محمد صلاح: يا مساء الخير فسيحة الأقطار متنوعة الثمار عجيبة التركيب آخذة من كل حسن بنصيب دا اللي قاله ابن بطوطة بعد ما زار دمياط ، دمياط الاثاث الكلمة المشتركة بين اي عيلتين لو عايزين يتصاهروا دمياط وارتباطها الطبيعي مع راس البر المصيف العبقري القديم العشش الشهيرة لصفوة المجتمع من اهالي القاهرة واهل بحري اللي صيفت فيه ام كلثوم واسمهان واحمد رامي ومحمد عبد الوهاب ومحمد التابعي الملكة نازلي وصدقي واحمد ماهر والنقراشي مكرم عبيد ومصطفى النحاس ، العرابي والهلالي وعبد الله بك اباظة وتوفيق الحكيم وسليمان نجيب يعني اهل الفن والصحافة والسياسة كتير من الوزرا وباشوات زمان راس البر اللي سميها المقريزي "مارك البحرين " .. مكان لقاء النهر العذب مع رحلة طويلة جدا من البحر المالح راس البر دلوقت بقت مارينا البسطاء اللي بتنافس مارينا الاثرياء اللي على الساحل الشمالي دمياط محط اعجاب الجميع بناسها وتركيبها بجوامعها وكنايسها بكورنيشها وبحرها بنضافتها واثاثها بميناءها دمياط اللي كانت نجمة الاخبار طول السنة اللي فاتت بسبب مشروع اجريوم واللي جديرة السنادي انها تكون نجمة التحليلات والدروس المستفادة وازاي تكون العلاقة بين المجتمع الاهلي والمحافظ وبين المحافظ والحكومة وبين الحكومة والاهالي الحراك الاجتماعي اللي بيشوف ويسمع ويتكلم ويفهم ويحقق هدفه باكبر قدر من الحرية والاصرار والالتزام المحافظ اللي المفروض انه يطبق تعليمات الحكومة يقوم يقول لحكومة لا ..وكمان يجبر الحكومة على تغيير خططها المحافظ والمحافظة اللي قالوا للحكومة لا ..هيكون لينا عنهم النهاردة كلام .... مسئول فاصل محمد صلاح: دمياط واحدة من اهم نوافذ مصر على البحر المتوسط ولما اهلها استغلوا عبقرية المكان اسسوا لنفسهم مكانة ،معادلة السهل الممتنع المكان اللي منور بناسه فبقت يابان مصر وبقت حلم للمحافظات التانية محافظة البحر والنهر والبحيرة ومعاهم التنوع الثقافي والصناعي والاقتصادي اللي بيحصل فيها النهاردة هيكون لينا مع محافظ دمياط الدكتور فتحي البرادعي كلام مسئول ,ومن كلام محافظ دمياط الدكتور فتحي البرادعي نسبة البطالة في دمياط تبلغ 3.5 فقط وهذا الرقم يعني ان اقتصاد المحافظة اقوى من الاقتصاد المصري - من حق دمياط ان يكون لها جامعة مستقلة وابناء المحافظة لن يتراجعوا عن دعم مبادرة الحكومة في بناء جامعة دمياط - وهب الله محافظة دمياط موقعا عبقريا اضافة الى عامل بشري قوي ونشيط وميناء يساعد على التصدير بسهولة لهذا كان لها الريادة في صناعات هامة في مقدمتها صناعة الاثاث التي يعمل بها 600 الف عامل - كان لدينا 13 منطقة عشوائية عبارة عن برك ومستنقعات وقمامة وبالطبع امراض كثيرة تم تطويرها وانا فخور بهذا الانجاز لان هذه المناطق بعد تطويرها اصبحت تضم ورشا للتصدير قدمت ملايين الدولارات للاقتصاد القومي - الانسان الدمياطي هو رهاننا الاول لانه انسان منتج يقدر قيمة العمل وهو الذي يجعلني اقول بكل فخر ان ماتم في راس البر ودمياط وكفر سعد وفارسكور حدث دون ان تتحمل الدولة جنيها واحدا كلها من مواردنا الذاتية اذا كان مشروع اجريوم لفت ليها الانظار فالعين مغمضتش طافت وشافت حاجات تانية كتير لكن مشروع اجريوم وصل لفين والصيادين في دمياط اللي رجعوا من الاسر الطويل عملوا ايه وعملولهم ايه .. اثاث دمياط المشهور هيفضل ولا هيرجع ياخد وضعه على خريطة الاثاث في العالم ..كورنيش النيل وراس البر واللسان ..عن قلب دمياط هيكون لينا مع محافظ دمياط الدكتور فتحي البرادعي كلام ..... مسئول فاصل محمد صلاح: ارحب بمحافظ دمياط الدكتور فتحي البرادعي منورنا ياسيادة المحافظ..