مساحة للرأى

سحر ناجي: اعزائي المشاهدين بنرحب بيكم مع مساحة للراي نتناول برامج مرشحي الرئاسة مش بس بالنقاش ولكن ايضا بالتحليل والتوضيح حتى يذهب الناخب وهو امام صورة كاملة ويختار بعيد عن العاطفة الشخصية او العاطفة الدينية ويكون على وعي كامل بان شراء صوته سواء بمقابل مادي او مقابل عيني سيدفع ثمه غاليا النهاردة هنتناول بالنقاش البرنامج الانتخابي للدكتور محمد فوزي عيسى من خلال حوارنا مع دكتور عماد الشرقاوي مخطط السياسة الاعلامية للمرشح برحب بيك يافندم .. اما الجانب التحليلي والتوضيح والتعليق ايضا هيكون لاستاذ ثروت شلبي الكاتب الصحفي بجريدة الاهالي..
دكتور عماد احب ابدا باكتر موضوع يديه اولوية لبرنامجه لانه هذا هيخلي الناخب يحكم على شخصيته وبالتالي يحكم على برنامجه
د.عماد الشرقاوي: بسم الله الرحمن الرحيم الحقيقة انا ساهمت في تخطيط السياسة الاعلامية في حدود الامكانيات طبعا ولاقتناعي الشخصي ان الشخصية دي جديرة ان تكون رئيسا لمصر ان شاء الله مصر الغالية علينا كلنا واعتقد اننا في الاختيار لازم نعزل العواطف شوية لان دا مستقبل وطن والحقيقة لما قعدت مع حضرته كان كاتب البرنامج بتاع سعادته واول حاجة انا كنت شايف انه فيه اتزان من نواحي كاملة يعني حد بص للخريطة كاملة متكاملة يعني كان حاطط التعليم الزراعة الصناعة العلاقات الخارجية قيمة الفرد اهمية الدين الفئات المختلفة الظروف اللي مرت بيها البلد يعني الحقيقة كانت دي النظرة التأملية بتاعتي للبرنامج والحقيقة كان مهتم في البداية بفكرة الزراعة والصناعة
سحر ناجي: من فين انطلق
د.عماد الشرقاوي: كان دايما قبل ما نيجي لفكرة الرياسة كان معجب بتجربة محمد علي باشا وكان شايف انه احنا عايشين في العز بتاعه دلوقت كان دايما يبص لقيمة السد العالي وكان دايما يبص لقيمة الطمي واهميته للزراعة
سحر ناجي: هو بالنسبة له هو هيأتي بايه جديد في مجال الزراعة والصناعة
د.عماد الشرقاوي: هو الحقيقة انطلق من تجارب الاخرين منطلق من تجارب ناجحة وحاطط تحديات قدامه ايه الموجود دلوقت وايه المتاح وشايف الاتجاهات العالمية ايه والعلماء بيتكلموا في ايه فكان دايما بيفكر في وادي موازي لوادي النيل يعني النهاردة الوادي دا بقى وادي ضيق وفيه 5% من السكان وهو شايف ان فيه تكنولوجيا جديدة نقدر ننقب عن المية الجوفية ونستغلها استغلال امثل لازم نغير طرق الري هو شايف انه لازم نستغل الطاقة الشمسية في ان احنا نكاترمساحة الزراعة .. شايف انه التكنولوجيا انه ممكن نروي بعض الزراعات ومن مياه البحر وفيه تجربة لعالم الزراعة مصري وازاي ان احنا نعمل وادي جديد تستخدم تكنولوجيا وتطلع مية من تحت الارض واستخدام تكنولوجيا توفر المية
سحر ناجي: يعني افهم من كده استخدام تكنولوجيا لتطوير الزراعة وزيادة الرقعة الزراعية
د.عماد الشرقاوي: بالظبط كده
سحر ناجي: استاذ ثروت هل ترى الاولوية للزراعة والصناعة للمرشح الاستاذ محمد فوزي هل بالنسبة لك كناخب كنت تريد ان يضع شئ اخر في الاولوية
