للسيدات فقط.. 9 نصائح سرية لإسعاد زوجك بعد موجة الغلاء

يقول أحد الرجال: «مراتي مش مقدرة الظروف الي احنا فيها، وإن اللي كنت بجيبه زمان بجنيه دلوقتي ممكن أجيبه ب10 جنيه، الأسعار ولعت، والمرتب لسه زي ماهو، ومراتي كمان ضاغظه عليا، وبتطلب طلبات هتجنني»، حيث عبر عن احساسه وكتير من الأزواج الشباب بعدم تقدير الزوجات لحجم المعاناة التي بيواجهها الرجال في توفير نفقات البيت.
وعشان فعلا في ارتفاع كبير للأسعار، أدى لضغط كبير على كتير من الأزواج الشباب، لازم الزوجة يكون ليها دور وتخفف عنه شويه.. طيب ده يتم إزاي؟ استشاري العلاقات الأسرية، ومدربة الأنوثة نور البكري، هتقدملك في التقرير نصائح عملية للزوجة تقدر من خلالها تحتوي جوزها في الأيام دي.
متقليش.. كفاية كيلو
الظروف صعبة، والأسعار غالية، بلاش تروحي تتقلي عليه في طلبات البيت، لو لقتيه مش قادر يجيب طلبات البيت زي الأول متلحيش، ولو لقتيه جابها، وفري منها، يعني مثلا اللحمة والفراخ، طبعا أسعارهم بقت نار، فلو هو متعود يجيب 2 كيلو لحمة في الشهر، قوليله، كفاية كيلو واحد، ولو جه على نفسه، وجاب 2، وفري الكيلو التاني للشهر الجاي، وكده انتي وفرتي للشهر الجاي فلوس اللحم، وهكذا، بلاش تطلبي منه لبس العيال في أول الموسم، استني في التصفيات، وهاتي الي عاوزاه.
اتعلمي التوفير
لو بتاخدي مصروف بيت 500 جنيه ولا ألف جنيه في الشهر اتعلمي تمشي نفسك بيه، لأخر الشهر.. يعني هاتي الحاجات الأساسية بس، واعملي الأكل على أد الوجبات، واللي يفيض اعملي منه وجبه تانية، وهكذا، بلاش تستهلكي كهرباء كتير، هي مش ناقصة.. وكمان الهدوم اشتروا اللازم بس.
مصروف الأولاد
علمي ولادك إن «القرش الأبيض ينفع في اليوم الأسود»، يعني علميهم يوفروا من مصروفهم، ويجيبوا حاجة واحدة، أو حاجتين بالكتير، ويشيلو ربع المصروف، ويحوشوه.. كده انتي هتخخفي عليكم، خصوصا لو يوم مش هتقدري تديهم مصروف.
الأكل اللي بره
طبعا جوزك بيقعد طول اليوم بره، واكيد هيضطر ياكل وجبة أو اتنين بره البيت، يعني تقريبا ممكن يصرف من 10 ل40 جنيه يوميا، وعشان الفلوس دي انتو أولى بيها، اعرضي عليه انك تعمليلو أكل، ياخده معاه في «اللانش بوكس».. ولو مكان شغله في ميكرويف، حطيله وجبة حلوة كده، وقدميهاله، ونفس الكلام للأطفال.
بلاش الكلام ده
الأسعار غالية على الكل، وطبيعي تلاقي الرجل مقصر شوية في طلبات البيت، خصوصا الحاجات الفرعية زي الفاكهة، والعصاير، أو حتى الوجبات الجاهزة، لأنه بيحاول يجيب الحاجات الأساسية، اللي زادت الضعف، فتقصيره دا غصب عنه، عشان كده متجيش تقولي :«انت مبقتش تجيب فاكهة زي الأول»، أو «احنا عاوزين اكل جاهز زي زمان».. كل الكلام اللي زي ده بيزود عليه الضغط، وبيحس أنه عاجز. وأحسن حاجة في الظروف اللي احنا فيها دي، أنه لو جاب حاجة حتى لو بسيطة، تنهالي عليه بعبارات المدح، والثناء، زي: «ربنا يخليك لينا يارب»، و«تعيش وتجيبلنا يا حبيبي»، وتعملي جو مبهج في البيت بسبب الحاجات الي هو جابها دي، دا هيفرق معاه اوي.
