حكاية المعلم عوض

...........!
.................!
بس يا سيدي؛
وبعد ما الحفلة انتهت؛؛
وروحوا المعازيم علي بيوتهم
والبيت بقي هس هس
قامت حلاوتهم..
قفلت الشبابيك واتهيأت
كان ليها مدة طويلة..
مفضفضتش معاه ولا شكتله..
القصد:
لبست قميص صبرها الدايب وراحتله..
نامت علي دراعه؛
واتنهدت وقالت له:
الحل ايه قوللي يا ملاحي:
في اللي اتسرق مني،وبلاك بهمي وبلاني...
بحزني ونواحي!!
دبرني يا ضي عيني
أرجوك طمني
إمتي ح ياجي نهار:
ينجدني من ليلي الطويل؛
وتطيب في شمسه الطيبة جراحي!؟
ضحك المعلم عوض..
ضحكة من ورا قلبه؛
وكتم آهاته وخفاها..؛
وبص في عيونها..
أوحي له لونها إنها بتتألم
سرح شوية في غلبها وغلبه؛
ورجع..
مال عليها باسها في جبينها؛
وقال لها..
ماتستعجليش..
الحل جاي من فوق يا حلاوتهم
طمني نفسك ب هانت..
ليلاتي صباحي
وما تقلقيش..
من إللي بالي بالك
مهما يزيد طغيانهم وجبروتهم
ومهما تقوي علينا شوكتهم
لينا رب اسمه الكريم
قادر مطلع صاحي
عالم بحال المظاليم
ارمي حمولك عليه وسلميها له
يا حبيبتي واتغطي
بالحكمة والصبر السليم
حتشوفي أصعب شئ
قدام عينيكي موطي
وتلاقي أخونا الأمل
بقي صاحبك الأنتيم
" في اللحظة دي "
رفعت دماغها البنيه
حطتها علي صدره
واتنهدت وقالت له
بابتسامة قلق متغطي:
نورني يا عنتر..
ياللي إنت متكتف
بكل سلاسل الدنيا اللي مفاتيحها..
ف إيد خصمي ودباحي،
هنا المعلم عوض ركن السيجارة
اللي في أيده ، واتعدل ناحيتها
ملّسْ علي شعرها،
وضمها في حضنه
وبقهر مكتوم قال لها:
يا قبلة عمري يا عبله..
ماتمليش ولاتكلي
مهما انجرحتي،
ومهما دوختي هموم
وحياة غلاوتك ف قلبي
أنا كل يوم:
قبل آدان الفجر باسمع..
هاتف في صوت الديوك
بيناديلي ويقول لي:
يا حالم بالحياه الحق..
لكل الخلق تتحقق
اطمّن ما تقلقشي
مع آخر دقه في قلب الليل اياه
راح يصحي النور،
يعزبل ويسمي.. ،
ويدوس ع الضلمه باذن الله
شمال وجنوب وغرب وشرق
لغاية ما تموت م الغيظ
وجنابها تطق
وتسيب دنيتنا وتمشي.. ،
وح يضحك من قلبه ويمشي..
في الشر يقطع ويمزّع
لاجل يخلص تار المظاليم..
من الناس الغدارة الجبارة الظالمه
وبإيده الطاهرة المبروكة
ح يلف يوزع بالعدل
حب وحرية وانصاف
علي كل المخاليق ف الكون
يرجع مرجوعنا لصاحبتنا
بعد ما سمعت قوله ارتاحت،
واترسمت علي وشها ضحكه
بلون وبطعم فواكه الجنه
ونامت..
تحلم في أمان وسلام
بص صاحبنا..
شاف الصبح عمال يتسحب
من فتحات الشيش
من زهوة الاحلام..
مرضيش يصحيها
زبط المنبه علي سبعه،
وخدها ف حضنه ونام
رن المنبه صحي
غير ريقه بنظرتين فيها،
وشرب فنجان قهوه علي الريحه.. ،
وقبل م يطلع..
قاصد باب اللي لا بيغفل ولا بينام
مسك صباع الروج،
وكتب لها..
علي مراية التسريحه
زرعت وعيي قصب،
وهربت من لا وعيي!
وحبست شهد العين
لحد ما:
أجهز حضور للحلم زين،
ويشد ف عضامي العصب،
وارتاح من اللي انا فيه؛
واريح الجوزين..
خيالي مع واقعي،
ولا وعيَّي مع وعيَّي!
ولحين ما ادبر حالي يا عمري؛
وأصبح كفاءة..
لدولا ولدوكهم
ح افضل أصبر نفسي
واقولك:
الحل جاي من فوق
يا حلاوتهم
الحل جاي من فوق يا.. ،
الحل
جاي