوزين الضباط يتحاكموا دول بيحمونا انا اتسرق مني عربية واتحط السلاح علي رقبتي.
السعيد صبري: اناعايز اسأل سؤال لما احاكم الضابط اللي بيأمنا في الشارع مين اللي هيأمنا بعد كده واناعاوز اسأل عمرو اديب ومني الشاذلي وبتوع برامج التوك شو لما بريطانيا حصل فيها مظاهرات وضربوا الشرطة البلد اللي حصل فيها كده الشرطة قفلتها وهذه بريطانيا بلد الحرية بلد حقوق الانسان هي حقوق الانسان اللي هجيبلي حقي من البلطجي لما يقتلني ويسرقني ويغتصب بنتي ؟!