بعد "فرح ويزو".. البنات على "فيس بوك": "المقلبظة بتتجوز وزي القمر نخس ليه" (صور)

احتفلت نجمة مسرح مصر، الفنانة ويزو، بزفافها على زوجها شريف محمد حسنى، مساء أمس، وسط حضور جماهيري من نجوم الفن، على رأسهم زملائها في المسرح.
بعد دقائق من بدء حفلة الزفاف، تصدر هشتاج "ويزو" موقع التواصل الاجتماعي "تويتر"، مع عبارات التهنئة ومباركة الزواج للعروسين.
في الوقت الذي دشن مستخدمي "تويتر" هشتاج التهنئة، نشر العديد من مستخدمي "فيس بوك" صور وفيديوهات من حفلة الزفاف، فعلقت شيرين "نخس ليه بقى لما ويزو اتجوزت وهي قلبوظة وزي القمر في الفستان".
تنوعت التعليقات، بين التهنئة والسخرية من وزن بطلة مسرح مصر، في الوقت الذي دافع فيه عدد من محبيها عن فستانها ومظهرها، فقال نبيل "ياريت ندعيلهم بالسعادة والذريه الصالحه مش نمسك على فستان وجسمها دع الخلق للخالق وألف مبرووك وربنا يهنيها ويسعدها وهيه إنسانه بشوشه وجميلة".
جسد وزيو وقصة زواجها، جعلها مثال يحتذى به كل من يرغب في الزواج، فقالت شمس أصيل "ربنا يسعدها ويفرحها هو دا الإنسان اللي فعلًا يتسند عليه لو واحد غيره كان قال لا دي ضخمه لكن هو طلع ابن ناس ربنا يسعدهم وكفايه إنه مفكرتش في الشكل".
نالت نجمة مسروح مصر، جزءً من الانتقادات التي تركزت على ستايل فستان الفرح، فقالت دينا علي: "ألف مبروك طبعًا بس بصراحة موديل الفستان مش لايق على جسمها خالص كانت عايزة فستان سيمبل وسك عشان مايبينش جسمها اتخن ماهي يعني منفوشة والفستان كمان منفوش والعريس منفوش ضيقوا القاعة على المعازيم".
في الوقت الذي انتشرت فيه الانتقادات، ظهر إعجاب العديد من مستخدمي "فيس بوك" لملابس زفاف ويزو، فقالت زهرة إبراهيم "ألف ألف مبروك يا ويزو أنا بحبك جدًا، ومش هنسى يوم أنك رسمتي على وشي ضحكة وسط ما أنا كنت زعلانة أوي بجد ربنا يفرحك ويرزقك حياة سعيده".
وأضافت: "حبيبتي ربنا يفرح قلبك إنتي أموره أوى في الفستان وبجد جميل عليكي وملكيش دعوة باي حد يقول حاجه على شكلك عشان دى خلقة ربنا حبيبتي وإن ده مصدر شهرتك ونجوميتك أصلًا وعسى أن تكرهوا شيئًا وهو خيرًا لكم حبيبتي".
كما علقت هبة: "ألف مبروك فستانك حلو أشيك من فستان سمية الخشاب ربنا يسعدك"، في الوقت الذي علقت فيه سالي "اختار اللي يحبك زي ما إنتي، مقالش لها خسي ولا شكلك مش حلو كده.. اللي بيحب بجد هياخدك زي ما إنتي لأنك بتبقي حلوه في قلبه قبل عينه".