أ.ثروت شلبي: من المسلمات ما يقوله الدكتور عماد دا مراحل مش اولوية المفروض من اولويات البرنامج والمرشح ورجل الدولة يستطيع ان ينقذ هذا الوطن من الاغراق والفوضى الخلاقة التي تستهدف الدولة واسقاط هيبتها داخليا وخارجيا وعندنا نموذجين نموذج احداث العباسية بالمذابح المستمرة من انصار حازم ابو اسماعيل وطلبة الجامعة
سحر ناجي: يعني افهم انك بتعطي الاولوية للامن
أ.ثروت شلبي: لهيبة الدولة واستعادة الوحدة والالفة بين المصريين اولا ثم استرداد هيبتنا في الخارج لكن التقنيات في الزراعة والصناعة والكلام دا مهم عشان نعمل مشروعات التنمية .. دلوقت انا عاوز اخرج الشعب من حالة الاغراق منذ الثورة بتاعة 25 يناير
سحر ناجي: مفيش شك ان الامن لا يقل اهمية عن الزراعة لانه الزراعة هي اللي هياكلنا .. دكتور عماد الامن في برنامج دكتور محمد تصوره ليه وعودة هيبة الدولة
د.عماد الشرقاوي: انا مش مختلف مع ثروت بيه خالص بس هو الفكرة ان الامن والمظاهرات بتعتبر من المسلمات دلوقت الامن دا حاجة مفروغ منها لكن انا بعتقد انه حكاية الامن دا ان شاء الله نوصل ليها ودا مش اهتمام الدكتور محمد فوزي فقط دا بالعكس هو مهتم جدا بالامن ولانه حاسس انه مفيش اي مشروع هيشتغل من غير امن ولكن الشعب المصري عايز رئيس يعمله مشروعات عملاقة يتجمع حواليها ومن خلالها يكتسب الامن لانه فيه فرص يعني هي الفوضى جاية منين ..؟ عايز اقولكم امن الثورة تقريبا حققت اهدافها بنسبة 90% لانه اهم اهدافها هو التغيير في الفكرى انه الناس بقى عندها حلم انه يبقى فيه رئيس لجمهورية ومحمد بيه بيقول احنا مش عايزين نقطع احلام اشخاص وفكرة التوريث انتهت وفكرة انه الشعب يبقى جبان انتهت فكرة التغيير بقت قائمة فان شاء الله دي مراحل وانا اعتقد انه في كل الثورات هتنتهي هتنتهي وانا ما بشككش في كلام ثروت بيه خالص ولكن اذا اتكلمنا عن رئيس جمهورية استراتيجي الامن كلهم اتكلموا عن الامن على فكرة لكن هو كمان اتكلم عن المشروعات العملاقة اللي توارثناها من 200 سنة او اكتر تعالوا نشوف نتيجة التجربة اللي اهتم بيها تجربة محمد علي او تجربة طلعت حرب او تجربة المصانع العملاقة اللي عملها جمال عبد الناصر هو دا محل تفكيره واهتمامه من قبل ما ينوي على الرئاسة هو دايما بيفكر في استراتيجيات كبيرة ازاي اخرج من الوادي الضيق ازاي اعمل مصانع كبيرة فكرة الهرم كان دايما يكلمنا فيها انه اهم حاجة في بناء الاهرام انه كان مشروع كبير التف حواليه قدماء المصريين .. فكرة ان انا اجمع الناس هي اكبر من المصنع نفسه انك تجمع كتلة بشرية تعمل انتاج وتعمل علاقات
سحر ناجي: استاذ ثروت بتتفق في هذا الكلام ولكن بتحث على ضبط ايقاع الشارع المصري لانه مش ممكن تطبيق حاجة من دول الا بضبط ايقاع الشارع
د.عماد الشرقاوي: بس ما تحسسنيش انك عايز رئيس جمهورية عسكر لانه لما بتقول كلمة الامن كانك بتفرض عليا انك عايز رئيس عسكري
أ.ثروت شلبي: لا الحقيقة تجربة العسكر من عام 52 والعسكر نوعان عسكر قوات مسلحة وعسكر شرطة بنوعيهم طبعا المرشح اساسه ضابط شرطة ولكن فكره مدني واشتغل في المحليات
سحر ناجي: طيب هو كمرشح ورجل شرطة لم يفكر في اولوياته لموضوع الامن ولكن اعطى الاولوية للزراعة مش غريبة دي
