السيناريو البديل لحياة رامي مالك!

احم احم !

المشهد الأول.. (ليل داخلي)
(مالك سعيد مرشد سياحي يعيش في المنيا مع زوجته نيللي وقد عاد توه من رحلة للقاهرة اعتاد أن يقوم بها كل فترة للبحث عن عمل)
- برضه مفيش فايدة يا مالك لسه محدش رد عليك؟
- لسه يا نيللي مع الأسف الطلب اترفض تاني المرة دي
- ما تجرب يا سعيد تقدم طلب هجرة كندا ولا استراليا؟
- بصي المفروض دفعتي عليها الدور في التعيين تبع القوي العاملة يمكن المرة دي البلية تلعب واتعين في الحكومة ولو ما حصلش نبقي نشوف موضوع كندا واستراليا ده!
المشهد الثاني.. (نهار خارجي)
(مدام نيللي تقوم بتفريق شربات علي أهالي الحارة بعد أن تلقي سعيد خطاب تعيينه مدرسا للغة الإنجليزية بمدرسة السعادة الإعدادية بملوي).
- لولولولوييييييي يا ألف نهار أبيض أخيرا يا مالك حاتشتغل؟
- ياما انت كريم يا رب مين كان يصدق.. أيوه أخيرا يا نيللي حاشتغل مدرس قد الدنيا انتي عارفة المهية كام؟
- قول كام وفرحني يا سعيد يا وش السعد
- 34 جنيه غير العلاوات يعني حنلعب بالفلوس لعب وده معناه إننا دلوقتي نقدر نخلفلنا كام عيل يملوا علينا الدنيا
- 34 جنيه حتة واحدة؟!! طب اسندني لحسن حاسورق
المشهد الثالث.. (ليل داخلي)
(نيللي تجلس حزينة أمام زوجها وتبكي بحرقة)
- اهدي بس يا نيللي وفهميني إيه الحكاية بالظبط؟
- أهدي إزاي بس يا سعيد انت عارف يعني إيه ابنك الوحيد عايز يشتغل في السينما؟ يعني الابن إللي اترجيته من الدنيا يضيع مني كده في غمضة عين؟ اودي وشي من الناس فين لو عرفوا إن مالك عايز يبقي مشخصاتي؟ أنا أهون عليا أهج من الصعيد كله ولا أشوف اليوم ده يا سعيد!
- سينما إيه المجنون ده هو اكمني سيبته يمثل في الفصل عشان المدرسين بتوعه قالوا عليه موهوب يبقي أسمحله يبقي ممثل؟ هو ما يعرفش إننا صعايدة ولا إيه؟ ده أنا أخليه يسيب المدرسة وأوديه أي ورشة يتعلمله صنعة!
- وتروح بعيد ليه يا سعيد إيش قولك اخويا سامح محتاج حد يقف في الصيدلية بعد ما البت ناهد اللي معاها دبلوم تجارة واللي كانت شايلة الصيدلية اتجوزت وانت عارف سامح ايده فرطه يعني ممكن يدي رامي 20 جنيه في الشهر!
المشهد الأخير.. (ليل خارجي)
(نيللي توزع الشربات في السرادق المقام في الحارة ويقترب منها سعيد وهو يتناول كوباية شربات من يدها)
- ياه يا نيللي أنا مش قادر أصدق نفسي
- أخيرا رامي في الكوشة وجنبه ناهد عروسته زي القمر
- بس يعني مكانش قادر يتجوز أي واحدة تانية؟
- مالها ناهد يا سعيد البت بختها مال واترملت ورجعت تاني الصيدلية عشان نصيب ابننا رامي، انت عارف ناهد معاها خميرة كويسة يعني رامي ابنك يبوس إيده وش وضهر
- نشكر ربنا يا نيللي نشكر ربنا
- وكل ما تفتكر ابنك في السينما وجابلنا العار احمد ربنا
- أيوه بالمناسبة ماتنسيش بعد ما العريس ياخد عروسته ويمشي نبقي نفتح التليفزيون نجيب القناة التانية.. الليلة حايذيعوا حفل جوايز الأوسكار خلينا نتفرج علي المزز والصيع بتوع السينما الأمريكية!