إيه اللي حصل بسببك | شقيق أحمد رفعت يوجه سؤالًا لأحمد دياب رئيس رابطة الأندية

وجه محمد رفعت، شقيق اللاعب الراحل أحمد رفعت، نجم مودرن سبورت ومنتخب مصر، التهم ل أحمد دياب رئيس رابطة الأندية المحترفة بإعتباره مسؤولًا لما حدث لشقيقه.
وأضاف محمد رفعت، خلال تصريحات تليفزيونية، مع الإعلامي إبراهيم فايق، عبر برنامج 'الكورة مع فايق'، المذاع علي قناة 'إم بى سي 2'، أحب أوجه سؤالًا لأحمد دياب رئيس رابطة الأندية، إيه اللي حصل لشقيقى أحمد رفعت.
واختتم: أريد إجابة موضحة من أحمد دياب للى حصل مع شقيقى أحمد رفعت
ومن جانبه، كتب محمد رفعت، على صفحته عبر موقع التواصل الاجتماعي «فيس بوك»: «أول مرة أكتب وقلبي وعقلي مش مستوعبين اللي بكتبه أو إللي بحكيه لأن أنا النهاردة فقدت روحي والله العظيم روحي وسندي وضهري وأخويا وأبويا الكابتن أحمد رفعت».
وأكمل: «من حوالي 17 سنة أبويا رحمة الله عليه توفى وكان عندي حوالي 12 سنة ومكنتش حاسس بأي حاجة غير إن أبويا مش هشوفه تاني وهيوحشني أوي وكنت بعيط وقدام الناس كلها بس النهاردة أنا فعلًا أبويا مات لأني معيطش كتير من الألم الدموع منزلتش قدام الناس لأن ضهري أتكسر وقلبي أتعور
وتابع: «أخويا كان شايل جبل على كتفه وأنا مش حاسس بيه، أنا بتمنى إن أنا اللي أكون مكانه لأني مش هعرف أعمل اللي هو كان بيعمله من حنية وخوف علينا وحكمته وصبره اللي مش عارف أفسره لحد دلوقتي الشخص ده كان راجل بمعنى الكلمة، أنا مش عارف اتكلم بس أنا مش قادر أصدق اني مش هشوفه تاني ولا هسمع صوته تاني. أنا نفسي أخويا يرجع تاني يارب رجعه تاني يارب».
وأتم: «بالله عليكم لا تنسوه في دعائكم ولا في صلواتكم والله كان طيب لين سهل قريب وكان من الصالحين وخيره كتير أوي على الناس كلها.. إن لله وإن إليه راجعون اللهم اجرنا في مصيبتنا اللهم ارحمه واغفر له وثبته عند السؤال واجعل هذه الليلة أسعد لياليه يارب العالمين».
مودرن سبورت ينعي وفاة أحمد رفعت
ونعى نادي مودرن سبورت ببالغ الحزن والأسى الفقيد المرحوم اللاعب أحمد رفعت لاعب نادي مودرن سبورت واللاعب الدولي الذي يعد من المواهب المتميزة في ملاعب الكرة المصرية، ويشهد له الجميع بحسن الخلق بالإضافة إلى امتلاكه الخبرات المحلية والدولية في التعامل مع أي موقف.
وأكد نادي مودرن سبورت أن جميع ما يتم تداوله على مواقع التواصل الاجتماعي لا يعبر عن الحقيقة، وأن اللاعب لم يتعرض لأي ضغوط داخلية أو خارجية، كما أن اللاعب تم الاهتمام به والعنايه به من قبل مجلس إدارة النادي في جميع الأمور وعلى أكمل وجه، وكان ذلك أبسط حق من حقوقه على النادي لكونه فردا من أفراد العائلة داخل النادي ومجلس إدارته.
وأهاب بجميع المتعاملين في مجال الرياضة والإعلام وباقي أفراد الشعب المصري بالدعاء له بالرحمة والمغفرة وأن يلهم أهله وذويه الصبر والسلوان.