«ابتزوني بصورة لبنت عمتي بالمايوه».. نص أقوال الطبيب المتهم الرئيسي بقضية «السجود للكلب» (مستندات 4)

تواصل «أهل مصر» انفرادها بنشر نص تحقيقات النيابة في القضية التي تداولت إعلاميا باسم «السجود للكلب»، والتي يحاكم فيها كل من الدكتور عمرو خيري، رئيس أقسام العظام بكلية الطب جامعة عين شمس، وطبيب آخر ومساعد لهما، على خلفية اتهامهم بالتنمر ضد عادل سالم، الممرض، والإساءة إليه والتعدي عليه بالضرب وإجباره على السجود لكلب، والتشهير به على شبكة الإنترنت.
عبر السطور المقبلة، ننشر نص أقوال الطبيب عمرو خيري، المتهم الرئيسي في واقعة التنمر بالممرض، وإهانته وإجباره على السجود لكلب.
س/ ماقولك فيما نسب إليك من اتهامات تلوناها عليك شفاها بصدر المحضر؟
ج/ الكلام دا محصلش.
س/ ماتفصيلات ماحدث إذا؟
اقرأ أيضا استغربت إن في كلب ب20 ألف جنيه.. نص أقوال الممرض بقضية «السجود للكلب» (مستندات 2)
ج/ اللي حصل ان أنا شغال طبيب في مستشفي النزهة الدولي وعندي ممرض اسمه "عادل" بيشتغل معايا بقاله أكثر من ثلاثة وعشرون عام وبحكم العشرة اللي مابينا أخذنا على بعض وبقيت بعمله زي صديق واتعودنا أن بعد يوم العمل الشاق نهزر وبنمزح مع بعض وناكل مع بعض ونصلي مع بعض، وهو كان بيجيلي البيت أحيانا وفي مرة شاف الكلب بتاعي وقعد يلعب معاه ولما الكلب بتاعي مات أنا حزنت عليه جدا ولما عادل شافني حزين قالي أنت حزين ليه قولتله عشان الكلب مات وابتدي يهزر معايا ويمزح على حزني علي الكلب وفي مرة كان هو عندي في المكتب وعادل قعد يهزر معايا ويقولي أنت لسه حزين علي الكلب وكان موجود في العيادة ساعتها السكرتير أسمه "عادل محمد رفعت" والدكتور/ معتز سعد جمال الدين وقاعدنا ونهزرمع عادل وخليناه يلعب رياضة ودي مش اول مرة وأنا كنت بصورة فيديو وهو بيلعب رياضة وبعد كدا فوجئت أن الفيديو دا اتنشر علي مواقع التواصل الاجتماعي والناس قعدت .
اقرأ أيضا احتجزوا الممرّض في عيادة خاصة وسبّوه.. أمر إحالة المتهمين بقضية «السجود للكلب» (انفراد بالمستندات1)
س/ ومن يدعي سالف الذكر علي الرغم من عدم وجود خلافات بينكما كما أدليت لنا؟
ج/ معرش
س/ متى وأين جرى إلقاء القبض عليك؟
ج/ االنهاردة الساعة 6 صباحاً في بيت نسايبي في التجمع الخامس.
س/ كيف جرى إلقاء القبض عليك؟
ج/ اللي حصل ان كريم جوز بنتي وانا عند اهله في البيت لقيته بيقولي في شرطة عيزاك برة وخرجت لهم وعرفت ان هما محتجزين بناتي في القسم وخدوني معاهم على القسم.
س/ ومن القائم على ضبطك تحديدًا؟
ج/ هو ضابط تقريبا أسمه محمد صلاح وكان معاه ثلاثة تانيين.
س/ انت متهم بالتنمر وآخرين علي المجني عليه / عادل سالم بانه استغليت سُلطتك عليه على كونه مساعد لك بالقسم الطبي محل عملك بأنه وجهتو اليه عدة عبارات من شأنها وضعه موضع السخرية وطلبتوا منه تأدية حركات من شأنها وضعه السخرية وقمتم بتصوير الواقعة باستخدام هاتف نقال؟
ج/ الكلام دا محصلش وكنت بهزر معاه.