سيادة المحافظ طبيعي انه المحافظ اللي يطبق تعليمات الحكومة وسياساتها وقراراتها في بعض الاحيان بيبقى صعب قوي انه يتجاوب مع ردود فعل شعبية في مشروع ما يعني فلما المحافظ يقف مع الشعب ، شعب المحافظة ضد توجهات حكومة في مشروع استثماري كبير صناعي طبعا وهو مشروع اجريوم كانت جديدة دي د/فتحي البرادعي - محافظ دمياط: لا معتقدش انها جديدة هي مجرد ان حضرتك بتقتنع ان هناك قضية ما المجتمع توافق عليها وطالما اقتنعت وطالما ان هناك توافق اعتقد ان من الطبيعي ان تنحاز لرغبة المجتمع وانا معتقدش ان هي كانت ضد رغبة الحكومة بالمفهوم اللي حضرتك طرحته لانه كان هناك تفهم من الدولة كلها واعتقد انه اكبر دليل على كده انه من شهر ونص تقريبا كان عندنا سيادة الريس مشرفنا في دمياط واعلن انه من اللحظة الاولى كان منحازا للناس في هذه القضية فبالتالي ماهياش معارضة للحكومة بالعكس هو انحياز للناس وانا عايز اقول لحضرتك اجمل ماكان في هذه القضية انها لم تاخذ لون سياسي يعني مكنتش حضرتك تقدر تقول ان هناك اتجاه ما يتبنى هذه القضية انما كانت المجتمع الطبيعي هو صاحب القرار فيه محمد صلاح: يمكن دا اللي سهل عليك الموضوع انه مش تيار سياسي معين اللي تبنى رفض اقامة المصنع داخل المدينة ؟ د/فتحي البرادعي: لا مكنش فيه تيار سياسي بالعكس يعني اذا كان حضرتك بتتكلم عن الحكومة الحزب الوطني كان في المقدمة محمد صلاح: في مقدمة المعارضين للمشروع د/فتحي البرادعي:ايوة ..وبالتالي .... محمد صلاح: امال الحكومة كانت ليه لوحدها كده ؟ د/فتحي البرادعي:لا هي الحكومة مكانتش لوحدها بالمفهوم دا الحكومة شعرت ان هي لازم تعمل تسوية ما بما لا يضر المجتمع و ما يضر باموال المجتمع وبالتالي خدت بعض الوقت عشان تقدر تحل المشكلة والحمد لله يعني تحققت وكل اللي كان مطلوب تحقق ... محمد صلاح: الخلفية الاكاديمية ليك دكتور فتحي كاستاذ للتخطيط العمراني في هندسة عين شمس فادتك في معالجة القضية ؟ د/فتحي البرادعي:شوف حضرتك مؤكد انها فادتني في كل حاجة مش بس في هذه القضية لانه رؤية المخطط عادة تبقى فيها نوع من الموضوعية والنظرة العامة للامور يعني ما بتبقاش الجزئيات ، بيبقى عندك حس عمراني شامل وبالتالي بتقدر تشوف تروح فين يعني الطريق بيبقى اكثر وضوحا فمؤكد ان هذه الخلفية نفعتني مفيش كلام محمد صلاح: فادتك ازاي بقى على مستوى اعادة تخطيط دمياط والمدن التابعة للمحافظة واعادة تاهيلها ؟ د/فتحي البرادعي:انا اعتقد ان اهم حاجة ان احنا عندنا اللي بنسميه الخريطة الرئيسية بتاعة المحافظة والخريطة الرئيسية بتاعة المحافظة كانت مرتبطة ارتباط كبير جدا بهذه القضية فيه عندنا خريطة للمحافظة بكل الانشطة اللي فيها لانه الخلاف في هذه القضية اللي حضرتك اثرتها انا بس عايز اوضح انه لم يكن خلاف على ملكية ارض وانما كان خلاف على استخدام هذه الارض يعني انا باقر بملكية حضرتك لهذه الارض لكن بقولك من فضلك هذه الارض في موقع لا يسمح الا بالاستخدام السياحي فهي ملكك بس استخدمها سياحي مش صناعي هنا دي ابجديات التخطيط العمراني اللي هو استخدامات الاراضي وبالتالي انا عندي خريطة للمحافظة والخريطة دي انا اعتقد ان من اول مارحت كانت واضحة ولو رجعت حضرتك للموقع دا بالذات في بداية المخطط هتجد انه موجود موقع سياحي وبالتالي احنا بنحترم هذه الخريطة مدينها وضع مقدس الخريطة دي عشان تتغير لازم يكون فيه معطيات كثيرة محمد صلاح: طب طالما حضرتك جبت سيرة الخريطة الموقع اللي نقل اليه على بعد 3 او 4 كيلو من المكان هل في الخريطة الرئيسية انه كان يقام في هذا المكان مشروع صناعي كبير ؟ د/فتحي البرادعي:انا هقول لحضرتك بس عشان هو فيه خلط في الجزئية دي المصنع ما نقلش على بعد امتارا زي ما قيل ..القضية انه المكان دا اللي هو كان هيتعمل فيه المصنع كان مفترض انه يكون اكبر مجمع او واحد من اكبر مجمعات البتروكيماويات في العالم مش مصنع واحد- دي مساحة- النهاردة المشروع اللي اتعمل فيها 980 فدان ، ال980 فدان دول كانوا يتحملوا 25 مصنع زي مصنع اجريوم الصراع الحقيقي انه المجتمع كان عايز يحول دون ان يقام هذا المجمع مش اجريوم لوحده .. اجريوم لوحده يمكن كان قابل للنقاش لكن ان كل هذه المساحة تتحول الى اكبر مجمع بتروكيماويات في العالم او واحد من اكبر هذه المجمعات هنا هو دا الصراع الحقيقي مش مصنع واحد فلما تيجي حضرتك تقول اصل المصنع اتنقل ..لا.. هو مش المصنع اتنقل هو ماعادش هيتعمل هذا المجمع الضخم اللي هو كان ممكن يبقوا 25 و30 مصنع زي اجريوم دا بالاضافة الى انه جزيرة راس البر اصبحت النهاردة كلها جزيرة سياحية والموقع اللي قيل انه هينقل اليه –هو لم ينقل حتى الان – لكن المكان التاني... محمد صلاح: وهو هينقل؟ د/فتحي البرادعي:لا انا التفاصيل معرفهاش لكن عايز اقول لحضرتك حتى لو نقل ، المكان اللي نقل اليه عشان برضه السؤال بتاع حضرتك هل دا موقع من الاصل ممكن..ايوة دي منطقة صناعية بتاعة المينا محمد صلاح: يعني مفيش التفاف على رغبة الناس ؟ د/فتحي البرادعي:اطلاقا ..الموقع الاخر دا دي المنطقة الصناعية بتاعة المينا ..المنطقة دي كل مساحتها فيها 15 مصنع كل مساحتها 196 فدان فيها ال 15 مصنع يعني مهما امتد لو اتعمل جزء من المصنع اللي يقال عليه دا برضه ما بيشكلش قضية كبيرة لانه محاصر ب4 اسوار انما المشكلة في جزيرة راس البر هي الجزيرة ماحتها 4000 فدان كان المنطقة الصناعية فيها 980 فدان يعني الف فدان من 4000 لو اتعمل فيها هذا المجمع كانت الجزيرة دي راحت انما في الموقع الاخر المسالة محصوة على ان هي منطقة صناعية تابعة للميناء من الاول محمد صلاح: بس يافندم الناس كانت خايفة من التلوث ومن الاشعاعات او من الابخرة ؟ د/فتحي البرادعي:المشكلة حقيقتها كانت في المياه اللي هتلقى في البحر المنطقة الصناعية سواء اتعمل فيها او ما اتعملش بتبقى مجهزة بصرف صناعي يعني مفيش القاء في البحر ماهو فيه مصناع تاني مشابه حضرتك عارف احنا مجتمع قايم جزء كبير منه على الصيد وعلى السياحة لما تلقي في البحر بمخلفات معناها ان الشاطئ هيتلوث والسياحة هتتاثر حضرتك دي نقطة حط تحتها خطوط كتيرة جدا في هذا المشروع لما اثير انه هيلقي في بحر بس هو بيقول انا هالقي على مسافات بعيدة وغيره محصلش اقتناع ..انما المنطقة الصناعية مجهزة بصرف صناعي وبعدين دا كان بياخد مية مباشرة من النيل ، المنطقة الصناعية فيها مية لوحدها مابتاخدش مباشرة من النيل فهي مسالة انه يلقي في البحر او ياخذ مياه النيل كانوا قضيتين اساسيتين في الاعتراض على المشروع لانه الانبعاثات حتى التكنولوجيا الحديثة قدرت الى حد كبير جدا تتحكم مانقولش بنسبة 100% لكن تتحكم في هذه الانبعاثات وبعدين فيه محطة رصد بيئي بتقام ممكن طبعا لو حصل حاجة في الرصد البيئي هيتقفل المصنع مش مشكلة بالنسبة للانبعاثات لكن باقي القضية اللي هي الالقاء في البحر..... محمد صلاح: ما الناس بتخاف يافندم انت عارف هنا مصانع اسمنت في طرة قرب حلوان عمالة تطلع انبعاثات وتيارات وابخرة بقالها 7 الاف سنة والناس عمالة تلقي في النيل برضه ...؟ د/فتحي البرادعي:كل اللي حضرتك بتقوله دا صحيح طبعا لكن في النهاية لم يعد هناك خطورة من اقامة اكبر مجمع داخل الجزيرة ، الجزيرة النهاردة والزيارة الاخيرة لسيادة الريس كان الهدف الرئيسي فيها اعلان ان جزيرة راس البر جزيرة سياحية للاستخدام السياحي فقط وسيادة الريس راجع المخطط السياحي لارض اجريوم سابقا 918 فدان واقر هذا المشروع وبالتالي الحمد لله النهاردة اصبحت جزيرة سياحية وانا عايز برضه عشاان حتة الحكومة زي ما حضرتك بتقول انا عتقد ان الحكومة انتصرت لابناء دمياط محمد صلاح: انتصرت لابناء دمياط من مين....؟ د/فتحي البرادعي:من أي وضع كان هيحصل المصنع اللي كان قادم لانه كمان مطلوب انه رغبة ابناء دمياط تحقق بس باقل خسائر ممكنة وبالفعل لم تحدث خسائر وهو دا اللي خد بس وقت لكن في الاخر الرغبة اتحققت وهناك اقتناع انه فعلا استخدام هذه الارض يجب ان يكون في السياحة والحمد لله ان المجتمع كله اطمان الى ان جزيرة راس البر جزيرة سياحية محمد صلاح: يعني دمياط كلها مطمئنة ظ د/فتحي البرادعي:باذن الله باذن الله محمد صلاح: خليك معانا سيادة المحافظ لسه الكلام مخلصش فاصل محمد صلاح: سيادة المحافظ فتحي البرادعي بيقول انه كل دمياط مطمئنة الحمد لله سيادة المحافظ عندنا وجهة نظر اخرى في موضوع اجريوم برضه نشوف مع بعض د/فتحي البرادعي:طبعا محمد صلاح: نشوف أهل دمياط بيقولوا ايه فاصل مواطن1:رافضين مصنع اجريوم والحكومة ضحكت علينا وقالت انه اتلغى وهو ما اتلغاش مواطن2:مصنع اجريوم دا دمار شامل لجميع فئات الدمايطة لان هما النهاردة بيتاثروا تاثير قوي جدا بسبب ان هو هيؤثر على الاقتصاد هيؤثر على الصحة ومفيش اكتر من كده هيؤثر على