نفسي .. ألقي مصر

ياطلقه مين طلعك
ما اوضعك انتي ومن بالغدر ارضعك
خلاكي تجري تبرطعي
وبدم بارد تقطعي
أجمل زهور.. كان حلمها.. كان همها
في حضن بيت الوطن.. الضحكة تاني تلمها
وتفرد عيدان النور
بالأمانة يا طلقة قولي.. انطقي
بقاهان عليكي تقتلي.. أجمل ما فينا
بقا هان عليكي تسرقيهم م الحياة
وتغمسيهم في الجراح
وتخلي عطر الدم فيهم مستباح
ع العموم الزهر فتح.. بقا طير بيطرح
كل يوم فوق كتافه.. ميت جناح
وانتي ظرفك اللعين.. اللي مرمي فوق ترابهم الحزين
جوه منه بالحروف مكتوب خيانة
وبالأمانة.. مين بايده داس عليكي بالزناد
ويومها قالك ياللا غوري
مانتي جايه من الفساد.. ياللا روحي ف سكة تانية
سكة فيها الطهر طيبة.. وحشي حبة من الولاء
اللي طين الأرض نبت من عروقهم
اللي كرباج الظلم حاول يوم يسوقهم
بس طبع الحر فيهم كان شديد
والعزم كان عمال بيصرخ في الوريد
نفسي ألقي مصر لابسة توب جديد
والضحكة ترجع.. تاني ترقص في الميدان
وبحنان اللمة نعزف.. أحلي غنوة.. للشهيد