ندى: سرقت زوجي بحجة الصداقة.. وعاشت معي في بيت العائلة

"أنا متزوجه من 8 سنوات وكان زواج صالونات، أحببت زوجي حبا لا يوصف بعد الزواج وتوالت المشاكل في حياتي وكنت بحاول أتغاضى عن أي مشكلة ورزقني الله بطفل ومع ذلك كنت أحمد الله كثيرا وبعد مرور كام شهر على ولادة إبنى دخلت امرأه في حياتي، أنا وزوجى وتقربت مني على أساس إنها صديقة وحبيبة وبعد فترة مش طويلة بدأ زوجي في الخيانة هو وهي تليفونات وخروجات وغيره".
وتضيف ندى ب"حسرة"، قائلة:" كنت أشعر بما يحدث، واجهتهما وأنكرا وأزدادت المشاكل اكثر من الأول وأزدادت الإهانات والضرب حتى يوم أسود لا انساه، ضربنى ضرب مبرح وعينى الشمال كانت على وشك أن لا أرى مرة أخرى بها وقعدت 40 يوم أعالجها حتى أراده الله أن أرى بها مرة أخرى واترميت عند أمي هذه الفترة من غير إبني، طردني من البيت وأخد إبنى منى، وبعد مرور شهر تزوج من هذه السيدة والمأذون بعت إعلان بأنة تزوج، وكانت صدمة الله لا يوريها لأحد وبعد مرور 10 أيام على الزواج طلب من أهلي ومني أن أرجع وانا كنت طالبة الطلاق، قال مش هطلق انا عاوزها وبعد مشاورات قررت إنى ارجع عشان خاطر ابنى كان وحشنى ونفسى اشوفة وفعلا رجعت وحاولت اعيش ولكننى فشلت مش عارفة اتعامل معه ولا قادرة انسا اللى حصل ومرة ايام كنت ابكى وادعو الله بان ياخذ روحى أو يصبرنى على الذى ما ليا طاقة للوضع الصعب دا حتى تقبل الله دعائى وقدرت انسى واعيش واتعامل عادى انا كنت فى مكان وهى فى مكان تانى حتى قال فى ذات يوم انا هجيبها تقعد معانا فى نفس البيت لأنه بيت عائلة كل واحد فى شقتة وفعلا حدث وجاءت ورجعت المشاكل تانى بس اكثر من الأول وانا بحاول بقدر الامكان اعيش واتعامل معها معاملة حسنة يعنى ممكن لو شوفتها تعبانة وعاوزة حاجة اعملها اغسل او اطبخ او انظف او اخرج اشترى لها حاجة وطبعا كل ما حد يسمع الكلام دا بيقول انتى اكيد مجنونة أو دماغك مش طبيعية وهى بالرغم من كل دا ممكن تغلط وتشتم وتتخانق بس انا بعامل ربنا، وزوجي كثيرا قال بلاش تعمللها حاجة انا دلوقتى معايا 3 اولاد وزوجي سافر برة مصر من شهرين وهييجى بعد 3 سنوات هي دلوقتى لازم تتشاجر معايا او تغلط او تجر شكلى وانا بعمل ودن من طين وودن من عجين عشان خاطر زوجي والله اكبر كدابة لدرجة لا توصف ويمكن تمسك المصحف كل شوية تحلف كدب عليه انا محتارة اعمل ايه انا تعبت، بس مش عارفة اطلب الطلاق عشان ارتاح ولا استحمل 3 سنوات لما يخلص شغلة ويجى وهى على طول بتقول عليه انا ما عنديش دم عشان زوجي اتجوز وانا رجعت وعشت معه انا صح عشان عايش وبستحمل عشان اربى عيالى ولا انا غلط طيب والست دى اعمل اية معها".
هذه كانت استغاثة ندى، لاستشاري العلاقات الأسرية أسماء حفظي.
وأجابت أسماء حفظي،:" انتى اتصرفتي صح وزوجك ندمان لكن مش قادر يقول كده وهى حاسة قد ايه هي مش كويسة وانسانة سيئة وده سبب غضبها وتصرفاتها معاكى، لأنك قوية وقادرة تتحكمى فى حياتك وتتقبلى الامور بصدر رحب فى حين إنها عاجزة وحاسة بخوف وتهديد لأنها فى موقف ضعف ولإنها حاسة بفارق كبير بينكم وده موترها، مش دايما بيكون صح نبر الناس هى محتاجه تسيبيها شوية وتبعدى عنها علشان تقدر تستوعب الموقف واللى بيحصل من غير ما تضغط عليها تصرفاتك الجميلة وتحسسها إن عمرها ما تقدر تواكبها وتواكب شخصيتك الجميلة، هى لما تكون لوحدها هتقدر تتحكم فى افعالها اكتر ولو محصلش يبقى بعيد عنك تماما وهى فى حالها وانتى فى حالك ولو صادفتكم ظروف انتى هتحسنى اليها وزوجك لما يرجع هيحصل جديد خليكى انتى دايما بعيد هو عرف وفهم انه اتصرف غلط، ويمكن اوى يقولك الكلام ده خصوصا لما الاحتكاك بينك وبينها يكون اقل، بحييكى على شخصيتك النقية الراضية ".