أحلام تطلب الخلع: مضيع فلوسه على المخدرات ورافض يصرف على أولاده

"فجاءة حياتنا اتقلبت خالص بسبب جوزي اللي صاحب شلة السوء، وأتعلم شرب المخدرات والعلاقات الحرام، بقى يضيع كل فلوسه على الستات والشرب، وبقى يسهر للصبح يرجع ينام، ولا يفكر في أكل وشرب للبيت ولا حتى مصاريف الطفلين الصغيرين، لدرجة أني طلعت اشتغل عشان ألاقي فلوس أجيب أكل للبيت وادفع الإيجار، لحد ما بقيت مبقتش قادرة أني أصرف عليه هو كمان شخصيا".. نطقت أحلام بهذه الكلمات وهي داخل محكمة الأسرة لرفع دعوى خلع من زوجها مبررة استحالة العشرة معه.
وقالت الزوجة في مستهل حديثها مع أهل مصر: أنا اتجوزت من 5 سنين زواج صالونات وجوزى كان يشتغل باليومية في محل، وكان بيكفي مصاريف وكل طلبات البيت والحمد لله حياتنا كانت مستقرة جدا، وعمري ما اعترضت على شيء ولا خرجت سر بيتي بره ولا حتى لأهلي، وربنا كمل فرحتي ورزقني بطفلين منه، لحد ما في يوم وليلة بدأت أحوال جوزي تتغير، وحياتي تحولت لجحيم، كل يوم بقي يسهر لوش الصبح ويتكاسل على شغله، ممكن يشتغل يومين أو ثلاثة بس في الأسبوع، وفلوسهم يأخذهم هو كنت هتجنن ازاى تحول كدا، وعرفت أنه بقي يشرب مخدرات.
وتابعت حديثها قائلة: منهم لله شلة السوء اللى اتلموا عليه، علموه شرب المخدرات والحشيش وبقي كل فلوسه رياحه على الشرب والسهرات الحمراء في الشقق المفروشة، وبقى متغير معانا ضرب وإهانة ورافض يصرف على العيال لدرجة اني مكنتش بلاقي فلوس اشترى بيه لبن للأطفال، ومكنش قدامى غير أدور على شغل ولأول مرة من يوم ما اتجوزته ميعترضش أني أنزل شغل، وبقيت أجيب فلوس وأصرف على عيالي وأكل وشرب للبيت، وهو لما شاف أنى بجيب فلوس قعد في البيت وبقي عاير كمان مصروف ليه، لحد ما تعبت وقررت أنفصل وأربي أولادي لكن رفض يطلقني عشان كدا رفعت دعوى خلع ومنتظرة أولى الجلسات.
اقرأ أيضا منال تطلب الخلع: حماتى ضربتنى أنا وأمى بالشبشب في وسط الشارع