عدودة مصرية

إلي روح الفنان الراحل عمار الشريعي
زعق الوابور علي السفر
قلت اللي رايح مين
ردت عذاري الجمال
ودموعها علي الخدين
جدع ومبدع وله جوة القلوب قيمة
فنان حقيقي وياما اسعد الملايين
الحان تفيض بالعذوبة
وشجن تفيض به العين
غواص في بحر النغم
يغوص بعفوية
يرجع في ايده دهب يمتع الناظرين
عمار يا بو القلب اخضر
يا ابو المواقف صلابه
غنيت لكل الغلابة
وكان حضورك جميل
يشهد لهذا الحضور
جموع في ثورة نبيلة
وحشود علي الملايين
ترحل معاك الشموس
يرحل معاك الدفا
وكل معني اصيل
هذا زمان الركام
ماهوش زمان الصفا
هذا الرحيل احتجاج
علي سلوك الجحافل
اختاروا ياللعجب!
وبئس ما اختاروا
ايام كئيبة وعبوس
ايام شتاها تقيل
هكسوس بتدهس قلوبنا
وصفيح علاه الصدأ
ويحسبوه ارابيسك
يبكي لرحيلك
قصايد العشق والعشاق
وينوح عليك الرباب
وآهة المجروحين
لكن عزانا في رحيلك
يا بو المقامات سلاسل
يابو الغناوي كناري
ان الفناء للجسد
وللخلود المعاني
باقية ومهياش زبد
ذاهب جفاء في الهواء
لو للهدد الف هادم
يكفينا عمار واحد
يشيد حروف الكلام
من اجل هذا الباقي
والمجد للانسان
بشرط واحد وحيد
انه يعيش انسان
ويموت كمان انسان
ماسك شراعه في اديه
وما فيش وصايه عليه
يكون جدير بالخلافه
ويحقق الغايه
العدل والحريه
وكرامة الانسان
عمار يا ارض الله
وباقيه فيك الحياه
حياه حقيقي نعيشها
ماهيش نشارة خشب
حياه بطعم الحياه
حياه بطعم الحياه