سبحة غبي

الناس..........
حبات عقيق متلضمة زي السبح
مرة ماسكها نبي
مرة ماسكها غبي
والناس مابين الخيط بتفركها صوابع
سبحانه من وهب الحلق
للي بلا
لكنه بيرطب لسانك يا نبي
بالذكر واللمة ف أحضان الوطن
وجيوش من الدراويش هتستني تسابيحك
تنزل ملايكة م السما
تنظر لهم نظرة سلام
سبحانه من مكن لسان الأعجمي
خلاه يريد/ خلاه جديد
ودع زمان التهتهة أصبح صبي
لومش بعيد الحلم ليه سبحة غبي
لفة خيوطها المؤلمة ومعنكبة المحراب
فمفيش أئمة بيحضروا
لجل الجموع الطيبة
ولا فيش صلا
أصل الإمامة محرمة
إلا علي من يؤمنون بالعنكبة
ويرتلوا كل السور
إلا آيات الزلزلة
فالضلمة جايا معتمة
ومقفلة كل السكك
الضلمة جايا لا محالة بدون جدل
فاردا سوادها ع المدي
»يا أهل الأمانة والندي والشوق«
»يا مجمعين الشمل ف الحضرة الزكية«
يا مؤمنين ان الإمامة مش وثن
إمتي هننده ع النبي
فيجمع الأوليا
وتحين صلاة العشق ف عيون الوطن