الانسان مواطن3 : المصنع دا فيه ضرر كبير على اطفالنا وعارفين ان فيه نسبة تلوث كبيرة لينا ولاطفالنا ياريت ان المصنع دا يكون بعيد عن دمياط مواطن4: هيضر دمياط من جميع النواحي من ناحية ان دمياط بلد صناعية وبالنسبة للسياحة مواطن5: المفروض يتنقل في أي مكان تاني بعيد عن البلد خالص حتى لو في الصحراء الغربية بعيد عن البلد خالص في أي مكان صحراوي فاصل محمد صلاح: هي الناس في دمياط مش عارفة ان المصنع اتنقل ولا ايه ، الناس مش عارفة ولا ايه يا سيادة المحافظ د/فتحي البرادعي:والله انا عايز اقول لحضرتك حاجة هو الكلام دا يمكن يكون قديم شوية محمد صلاح: لا احنا صورناه اول امبارح. د/فتحي البرادعي:معلش يمكن الناس معندهاش فكرة بالظبط انا يمكن قلت لحضرتك في البداية انه الاعتراض الحقيقة كان على انه يقام واحد من اكبر مجمعات البتروكيماويات في العالم محمد صلاح: يعني اجريوم دا كان نواة ليه ؟ د/فتحي البرادعي:بالظبط يعني دا كان واحد من 25 مصنع كان ممكن يقاموا على ارض هذه الجزيرة النهاردة الجزيرة خلاص بالكامل هو يمكن سايبين شوية مكاتب وحاجات كده ماتشالتش لكن الجزيرة نضفت تماما المنطقة الصناعية الاخرى دي منطقة كانت قائمة من الاول وزي ماقلت لحضرتك دي مساحتها لا تتحمل وحدة واحدة حتى من هذا المصنع مش ممكن ولو أن هناك اي محاولة للتوسع خلاص المنطقة مقفولة ومستقرة ولا يمكن هيحصل فيها توسع فانا الكلام دا قلته لحضرتك من قبل حتى ما تعرض فانا عايز اقول لحضرتك ان احنا مطمئنين بالله ويكفي انه اكبر مجمع بتروكيماويات في العالم خرج من جزيرة راس البر محمد صلاح: سيادة المحافظ انت عملت كورنيش كانت دمياط مفيهاش كورنيش الاول مش كده ازلت عشش وازلت اكشاك وازلت كافيتريات عادة الناس بتقاوم التغيير حتى لو كان للصالح العام انت عالجت القضية دي ازاي لانها منتشرة في اكتر من محافظة ؟ د/فتحي البرادعي:انا هقول لحضرتك اولا حتى هذ اللحظة احنا الحمد لله عندنا 8 كيلو كورنيش من دمياط ، الكورنيش دا معدش عليه حتى كشك سجاير معدش عليه أي منشاة اطلاقا هو ملك للناس كلها حتى هذه اللحظة لم يصدر قرار لا من المحافظة ولا من مجلس المدينة بازالة ما كان قائما دا معناه ان الازالة تمت بالتوافق المجتمعي ومع اصحاب هذه المنشآت كنت حضرتك تقدر تمشي على الكورنيش زمان في دمياط مكنتش تعرف ان النيل موجود هنا من حجم الاشغالات اللي موجودة اللي حاجبة النيل تماما النهاردة الحمد لله تماما لم يعد لها اثر وكلها ازيلت بالتوافق مع اصحابها لا قضايا ولا دعاوى ومفيش عسكري نزل مفيش موظف حتى من مجلس المدينة نزل لكن المجتمع كله بالحوار ما احنا خدنا وقت طويل للحوار مع اصحاب هذه المنشات كل هذه المنشات ازيلت بقول لحضرتك لم يصدر قرار حتى هذه اللحظة محمد صلاح: اقفاص المزارع السمكية عملت فيها ايه لانه معروف انه تجار السمك في بعض المناطق بيكونوا اباطرة و قادرين ودا بالنسبة لهم يقدروا يقولوا ان دا اكل عيشهم ؟ د/فتحي البرادعي:قضية الاقفاص السمكية انا اعتقد انها من القضايا الهامة جدا بيئيا واحنا كان عندنا في دمياط حوالي 3600 قفص النهاردة انا كنت اتمنى انك تشوف نهر النيل قبل وبعد وقد ايه الحمد لله انتهت تماما لم يعد هناك قفص سمك واحد في محافظة دمياط وبرضه دي برضه كانت بتوافق مجتمعي لان انا هقول لحضرتك حاجة انا يعني ايام ما كنا بنقول عايزين نشيل الاقفاص دي اترفعت علينا دعاوى كتيرة الحقيقة انا جيت في لحظة حسيت انه القضية مش قضية المحافظ القضية دي قضية مجتمع ان لم يكن المجتمع هو صاحبها ومتبنيها مش هتنفع لانه برضه خشيت انه يتوصل احد هؤلاء الى حكم بوقف الازالة فالحقيقة انا عملت اجتماع لكل المجتمع او لممثلي المجتمع عرضت عليهم الموضوع وقلت لهم القضية مش قضية محافظ انتوا لو عايزين الاقفاص تظل في مكانها احنا هنسيبها لو عايزينها تتشال لازم يكون ليكم راي ويعلن وطبعا عرضت كل اللي عندنا لانه طبعا فيه تقارير من المعامل المركزية محمد صلاح: تلوث يعني ؟ د/فتحي البرادعي:تلوث لمياه النهر لانه طبعا بيلقي بكل المخلفات اللي في الدنيا عشان يغذي هذه الاقفاص واحنا كل ماخذ المياه في دمياط على النهر تقريبا مباشرة فلقينا مشكلة كبيرة لانه حضرتك مهما هتطهر المية اللي داخلة المحطات فيه سقف لهذا ، كمية الكلور هي الكمية فاحنا وصلنا لنقطة كانت حرجة جدا انه ممكن لو سبنا الموضوع يتفاقم المية مش هتبقى جيدة وفي نفس الوقت السمكة نفسها تقرير المعامل المركزية بتبقى غير صالحة للاستخدام الادمي فحضرتك عندك شقين من التلوث عرضنا هذا على المجتمع لو تشوف حضرتك قد ايه المجتمع كانت له وقفة وقد ايه ان هو كان بيتدخل في هذه الدعاوى القضائية جمعيات الامراض الاورام والكبد والطفولة كل قطاعات المجتمع والجمعيات الحقيقة كان لها موقف جيد جدا وراحت تدخلت في هذه الدعاوى الحمد لله كلها حكم فيها ورفضت هذه الدعاوى جميعها والحمد لله تمكننا من ازالة جميع هذه الاقفاص ماعدش عندنا أي قفص وبالتالي التلوث اللي كان متوقع الحمد لله جيدة وقدرنا ان احنا نتفادى محمد صلاح: خليني اكلمك بصراحة سيادة المحافظ الكلام عن التوافق المجتمعي كلام جميل يمكن عملته في دمياط وتعمله في محافظات اخرى بس عادة الكلام مع المحافظ ممكن يفتح كلام يشير الى انه المحافظ بيبقى بين فكي كماشة او بين شقي رحى الحكومة من ناحية والمواطنين من ناحية اخرى والمحافظ في النهاية ايده دايما مغلولة لانه لما ياخد قرار في معظم الاحيان وزارات اخرى هي اللي بتنفذه يعني لو خد قرارفي التعليم وزارة التعليم هي اللي هتنفذه لوخد قرارفي البيئة لازم وزارة البيئة هتشتغل عليه او الري او الصحة وهكذا.. انت ازاي قدرت تخلق المعادلة دي في دمياط في مجالات مختلفة اتكلمنا عن اجريوم ودلوقت التلوث في النيل وهكلمك على التنسيق الحضاري اللي حصل في دمياط كمان د/فتحي البرادعي:انا عايز اقول لحضرتك حاجة حضرتك يمكن معنى التوافق المجتمعي استوقفك شوية ويمكن يكون تشككت في انه تحقق بالشكل دا انا طبعا متفهم تماما لانه الكلام عن المصداقية يعني فيه امور كثيرة اصبحت قضايا مجتمعية كبيرة لكن انا عايز اقول لحضرتك انه المحافظ يستطيع ان يصدر كل يوم مئات القرارات انما ماتسمعش عنها وماتتنفذش انما القرار اللي هو بيتنفذ فعلا هو القرار اللي بيحدث عليه توافق مجتمعي انه المحافظ يقول زي ما هو عايز لكن لو لم يصادف هذا القرار رغبة مجتمعية انا بتكلم عن المجتمع السوي الطبيعي محمد صلاح: مش بعض المنحرفين او المنتفعين ؟ د/فتحي البرادعي:او ناس تكون اصطدمت المصلحة العامة معاهم يكونوا ناس كويسين بس المصلحة العامة اصطدمت في مواقع يكونوا هما فيها لكن بصفة عامة انا بؤكد لحضرتك ان القاعدة المطبقة وانا بقول الكلام دا دمياط هتسمعه انه القضية كانت انه احنا احترمنا المواطن فبادلنا المواطن هذا الاحترام بمعنى احنا كنا من الذي يبدا اولا احنا عمالين نقول النضافة ماهو اصل المواطن بيرمي في الشارع ماهو اصل المواطن بيسئ الاستخدام ... محمد صلاح: هنتكلم في النضافة في دمياط. د/فتحي البرادعي:معلش انا بتكلم بصفة عامة لما جينا نطور مثلا منطقة اللسان المنطقة دي اتطورت يعني احنا بنزعم انه الحمد لله حصل فيها ارتقاء جيد بعد ما حصل الارتقاء دا كان فيه نوع من الكلام مع المجالس المحلية هل يتفرض رسم دخول ولا لا .. لانه قالوا مش معقول عملنا كل هذا العمل الجميل وفي الاخر نسيبه للناس انا شخصيا كان رايي وما زال انه يجب ان احنا نسيبه مفتوح للناس مجانا رغم ما يتردد عدد المترددين في الصيف على هذا الموقع بتاع اللسان في الخميس والجمعة يصل ل50 الف مواطن يعني انا عامل تذكرة بجنيه ب2 جنيه هيجيب مبالغ كتيرة لكن المعنى هنا انه مش مجرد انا بلم فلوس انا مش جاي جباية دا انا عندي قضايا كثيرة جدا سلوكية وثقافية ومجتمعية ممكن الموقع دا يكون مدرسة بشكل غير مباشر وفعلا خدنا قرارنا فيه لافتة انا اتمنى ان حضرتك تصورها لان هي نوع من جنتلمان اجريمنت تعاقد متفق عليه مع المواطن انت داخل مكان كويس قوي انا عايز تدخله مجانا بس من فضلك حافظ على واحد من تلاتة المواطن حس ان انت احترمته انا عايز حضرتك تشوف الموقع دا اللي بيتردد عليه 50 الف مواطن يعني فين وفين على ما هتلاقي ورقة على الارض المواطن فعلا شعر بهذا الاحترام وهو بدا يحترم الموقع وبدا يحترم المسئول عن هذا الموقع والبعض الحقيقة بيتصور انه فيه جانب مش عاوز اقول حالم شوية احنا بنتكلم ..