الملحن محمد رحيم يرد على هجوم رامي صبري: كلام مسيء

رد الملحن محمد رحيم على الفنان رامي صبري، بعد اتهام الأخير له بأنه يهاجم نجاحه، وذلك عبر حسابه الشخصي على موقع التواصل الاجتماعي فيسبوك.
وكتب محمد رحيم: 'ردي على صديقي الفنان الكبير رامي صبري بعد اتهامه ليا في وسائل الاعلام اني بهاجم النجاح مع كل الحب والتقدير، أولا يعلم الله سبحانه وتعالى أني معنديش أدنى وقت أضيعه في أني أدخل في أي مواضيع، نظرا لانشغالي بمجموعة أعمال مهمة جدا إن شاء الله الناس هتشوفها قربب، ولكن تعليقا على مشكلتك أنت وعمرو مصطفى اللى الحمد لله اتحلت في مداخلة إذاعية، وربنا ميجيبش زعل أبدا بين الأخوات ولكن للأسف اللي حصل أن اسمي تم إقحامه من طرفك بشكل لا يليق'.
وتابع رحيم: 'ونظرا لأن المداخلة كانت على إذاعة مشهورة فطبعا اتسمعت من بعض أفراد عائلتي، ومنهم بنتي، وأكيد قطاع كبير من جمهوري اللي بيحبني وبيحترمني وبيحب أعمالي، فواجب إني أرد عليك بكل حب واحترام علشان أوضح وأصحح، المغالطات اللى حصلت في المداخلة، أنت قلت في المداخلة بالنص أنك سنة 2013 هاجمتني بنفسك علشان أنا كنت بحارب نجاح، كان أخويا الفنان عمرو مصطفى حققه، وقت ما قدم أغنية بشرة خير، وكأن أنا راجل معنديش حاجة أعملها غير أني أهاجم وأحارب الناس الناجحين، وأنت اللي وقفت في وشي'.
وأضاف محمد رحيم: 'ده طبعا كلام مغلوط ومسيء ولازم أصححه، وأبين للناس الحقيقة اللي سكت عنها سنين، احتراما للعشرة الطويلة والصداقه اللي بتجمعنا كلنا، أولا أنا الحمد لله مش ناقص نجاح وتاريخ بفضل الله سبحانه وتعالى، علشان لأهاجم أي حد ناجح ربنا يعلم أني بدعي في صلاتي بالرزق والتوفيق لكل الناس، وباتمنى الخير للجميع، اللي حصل ساعتها أني علقت أن لحن بشرة خير شبيه إلى حد التطابق مع عملين من أعمالي وهما أغنية لا كدا عاجبين للمطربة الصاعدة إيمان سمير وأغنية كل دا يطلع منك للنجمة شيرين وجدي، والأغنيتين صدرتا سنة 2004، يعني قبل صدور لحن بشرة خير ب9 سنين على الأقل'.
الملحن محمد رحيم يرد على هجوم رامي صبري
وأكمل:'ونظرا لنجاح بشره خير وفرحتنا كلنا بيها أنا قفلت الموضوع تماما ومرضيتش أبين للناس انا بقول كده ليه!!! ولكن الفيديو اللى تحت ده هو الفيصل اللى هيبين للناس إذا كنت بخترع كلام من دماغي ولا كلامي فعلا صح بناء على علم ودراسه ة وخبرة وأنت طبعا راجل فاهم ودارس مزيكا برضه زينا !!!!!!'.
وواصل رحيم:'كما تم إرفاق لحنين آخرين من أعمالي وهما أنا بحب عيونك للفنان عمرو دياب ومشاعر للفنانة شيرين عبد الوهاب واللى حصل إني لقيت نفس اللحنين دول تم استعمالهم في أغاني خاصة بيك وحققوا نجاح كبير معاك من غير ما تضع اسمي عليهم على الأقل جنب اسمك وطبعا الفيديو هيوضح المسأله دي جدا حتى لغير المتخصصين وواثق أن الجمهور هيتفاجئ وفي ناس كتير هتستغرب أنا ازاي سكتت طول السنين دي والإجابة لأني انسان مسالم ومحترم وعمري ما أسمح لنفسي أرفع قضية على زميل وأخ ومؤمن بتوارد الخواطر وحسن النية دائما، وطبعا دي مش مني دعوة للتخلى عن الحقوق ولكن العشرى الطيبة والمحبة والصداقة ليها علينا حق'.
واردف:' والخلاصة أنك هاجمتني قبل كده أكتر من مرة ومازلت لأني قلت كلمتين (فضفضه) هما من صميم حقي وقوانين الملكية الفكرية واضحة ومفيهاش هزار في بلدنا وفي كل دول العالم وكنت بشوف مجهودي وتعبي بينسب لغيري وبستحمل وبسكت عشرات المرات وللأسف أنت اللى زعلان وبتتهمني إني كنت بهاجم النجاح لأ أنا قطعا مش بهاجم النجاح لأنني والحمد لله صديق النجاح أنا فقط كنت بعلق على استحياء وخجل على ظاهرة سلبية جدا ومتكررة في أسلوب العمل في الوسط الفني وهي ظاهره استغلال واستحلال مجهود الناس بدون وجه حق ونسبته لغير أصحابه الحقيقيين وأنا عايز بعد تجربتك الاخيرة مع عمرو اللى سببت المشكلة دي كلها الناس تحاول تتخيل أنا ساكت على ايه بقالي سنين ولكن بعد الاعتداء على اعمالى وافكاري ومجهودي ثم سكوتي وصمتي اطلع بحارب النجاح كمان وكمان اطلع مش عاجب ؟؟؟_.
وأختتم محمد رحيم:' لأ طبعا ده كلام مرفوض تماما وفعلا أنا مش هسمح لأي حد يقوله وربنا يسامح الجميع، وطبعا أنا برد على الملأ لأنه كلامك كان على الملأ فلذا وجب التصحيح والتوضيح مع تأكيدي ان عمرو مصطفى طبعا أنا بعشقه وبحبه من قلبي وأنت كمان أخويا وبحبك والدليل إني أول مرة اتكلم على مواضيع زي دي حدثت منذ سنوات ولكن زي مانت عندك أسرة وعندك جمهور تخاف على شكلك قدامهم أنا كمان زيك بالظبط مع تمنياتي بالتوفيق والنجاح الكبير للجميع اخوك الموسيقار المصري العالمي المجتهد والمحترم والمحب محمد رحيم'.