أ.ثروت شلبي: انا ارى ان الاستقرار الامني هو الجاذب للاستثمار النهاردة ارقام مخيفة الاستثمار خرجت استثمارات ب10 مليار اولا انا اساسا اقتصاد فبالعكس اللي قاله الدكتر عماد هو استاذنا انا متفق معاه تماما فيه بالعكس هو اشار لنموذج محترم طلعت حرب واللي عمل السينما والبنوك والنهضة ولكن النهضة مش بمفهوم الاستثمار الاسلامي النهضة وطنية خالصة .. طلعت حرب قال كلمة مهمة جدا قال ان الاستقلال الاقتصادي اهم من الاستقلال السياسي بدليل الرئيس الراحل انور السادات قبيل الحرب لما لقى الروس بيتراجعوا معاه في موضوع الاسلحة قالهم برة والنهاردة ما تقدريش تقولي لامريكا برة لانها دخلت وعاملة احتلال اقتصادي فاحنا عاوزين استقلال اقتصادي بامكانياتنا ولدينا القدرات والتنمية مش عاوزين مشروعات تتحسب زي وادي الملاك وغرب النوبارية ويموت ويتعمل موضوع تاني في الصالحية وعثمان احمد عثمان والامن الغذائي وتوفيق احمد اسماعيل والشيخ رشاد عثمان .. لا .. عايزين مشروعات مش مرتبطة باشخاص مشروع قومي الحلم القومي يعني زي مشروع سينا يعني كان فيه واحد بلدياتي الواء شلش هذا الرجل انا عامل معاه حوار قبل ما يموت .. كان فيه مشروع عامله الجنزوري اللي هو رئيس الوزراء خطة تنتهي في 2017 وقال انه زراعة سيناء بالبشر اهم من الحجر ودول هيبقوا الامن القومي عشان مفيش اي عدو استراتيجي ما يفكرش يخش .. تعالي بقى نجيب ملايين نضخها ونحرك المية من الوادي عشان تخش جنوب سيناء وتصحرات وتعدي تحت القناة وتضخ في المنطقة بتاعة شرق التنفريعة وراء بور فؤاد منطقة رخوية حتى الناس العسكريين يقولك الدبابات ما تعرفش تمشي فيها كان وجهة النظر انه يتضخ المية في مواشير عشان تدخل المية على بالوظة .. عشان كده احنا نفعل الموجود احنا عاوزين حاكم رشيد عادل بيحب البلد وبيحب شعبه عار فة المية بعد دا كله راحت فين مزارع سمكية وراء بور فؤاد وما استصلحش بيها سيناء
سحر ناجي: فكر دكتورمحمد فوزي في تطوير سيناء
د.عماد الشرقاوي: انما الملف الامني دا ملف مهم جدا وهو موازي لكل المشروعات عشان بس محدش يدرك ان احنا عايزين ناخره ولكن بناء شخصية الانسان اللي هي جزء من المجتمع العالمي لما بيرتبوا الاولويات بيقولوا ان اهم حاجة في تكوين الشخصية او تكوين الشعوب قالوا الهوا والمية والاكل وبعدين الامان ودكتور محمد هو رجل امن لكن التنمية الادارية بتاعته الشخصية اللي اهلته انه يفكر في رئاسة الجمهورية دايما بيفكر على انه الانسان اللي بيسرق والناس اللي بتتشاجر دا لانه الناس تعبانة لكن طول ما فيه خير طول ما الناس بتسعى في الخير المشاكل بتقل ومهما تحطوا طوق من الحديد والناس مخنوقة حتى الدين احيانا بيبرر خطأ الاشخاص لانه جعان عايز اوصل لنقطة
أ.ثروت شلبي: لكن انا مش عايز شيخ عرب انا مش عايز درويش انا عايز قوة الدولة والدولة القانونية بمفهومها ومؤسساتها وهيبة استقلال القضاء ما اروحش اضرب المجلس العسكري
