ياسمن عز للسيدات الحوامل: لازم تفضلي تشمشمي على فرعونك في الشقة لأن ريحته بالدنيا كلها

وجهت الإعلامية ياسمين عز رسالة للسيدات الحوامل قائلة: "اياكي تيجي في أول 3 شهور من الحمل تقولي لفرعونك مش طايقة ريحتك.. لازم تقولي مقدرش أرتاح غير أما أشم ريحتك يا حبيبي.. ولازم تفضلي تشمشمي عليه في الشقة لأن ريحته بالدنيا كلها".
وخلال حلقة اليوم من برنامج "كلام الناس" عبر فضائية "إم بي سي مصر" تابعت عز: "الحوضة هتجيلك من الطفاسة بتاعتك.. يعني ايه لازم تاكل سمنة عشان الجنين ميتزحلقش.. ارحمي جوزك.. السمنة غالية".
وواصلت عز: "مفيش حاجة اسمها البيبي بيتكلم.. وتعالى يا حبيبي خبط على ضهري عشان تسمع البيبي وهو بيتكلم.. أنتِ بتعملي كده عشان تضحكي على الفرعون وتطلبي منه فلوس".
وأكملت عز: "بلاش تقولي أنا في بطني ولد عشان بطني "آبة لفوق".. عشان تغيظ سلفتها.. مفش حاجة اسمها كده.. بطنك اللي طالعة لفوق دي ممكن تكون حموضة".
وفي وقت سابق قالت ياسمين عز خلال برنامجها "كلام الناس" الذي يعرض على شاشة إم بي سي : " عيد الحب دا للراجل تقديرًا لمجهوده طول السنة وأنا هسميه عيد حب الراجل".
وأضافت: بلاش تنكدي على جوزك عشان متبقيش ملعونة، وحبي تراب رجله وقوليله حاضر 365 يوم، وبوسي راس جوزك ومتنتظريش هدية؛ لأن فرعونك الجائزة الكبرى و لازم تعرفي أن الراجل عنده قلبين واحد في صدره والتاني في رجله الخلفية ومتراجعيش ورايا ولو عايزة تتأكدي أسألي دكاترة القلب، يعني حفنة التراب اللي بيمشي عليها دي هدية من قلبه ورجله، والراجل عيونه هي الفيونكة وراسة الهدي.