لا..فيه حضارة 7 الاف سنة حقيقية اللي احنا بنرددها والبعض بيستخدمها كده استخدام اعلامي او اعلاني ..لا.. لما احترمنا الانسان خرج من عنده كل هذه الحضارة محمد صلاح: طب كلمنا كده في موضوع النضافة اولا هكلمك في موضوعين يتعلقوا بالنضافة موضوع التنسيق الحضاري اللي حاصل في شوارع مدينة دمياط وميادينها وعلى الكورنيش وغيره ثانيا مشكلة الزبالة ازاي دمياط مفيهاش مشكلة زبالة ومصر كلها فيها مشكلة زبالة ظ د/فتحي البرادعي:شوف حضرتك الكمال لله سبحانه وتعالى احنا الاجابة على السؤال لازم نرجع لورا شوية اللي احنا فيه النهاردة دا في دمياط وانا شخصيا بحمد ربنا عليه ربنا سبحانه وتعالى واعتقد معانا ان المجتمع شاعر بان فيه شئ ايجابي احنا بدانا مخطط من 4 سنوات عشان نصل الى هذه اللحظة اللي انا قاعد مع حضرتك فيها لما جينا لمدينة دمياط هناخدها على سبيل المثال مدينة دمياط دي من المدن اللي لما كنت تتكلم عن النضافة فيها كنت بتتكلم عن المستحيل لانه ورش كتير جدا ورش صغيرة كل ورشة قد كده بتطلع مخلفات رهيبة فالحديث عن النضافة كان حديث صعب جدا احنا بدانا نحط مخطط طب المخلفات او مشكلة النضافة جاية منين لقينا في مدينة دمياط فيه ترعة اللي هي الترعة الشرقاوية 9 كيلو داخل المدينة نتيجة الامتداد اللي حصل في المدينة ولقينا ال9 كيلو دول طول الترعة الحقيقة بيئة جيدة جدا للقوارض كنا في سنوات ماضية كان ممن الناس تمشي تتكعبل في القوارض في الشارع يبقى انا لما اجي اتكلم ان انا هقضي على القوارض دا مستحيل طالما الترعة الشرقاوية دي موجودة لقينا انه على سبيل المثال الاسواق عندنا سوق سمك جوه المدينة وسوق جملة وبالتالي مخلفات هائلة لازم تخرج عملنا سوق خارج المدينة بنعمل خلخلة ونقدر نسيطر على المدينة وبرضه بالتراضي مع التجار سوق الجملة بيتقفل بيتنقل كله خارج المدينة عملنا سوق جيد جدا بالتوافق برضه معاهم بيخرجوا وبيروحوا للسوق الجديد بنقول معلش الاراضي الفضاء احيانا يطلق عليها الخرابات معلش في التعبير كانت برضه مليانة مخلفات .. لا يمكن اتكلم عن النضافة في دمياط وانا عندي الترعة الشرقاوية بتترمي فيها زبالة دمياط كلها والقوارض في كل حتة وانا عندي الاسواق مليانة، ننضف برضه السمك بيخر مية والروايح مفيش فايدة جوه المدينة وانا عندي هذه المناطق المكدسة لابد من 9 كيلو الترعة الشرقاوية تتغطى الحمد لله في العيد القومي اللي فات كانت انتهى تماما تغطية الترعة الشرقاوية الاسواق الحمد لله اتنقلت الاسواق في خارج المدينة بس طبعا بشكل برضه مرتبط بالمدينة واسواق كنت اتمنى ان حضرتك تزورها سوق جميل جدا هنا احنا بنتعامل مش مع حملات نضافة ولا اسبوع نضافة ولا يوم نضافة انا بقول لحضرتك ان هناك مخطط علمي ان اوصل للهدف انه ما ينفعش اني اتكلم عن النضافة والترعة الشرقاوية مفتوحة ما ينفعش وانا عندي اسواق ما ينفعش وانا عندي اراضي فضاء كل دا خلال 4 سنوات لان تكلفة تغطية الترعة دي احنا دخلنا في حوالي 60 مليون جنيه محمد صلاح: طب معندكش مشكلة نفقات و تدبير موارد، كل المحافظين بيتكلموا عن الموارد محدودة ؟ د/فتحي البرادعي:يعني انا هقول لحضرتك حاجة لان دا موضوع احنا بنزعم ان فيه تجربة في دمياط الحمد لله نتيجتها النهاردة بتؤتي بعض الثمار الطيبة ..دمياط اللي تحت ايد المحافظ أي محافظ مش محافظ دمياط صندوق الخدمة هو دا اللي بتجيله موارد خارج ميزانية الدولة للاسف الشديد ان صندوق الخدمة في محافظة دمياط من اقل الصناديق على مستوى الجمهورية كل اللي بيجيلنا في السنة حوالي 2 مليون جنيه و2 مليون جنيه على مستوى محافظة ما يعملوش أي حاجة ميزانية الدولة اللي بتجيلنا طبعا الدولة محملة باعباء هائلة نفقات امن ودفاع وتعليم ومرافق يعني كان الله في عون ميزانية الدولة احنا كل الميزانية اللي بتجينا في السنة حوالي 23 مليون جنيه رقم برضه ضعيف جدا احنا من اول يوم قلنا انه مفيش حل غير انت احنا نوجد مصدر عشان نقدر نصرف منه بعيدا عن ميزانية الدولة وبعدين حضرتك عارف ان هناك تجارب ناجحة في العملية اللي هي اعتمدت مثلا على المستثمرين اللي يتبرعوا او البديل الاخر ان انا افرض رسوم يعني الصندوق دا عشان يزيد معندوش غير بابين اما مساهمات وتبرعات او رسوم محلية الحمد لله اننا لم نتلق وانا عارف ان كل الناس سامعاني لم نتلق مساهمة او تبرع جنيه واحد في كل مشروعات محافظة دمياط ولم يرتفع رسم محلي ولم يستحدث رسم محلي على الاطلاق محمد صلاح: امال جبت موارد منين؟ د/فتحي البرادعي:ماهو دا السؤال الطبيعي وعايز اقول لحضرتك وبعيدا عن ميزانية الدولة المصدر التالت يعني التلاتة دول مش موجودين احنا بدانا نعمل حصر لكل المشروعات بتاعة الوحدات المحلية يعني اذا كان فيه موقع مخازن ومخلفات موجودة على البحر خدنا هذا الموقع وعملنا عليه مشروع سميناه راس البر زمان وهذا المشروع بعضه ممكن البيع او حق الانتفاع وسوقناه ، الحصيلة بتاعة هذه المشروعات دخلناها للصندوق والصندوق بدا يصرف بس فيه نقطة برضه مهمة عشان حضرتك لو فتحت مع الجمهور ممكن تسمع البعض يقولك المحافظ مركز في راس البر شوية ودا نقد انا سمعته محمد صلاح: اه فيه ناس بتقول عليك محافظ راس البر. د/فتحي البرادعي:ماهو انا هقول لحضرتك دا كلام مهم جدا احنا ولما بقول احنا يبقى بتكلم عن المجتمع توافقنا كمجتمع اننا جميعها نمتلك مشروع اقتصادي مهم جدا اسمه راس البر وكلنا شركاء فيه يعني المشروع الاقتصادي بتاع راس البر دا كل عزبة وكل نجع وكل مدينة في محافظة دمياط لها حق في هذا المشروع فبدانا المشروعات اللي بقول لحضرتك ليها بدانا نعملها عشان تجيب عائد 85% منها في راس البر لانه لما بصرف في راس البر جنيه ممكن يجيبلي 10 لكن لو صرفته في قرية الجنيه هيعملي خدمة بجنيه وخلاص فبدانا نعمل مشروعات في راس البر والعائد بتاعها يعود للمحافظة ، المشروع القادم القرى والعزب والنجوع بتاخد نصيبها من مشروع راس البر يبقى هنا راس البر لوحدها تستحق الاهتمام لانه طبعا حضرتك ملتقى البحر والنهر وعارف راس البر شئ رائع لكن بالاضافة لكده المشروع الاقتصادي اللي بيجيبلي ايرادات بقدر انفق على العزب والنجوع والقرى من حصيلتها والا هجيب منين ما انا عايز اللي بيقول كده لازم يقولي اجيب فلوس منين فاحنا الحمد لله نجحنا في ان احنا نحقق موارد جديدة من المشروعات الذاتية من الوحدات المحلية من غير تبرعات ولا رسوم محلية لانه طبعا احنا كل مانيجي نحلف اليمين في اجتماع مع سيادة الريس اول حاجة فيه ماتقتربش من المواطن كفى المواطن اعباء ماتحملوش رسوم ماتحملوش ضرايب فطبعا ما بنقدرش نيجي ناحية الرسوم المحلية دي ما بنفرضهاش وتبرعات مفيش مش مفيش عشان هما مش عايزين عشان ترجع تقولي الدمايطة ما بيدفعوش هما بيدفعوا في اعملا الخير المدارس والتبرعات والمستشفيات اعمال الخير لكن مايجيش يشارك في تنسيق حضاري وبدانا نعمل مشروعات التنسيق الحضاري من حصيلة المشروعات بتاعتنا والحمد لله زي ماحضرتك شايف يعني حضرتك كنت بتتكلم عن الكورنيش ، الكورنيش دا كان بيحصل له انزلاق للتربة وكان فيه عمارات وقعت عمارة العرايس اللي وقعت وللاسف مات فيها ناس دا كان مشروع عاجل ومهمة جدا اتعمل من مواردنا كل مشروعات التنسيق اللي حضرتك شفتها اتعملت كلها من مواردنا احنا اللي بقول لحضرتك جبناها من خلال مشروعات تجيب موارد وهذه الموارد يعاد صرفها محمد صلاح: في مشكلة في المحافظات التانية انها تجيب موارد يعني . د/فتحي البرادعي:لا.. انا بتكلم عن دمياط بس محمد صلاح: طب خليك معانا لسه الكلام مخلصش فاصل محمد صلاح: سيادة المحافظ عندنا مشكلة تعلق بالصيد في دمياط، دمياط تقريبا تملك 50 % من اسطول الصيد في مصر ودمياط عنوان رئيسي خلال الكام شهر اللي فاتوا لانه الصيادين بتوعنا بيطلعوا يصطادوا في المياه الاقليمية لدول تانية بيتمسكوا وبتحصل مشاكل قضايا بتتخطى حتى كونها مشكلة اسرية او تتعلق باهالينا في احدىة القرى او على الساحل في مكان ما الى ربما مشكلة تتدخل فيها وزارة الخارجية والدبلوماسية وهكذا ايه مشكلة الصيد في دمياط مفيش سمك كفاية ولا التلوث الكبير اللي حاصل ومسالة الصرف وهكذا هو اللي مخلي الناس تروح تصطاد