د.عماد الشرقاوي: احنا مش مختلفين بس مش بطريقة شيخ العرب.. شيخ العرب له قيمة بس بيحل مشاكل ساعات الدولة ما بتحلهاش ولكن دكتور محمد باصص لسينا نظرة كاملة متكاملة شايف قناة السويس لازم نطبق فيها انظمة جديدة لازم نطبق نستغل التجارة العالمية ونعمل لوجيستكس حواليها والناس تحس بيقمتنا وقيمة القناة انها مش مجرد بوابة بناخد عليها فلوس شايف ان الرملة بتاعة سينا العالم كله بيتهافت عليها عشان بيطلع منها السليكون لازم يكون فيه تكنولوجيا احنا نستفيد منها مش ياخدوا المادة الخام يصنعوها ويرجعوهالنا شايف انه لازم يكون فيه قوة بشرية لازم يكون فيه توازن في سينا بيتكلم في جهة اخرى عن منخفض القطارة يعني انا الحقيقة عاجبني في البروجرام انه فيه مشروعات عملاقة تخدم لمئات من السنين القادمة ومفيش فيها حاجة شخصية ليه بقى ..؟ دايما اللي بيفكر في مشروعات طويلة كده بيبقى ناكر ذاته وبيبقى باصص للشعوب اكتر لازم يبقى فيه خطط قصيرة المدى وطويلة المدى .. القيم هنا قيمة الفرد طول ما تعلي قيمة الفرد كل ما الناس دي بتبني يعني احنا عاملين حملة انتخابية متواضعة من غير ولا مليم كلهم ناس مقتنعة محبة ايه رايك انه لما حد يعلق بوستر معاه 100 بوستر بيعلق ال100 بوستر لو جبت واحد بالفلوس ممكن يال100 بوستر يعلق بيهم 10 فاحنا عندنا اشخاص عايزين نقنعها بالمسئولية
سحر ناجي: ذكرت في البداية الصناعة وتطوير الصناعة ومن ضمن ما قراته في برنامجه الانتخابي الاهتمام بالقطاع العام والمشروعات كثيفة العمالة زي ايه
د.عماد الشرقاوي: يعني عندنا مصانع الغزل والنسيج دي .. مصانع الحديد والصلب فيه صناعات عملاقة بتحتاج عمالة وهو عنده رؤية جميلة ان الصناعات اللي بتحتاج عمالة سواء في المصنوعات الصغيرة او منتهية الصغر لازم يكون ليها حماية قانونية ما يجيش المستثمرين يضيعوا الاشخاص دي على سبيل المثال لو انت عندك قطاع المستثمرين الصغيرين بيعملوا الصناعات الصغيرة او المشروعات الصغيرة امنع شركات عالمية تيجي تستثمر في نفس المجال دا عشان احميهم .. النهاردة الفلاحين الغلابة بيربوا شوية فراخ بيعملوا مزرعة صغيرة هو ينفع نجيب لهم حاجة من برة فراخ مستوردة عشان هي ارخص..؟؟ هو عنده رؤية للناس دي ادعمهم اخليه يكسب لما حد بينتج اي منتج صغير ما اجيبلوش شركة عملاقة تنتج جنبه وتضيعه لازم ابقى انا ابقى مؤمن ان الجزء دا والمساحة دي سايبينها للناس دي يبقى عندي جيل بينتج في البيوت ادعمه واعمله تسويق خاص
سحر ناجي: يعني تمنع منافسة المنتج الاجنبي لصالح الصناعات الصغيرة
د.عماد الشرقاوي: اي حد ضعيف عندك لازم تحميه من القوي وما تديش فرصة للقوي انه يمسحه فهو عنده نظرة انه ازاي يغير الصناعة دي بدل ما تبقى صناعات عملاقة فقط .. لا الصناعات العملاقة دي تبقى مبنية على الصناعات الصغيرة لو انت عندك مصنع كبير بيصنع سيارات ايه المانع اني اعمل مصانع صغيرة تصنع الاكصدام او جزء في العجل او قطع في العربية وهكذا بقى وقيسي على كده في المنسوجات وغيره
سحر ناجي: استاذ ثروت تعقيبك على نقطة الصناعة