س/ انت متهم باستعراض القوة والتلويح بالعنف والتهديد ضد المجني عليه عادل سالم ؟
ج/ الكلام دا محصلش وانا كنت بهزر معاه وانا اصلا ماقمتش من على مكتبي
س/ انت متهم باحتجاز المجني عليه بدون أمر أحد الحكام المختصين؟
ج/ أنا ماحتجزتوش وهو كان يقدر يخرج في اي وقت.
س/ أنت متهم بسب المجني عليه بان وجهت اليه عبارات من شأنها خدش شرفه وانتهاك حرمته بنشر مقطع الفيديو بغير رضاه؟
ج/ دا كلام كان في نطاق الهزار وانا ماكنش قصدي اشتمه انا كنت بهزر معاه.
س/ وما هى علاقتك بسالفي الذكر؟
ج/ أنا معرفش ولا واحد فيهم
س/ كيف وقفت على أن سالفي الذكر هما من نشرا المقطع التصويري الخاص بالواقعة؟
ج/ لان أصدقائي قالولي ان الحسابات اللى بأسمائهم على موقع الفيسبوك هما اللى بدأوا في نشر ذلك المقطع على فيسبوك.
س/ وكيف تحصلوا على ذلك المقطع التصويري على الرغم من عدم معرفتك بهم وكذا عدم إرسالك لذلك المقطع لثمة آخرين كما أدليت لنا؟
ج/ لأن في شهر 7 الماضي حصل قرصنة على الواتس آب بتاعي واكتشفت كده لما دخلت على الواتس آب ولقيت كل الحاجات اللى عليه ممسوحة فتواصلت مع شركة واتس آب عبر الإيميل وقالولي هنرجع نقولك بس الإجراء ده بياخد أسبوع وبعد أسبوع فعلا رجعولي الحساب بتاعي وبعد ما الحساب بتاعي رجع بحوالي شهر تقريبا جالي مكالمة من دولة أزريبجان وحاولوا يبتزوني بصورة لبنت عمتى بالمايوه، جابوها من على الواتس آب وقالولي هنبعت الصورة دى لمراتك ومديتهوش فرصة يطلبوا مني طلبات وعملتلهم بلوك.
س/ هل قمت بتحرير ثمة محاضر قرصنة تطبيق الواتس آب الخاص بك؟
ج/ لا.
س/ ولماذا لم تقم بتحرير ثمة محاضر بشأن تلك الواقعة؟
ج/ لانى تعرضت لواقعة سب وتشهير من أحد المرضى قبل كده عبر موقع فيسبوك، وروحت مباحث الانترنت بالعباسية وعملت محضر لم يصل لنتيجة وبالتالي مروحتلوش تاني لما تعرضت لواقعة القرصنة ولم أستشعر بوجود ضرر قادم.
س/ وما هى علاقة المدعو أحمد يحيى شريف وشهرته أبو لؤي والمدعو محمد حسان الذي أدليت بأسمائهم بواقعة قرصنة الهاتف؟
ج/ انا معرفش إذا كان هما ليهم علاقة ولا لأ، بس الناس دى اول ناس نشرت الفيديو على الفيسبوك.
س/ جاء بأقوالك سلفا أنك لم ترسل المقطع التصويري الخاص بالواقعة لثمة آخرين عبر أية تطبيقات، كما جاء بأقوالك أن القرصنة وقعت على تطبيق واتس آب، فكيف تحصلوا عليه على الرغم من عدم تواجد المقطع على تطبيق واتس آب؟
ج/ يمكن أكون صورت الفيديو ده بالكاميرا عبر تطبيق واتس آب بس أنا مش متذكر إذا كنت صورت بكاميرا الموبايل ولا بكاميرا الواتس آب.