أحمد فتوح: دفعت 12 مليون في دية أهل المتوفى بحادث الساحل.. وزميل لي شمت فيا ومش مسامحه

فتح أحمد فتوح، نجم نادي الزمالك، قلبه للحديث عن أزمته الأخيرة في حادث الساحل الشمالي، وتراجع نتائج فريقه هذا الموسم، مؤكدًا أن كل ما مر به طبيعي، ويمكن أن يحدث لأي نادٍ كبير، مثل مانشستر سيتي، مشددًا على أن الزمالك سيعود أقوى.
وقال فتوح خلال ظهوره مع الإعلامية ياسمين عز في برنامج "كلام الناس" على قناة "MBC مصر": "طبيعي أي فريق يقع موسم أو اتنين، ده حصل مع مانشستر سيتي، والزمالك فريق كبير وراجع تاني، وأنا بوعد جماهير الزمالك إننا هنرجع ننافس على كل البطولات السنة الجاية".
وأضاف: "جماهير الزمالك أكيد زعلانة، ومن حقهم يزعلوا، لكن مفيش أزمات كبيرة جوه النادي، وحققنا في السنين اللي فاتت بطولتين دوري وكأس، والمستحقات مش سبب التراجع، الأداء في الملعب ليه علاقة بالحظ أكتر من أي حاجة تانية".
وتابع: "حديثي عن المستحقات دايمًا بييجي بعد الماتشات، لكن الحقيقة إني كنت بعاني ماديًا وقت تجديدي، وده أثر عليّ. بصرف كتير وبحب العربيات، كنت بغير كتير وكان عندي 4 عربيات، دلوقتي معايا واحدة بس".
أما عن أزمته الأخيرة، فقال: "في حادث الساحل، أهل المتوفي طلبوا 25 مليون جنيه، والرقم كان صعب جدًا عليّ، لكن دفعت 12 مليون من غير ما يساعدني أي رجل أعمال. ناس قالت الزمالك ما وقفش معايا، بس الأزمة شخصية ومش لازم النادي يدخل فيها".
واستطرد: "أكتر حاجة ضايقتني في الأزمة دي، إن كان في واحد جوه الزمالك شمت فيا، ومش مسامحه، مع إنه كان ممكن يعمل حاجات كتير وما عملش، مش عارف كان خايف ولا فرحان، لكن اللي عمله صاحبي وجاي يبرر، أنا بتعامل معاه في التمرين عادي، بس مستحيل نرجع أصحاب تاني".
وأوضح فتوح أن شيكابالا وزيزو ومصطفى الزناري من أكتر اللاعيبة الذين وقفوا بجانبه، وقال: "زيزو أخ وصاحب، وقف جنبي جدًا، وده مش غريب عليه".
واختتم نجم الزمالك تصريحاته قائلًا: "طارق السيد دايمًا بينصحني بالجواز، بس أنا رافض الفكرة حاليًا، بحب أقعد لوحدي، وصوتي من دماغي".