أ.ثروت شلبي: احنا مش مختلفين يعني اللي بيقوله الدكتور عماد او تجديد الطرح للمرشح دا موجود على ارض الواقع هو المشير كان بيعمل ايه في سينا امبارح .. المنطقة اللي هي المفصل الخالي اللي هو وسط سيناء اللي احنا عاوزين نعمل فيها محافظة تانية وعمل فيها مصنع للقوات المسلحة والدكتور حسن راتب ليه مصنع هناك برضه والقوات المسلحة ليها مصانع اللي هي قرية "ياميت" فيها مصانع للزيت والزيتون والعصاير كل البرامج دي موجودة النهاردة طرح من الحكومة المؤقتة يعملوا منطقة حرة من طابا لغاية نويبع وتتعمل مناطق حرة انا عندي خط الغاز ماشي من وسط سينا اللي كان بيروح اسرائيل وفسخنا بحمد الله نقول تجاري بحت لكن هو بارادة سياسية .. ارادت الارادة السياسية المعبرة عن الارادة الشعبية المصلحة القومية كل الامور بتنتهي انا عندي بصدر للاردن والعراق وسوريا فعندي الغاز محطوط .. النهاردة انا عامل تجارة من تركيا بالشاحنات لمواني بورسعيد ثم تعدي على جنوب شرق اسيا بدل ما تلف في قناة السويس يعني انا ارى المشروعات موجودة والدراسات موجودة ومحدش طرح من ذهنه مع احترامي لكل الناس؟؟ كل الناس المرشحين وطنيين لكن المشروع دا اقترحته حكومة الجنزوري وهو وزير تخطيط قبل ان يتولى رئيس وزارة لما الجنزوري مشي جه عاطف عبيد صدر الغاز لاسرائيل ودمر المشروع عشان المشروع دا ما يسماش مشروع الجنزوري
سحر ناجي: يعني المشروع ما يرتبطش بفرد يرتبط باجيال
أ.ثروت شلبي: المشروع دا قيمته من 97 الى 2017
سحر ناجي: دا بيرتبط بنقطة مهمة جدا بثقافة الشعب وفي نفس الوقت بالتعليم
أ.ثروت شلبي: بس ايه اللي اعاق موضوع تنمية سينا .. اللي اعاق التنمية هو تخوين ابناء سينا والناس دي وطنية وانا اعرفهم رملة رملة من الشمال للجنوب الناس دي اللي حمت البلد الناس دي اللي كانت بتدي للواء نصار رئيس المخاتبرات العامة ورئيس المخابرات الحربية ابان حرب الاستنزواف كل المعلومات اللي نجحت بيها حرب اكتوبر لكن الامن مش بيدوهم حق الانتفاع ولا الملكية بيتعاملوا معاهم كاجانب وعدم دخولهم السلك القضائي وسلك الشرطة والقوات المسلحة احنا لازم يرجع الاول النتماء .. ازمة مصر ليست ازمة سياسية ولا اقتصادية وانما ازمة اخلاقية ولازم نعيد القيم ونتربى كلنا وطنيين
سحر ناجي: اعادة القيم برضه لن تنبع الا بالتعليم عايزة اعرف التعليم بالنسبة لبرنامجكم بيشمل ايه بالظبط
د.عماد الشرقاوي: استاذن تعليق على الكلام انه الدكتور محمد له نظرة شخصية للاتفاقيات الدولية انها ملزمة واننا لن نعيش بمعزل عن العالم الا انه كان له راي شخصي في موضوع تصدير الغاز هو بيرى ان الغاز ما صدروش الا لما اشوف احتياجات الصناعة واحتياجات الوطن في فترة كبيرة قادمة ولما اتاكد ابقى اعمل الكلام دا هو بيرى ان دا قصور في الاتفاقيات السابقة وبرضه هو بيرى حاجة جميلة وبيعلمنا انه العصف الذهني اللي عنده انه ناس فكرت لمدة 50 سنة وهو بيحيي هذا العصف تاني يعني كان فيه مشروعات كبيرة زي منخفض القطارة هو بيتبناه رغكم ان البداية مش من عنده جايز مشروع توشكى جايز مشروعات تانية .. هو اول واحد اتكلم عن برنامج واتتكلم عن ديكتاتورية المؤسسات ومعناها انه بينكر ذاته وبينكر وجود الشخص هو بيرى ان التعليم كل الناس بتنادي على انه شعار بل فيه بعض رؤساء الدول اللي كسبوا الانتخابات بيقولوا ان الاولوية للتعليم هو بيرى ان التتعليم يساوي الاتقان مش انه اجري وراء تكنولوجيا بالرغم من انه جيل التكنولوجيا المفروض اتبناه لكنت انا بنقل لك رايه الشخصي التعليم يعني اتقان لو حد بيعرف يقرا المفروض يقرا كويس لو بيسمع .. يسمع كويس يبقى فاهم قيم الاحترام