قولي الكلام ده
استشاري العلاقات الأسرية، بتقولك في الوقت اللي هتلاقي جوزك متضايق، وقاعد يشكيلك من ارتفاع الاسعار، والغلاء، اوعي تقوليله: «اه الاسعار بقت نار، هنعمل ايه، هنصرف منين، دا حاجة متعبه»، بلاش تردي كلام الشيطان، لأن ربنا قال : «الشَّيْطَانُ يَعِدُكُمُ الْفَقْرَ وَيَأْمُرُكُمْ بِالْفَحْشَاءِ وَاللَّهُ يَعِدُكُمْ مَغْفِرَةً مِنْهُ وَفَضْلا"،.
خدي بالك هنا انتي كده بتزوديها عليه، وبتقللي ثقته في نفسه، وبيتعبه، لأنه بيشتكيلك عشان تخففي عنه، مش تزوديها، فبدل ما تقوليله له :«اه الاسعار بقت نار»، قولي له:«مش مهم وإيه يعني، دا رزق، والرزق بتاع ربنا، وممكن 100 جنيه وفيهم بركة ربنا أحسن من ميه ألف جنيه من غير البركة، ممكن يتصرفوا ومنحسش بيهم، سيبها على الله ومتشلش هم»، مع طبطبة، ولمسة فيها حب كده، هتخففي عنه كتير، وهيحس أنك مقدراه، وأنه قادر يرمي حموله عليكي.
التحفيز كده
طبيعي جدا، في الوقت اللي الأسعار فيه بتعلى، والمرتب هو هو، تلاقي جوزك، مالوش مزاج يشتغل، او مش حابب، هنا بقى عليكي وعلى التشجيع، شجعيه، وحسسيه أنه مفيش زيه، وأنه مجتهد، وقوليله: «اشتغل انت واجتهد، وسيبها على ربنا»، و«اجتهد انت وربنا مش هيضيع اجتهادك».. م الآخر حاولي تديلو ثقة في إمكانياته وقدراته، وأنه قادر يواجه أي ظروف، ولو الوضع محتاج أنه يشتغل في وظيفة تانيه، اقترحي عليه، بس من غير ما يحس أنه لازم يعمل دا.
بلاش تطوع
كتير من الستات لما تلاقي جوزها مقصر، تحاول هي تتطوع، وتصرف، أو تشتغل عشان تصرف في البيت، وهنا التطوع دا ممكن يعمل مشاكل، في رجاله التصرف دا يعتبر إهانة بالنسبة لهم، وتأكيد على عجزهم.
ده بخلاف أنه أحيانا ممكن يخلي الزوج رجل اعتمادي، لما يلاقي مراته بتصرف هي، هيكبر دماغه، ويعتمد عليها في كل حاجة، ويخليها هي تصرف، وبعد كده الي كانت بتعمله تطوع، هتعمله بالاجبار.
في الوقت ده ابعدي
ممكن تلاقي جوزك راجع من الشغل مش طايق نفسه، وقرفان، ومتعصب على الآخر اوعي تيجي جمبه، لو لقتيه بيزعق لك، ابعدي، واوعي تردي، ومتزعليش.. يعني مثلا ميبقاش جاي من بره يقول «هو الأكل لسه مجهزش، انتو مش مقدرين انا تعبان ازاي، وطالع عيني»، هنا اوعي تقولي :«يوو مانا كمان تعبانه، وطول اليوم في المطبخ، انت متصلتش ليه تقول انك جاي عشان اعمل حسابي، انت مش حايي بيا، انت اناني».
في الحالة دي، استشاري العلاقات الأسرية، بتقول: «هنا أنتي حولتي اللحظة دي لخناقة هتكبر منك، والراجل هيطلع غله كله فيكي، عشان كده الاحسن انك تقولي :حالا اهو بس غير هدومك وصلي، وهتلاقي الأكل جاهز في ثواني، بس استنى اعملك حاجة تشربها، أو قدميله أي عصير سريع»..عارفة لما تعملي كده، انتي بتكوني احتوتيه، وكده هتلاقيه هدي مع نفسه، وقعد يقولك هو متضايق من إيه.