كزبرة يرد على محمد رمضان: بيتنسبلي كلام مقلتوش وعايز أبقى إنسان طيب

ردَّ الفنان كزبرة على حالة الجدل التي أثيرت مؤخرًا بعد سؤال الفنان محمد رمضان عن تصريحات نُسبت إلى الفنان كزبرة، والتي قال فيها عن خلافهما: 'حبيبي لو زعلان البحر هناك مليان'، ليرد رمضان قائلاً: 'أرد أقول إيه؟ هو إحنا في محل عطارة؟'.
وكتب كزبرة عبر حسابه الشخصي بموقع تبادل الصور والفيديوهات الشهير إنستجرام: 'والله يا جماعة، الكلام ده نفسي أقوله من زمان، بس حاسس إن ده وقته. أنا مش عارف ليه كل ما أنجح في ناس بتحاول تطلع صورتي وحشة. أنا بجد نفسيًّا مبقتش قادر، وبقالي فترة كبيرة كل ما أعمل حاجة حلوة مبقتش عارف أتبسط بيها. ونفسيًّا مش أحسن حاجة وربنا اللي عالم.
الواحد كل اللي يهمه إنه يقدم حاجة تعجبكم وتسعدكم، بس في ناس بتتعامل مع اللي بيقدم حاجة كوميدية على أساس إنه شخص تافه ومش موهوب. والواحد عشان بيتعامل بطبيعته ومش بيتصنع، بتحاولوا تشوفوا إزاي تطلعوا فيه عيب قدام جمهوره وأخواته اللي بيحبوه، زي إن يتنسبلي كلام مقولتوش أو يتقلل مني بحاجات قديمة عملتها. وأحيانًا بتوصل للتريقة على اسمي. بمجرد ما بعمل حاجة حلوة وتعجبهم، أنا مش عارف ليه'.
كزبرة وتابع: 'وده السبب اللي بيخلي إنسان طيب، أول ما ينجح، يتحول لإنسان عنده نقص، وعنده حرب مع كل اللي حواليه، زي ناس كتير نجحت وبقوا بيتعاملوا بنرجسية عشان يعرفوا يتعاملوا مع الواقع. فأنا يا جماعة مش عايز أوصل للمرحلة دي، أنا عايز أكون إنسان طيب وفي حالي، وأشتغل على نفسي وأقدّم لكم فنًّا يعجبكم ويبسطكم. هو ده هدفي، فبلاش تتعاملوا مع الواحد بأسلوب هو مش بيحبه. شكرًا لكل واحد بيدعمني من قلبه، وأي حد بيحب اللي بقدّمه أو حتى بينتقده بأسلوب كويس. أنتم اللي تهموني. شكرًا'.