سحر ناجي: البلد فيها نسبة امية ايه فكره في هذا الامر
د.عماد الشرقاوي: فكرة الامية جت عشان مفيش اتقان يعني فكرة المية احنا مختلفين عليه يعني تصوري انه فيه بعض الدول بيقرا ويكتب ويقوله برضه امي لانه القراءة والكتابة ما افاديتوش بحاجة يبقى مازال امي طب وطه حسين كان كفيف لكن ما تقدريش تحسبيه من الامية فالتعليم منظومة متكاملة اتكلم عن محاور بيتكلم عن التلميذ وبيتكلم عن مناهج مواطبة للعالميات بيتكلم عن منظومة كاملة متكاملة شايفة سوق العمل عايز ايه طبعا الكلام دا كله موجود في الكتب لكن هو بيؤمن بدور خبراء التعليم
سحر ناجي: هل المناهج اللي بيتحدث عنها مواكبة للعالميات هي بيعني دولة بعينها عايز يقلدها او ينقل لينا تجربتها في التعليم ولا تارك الامر لخبراء هينتقيهم
د.عماد الشرقاوي: الاكيد اللي حصل انه كان فيه مستشارين وعرض عليهم الامر وندخل ولا ما ندخلش انتخابات وهو الحقيقة فيه ميزة جميلة انه بيحب يسمع يعني هو مش بيحب يتكلم كتير وسمع الرؤى كلها ولقى انه فيه تجارب لازم تطبقها انت نفس المناخ وفيه تجارب ما ينفعش تنفذها لانه الفرد مختلف عن الفرد والبنية الاساسية مختلفة فانت لازم تعمل حاجة تفصيل طبقا لمجتمعك والتحديات اللي انت بتقابلها وتاخد وقت صغير في انك تقفز بسرعة وهو دايما بيقول انه مهما كانت الامكانيات قليلة طالما فيه رؤية فيه رسالة فيه اهداف هنوصل بدليل كلنا في الول حسينا ان احنا في بحر وانه مفيش امكانيات مفيش حد بيدعمنتا خالص وبعد كده لقينا قبول والحمد لله في قبول الحملة وانتشارها
سحر ناجي: استاذ ثروت عقب على موضوع التعليم
أ.ثروت شلبي: التعليم نقطة الارتكاز المعلم لازم اعد المعلم واؤهله تربويا لانه دا الرسول ودا حلقة الاتصال فالنتيجة كلها في المعلم ياخد حقوقه الاقتصادية او التربوية لاداء عمله زي زمان واديله ما انزعش منه سلطة الردع يعني مش بالضرورة يعذب الطالب لكن يخاف منه الطالب الهيبة احنا عاوزين هيبة المدرس تعود لكن مش الطالب يهزر معاه عشان الدروس الخصوصية ويشربوا مع بعض سجاير...
في موضوع الغاز اللي قال عليه الدكتور اولا الغاز لا يخزن مادام تم استكشافه بالتالي العصابة اللي كانت حاكمة مصر عملت تصدير عشان تجيب نقد اجنبي عشان نغطي العجز ومصروفاتها وصناديقها لكن انا محتاجه لمشروعاتي انا ماسك البترول انا عندي الخبرة في البترول يعني ممكن نطلع منه قيمة مضافة يعني الاسمدة بتطلع من غاز الامونيا من الغاز وبعدين ببيعه بسعر قليل وبيصدروه بالدولار
سحر ناجي: كان بقول ان تصدير الغاز بيتم بعد تحقيق الاكتفاء الذاتي دا برنامجه ... بشكرك استاذ ثروت شلبي الكاتب الصحفي بجريدة الاهالي والدكتور عماد الشرقاوي مخطط السياسة الالعامية للمرشخح الدكتنور محمد فوزي عيسى اشكر حضرتك وغدا حلقة جديدة من مساحة للراي مع برنامج لمرشح رئاسي اخر شكرا لكم