في اخر الدنيا د/فتحي البرادعي:والله طبعا هو فيه دراسات كتيرة انا مش متخصص فيها لكن بيقال ان السواحل بتاعتنا عموما مش دمياط وبس بصفة عامة بيقال ان الشواطئ المصرية الثروة السمكية فيها قليلة الى حد كبير وضعيفة بالاضافة الى ان العملية مش منظمة يعني انا ليا راي في الجزئية بتاعة الزريعة اللي بنقول عليها فعلا فيه صيد جائر للزريعة مفيش كلام واحنا بنشوف وبتطارد القوارب اللي بتصطاد الزريعة والحاجات دي يعني مؤكد ان هناك اسباب محتاجة لعمليات تنظيمية في هذا المجال واحنا خاليا بعمل مشروع ميناء صيد في عزبة الرج ميناء الصيد دا انا شخصيا اعتقد انه واحد من اهم المشروعات الاقتصادية اللي بتتعمل في الدلتا او في وجه بحري في الفترة القادمة لانه محور تنمية كامل اما جينا نتكلم في مشروع ميناء الصيد تصور البعض ان احنا بنعمل زي باركينج للمراكب او مكان المراكب بتركن فيه انما اطلاقا دا مشروع مهم جدا لانه له جوانب تجارية وزراعية وسياحية لانه بيجمع الارصفة هو مش رصيف بتركن عليه المراكب لكن فيه ارصفة للزراعات القائمة على وفيه ارصفة صناعات معدات الصيد حضرتك عارف ان عندنا في عزبة البرج وانا اتمنى ان حضرتك تغطي هذا المجال اللي هو صناعة السفن الصغيرة اللي هخي المراكب واليخوت واللنشات الصغيرة ومراكب الصيد دي صناعة متقدمة جدا وفيها خبرة هائلة في دمياط انما للاسف قاعدين في مواقع يقولك دي املاك دولة والراي العام عايز الموقع مطاردين من كل حتة برضه الصناعة دي هيبقى لها موقع مهم في الميناء دا التجارة التلاجات كل ما يتعلق بالصيد هيكون له مكان وبجانب دا فيه برضه بعض القرى محمد صلاح: والتلوث اللي في البحيرة ؟ د/فتحي البرادعي:معلش انا استاذن حضرتك اني افصل بين الجزئين انا بتكلم عن البحر الميناء دا على البحر مش على البحيرة محمد صلاح: يعني دا هيعمل نهضة بالنسبة لمشروعات الصيد بشكل عام ومختلف المجالات لكن الناس بتعاني ايضا من التلوث داخل البحيرة مشكلة التلوث موجودة في اكترمن محافظة الحقيقة وانا شايف ان في تنازع بين بعض الاختصاصات وزارة الري مع الادارة المحلية في المحافظة مع الثروة السمكية والحكاية ضايعة وخالية الناس فعلا تروح تصطاد في اخر الدنيا وتتمسك . د/فتحي البرادعي:انا عايز اقول لحضرتك حاجة موضوع البحيرات دا موضوع كبير بس لازم برضه نقول انت التلوث خف انا مابقولش انه انتهى ايوة مازال فيه بعض الحاجات اللي بتصرف على البحيرات لكن فيه مشروعات خاصة بيها احنا عندنا مشروعات عشان تخلص الصرف اللي على البحيرات انما البحيرات تابعة للثروة السمكية يعني المحافظات مالهاش أي ... محمد صلاح: ماهي دي مشكلة . د/فتحي البرادعي:والله هو كان فيه حوار مع السيد وزير الزراعة وانا اعتقد ان هو متفهم هذه الجزئية وكان فيه اقتراح وجاري مناقشته يعني كان فيه اقتراح يعني مثلا بحيرة المنزلة بتطل عليها بورسعيد والدقهلية ودمياط انه يكون هناك مجلس ادارة لهذه البحيرة من المحافظين التلاتة اللي بيطلوا عليها ودا اعتقد ان دا هيحدث قريبا لانه هي فكرة انه المحافظ اقرب لهذا الموقع مش مسالة سلطات وتنازع سلطات هي فكرة فغالبا هو دا هيبقى التوجه لانه بالفعل البحيرات انا شخصيا غير راضي اطلاقا على اللي بيحصل فيها من اعمال مش عايزين ندخل في تفاصيلها لكن هي اعمال اغلبها خارجة عن القانون للاسف الشديد ويحب ان هي فعلا ينظر لها نظرة محمد صلاح: سيادة المحافظ لما تقول اسم دمياط..على طول الناس تفتكر وييجي في ذهنها على طول مسالة الاثاث صناعة الاثاث في دمياط ايه اخبار المنافسة مع الصيني هنتكلم في تفاصيل الصناعة يعني انما فيه منافسة كبيرة مع الاثاث الصيني والماليزي وهكذا انتوا بتواجهوا الكلام دا ازاي ؟ د/فتحي البرادعي:هو الكلام دا اثير كثيرا انا كنت اتمنى برضه اتمنى ان الكاميرا بتاعتك تعمل جولة في السوق الدمياطي محمد صلاح: خليك معانا بقى لسه الكلام مخلصش . فاصل محمد صلاح: سيادة المحافظ تمنى علينا ان احنا نكون قابلنا صناع الاثاث في دمياط ونشوف اراؤهم ايه في تطوير الصناعة وفي ظروفها ..قابلنا صناع الاثاث في دمياط سيادة المحافظ نشوف بيقولوا ايه ؟ د/فتحي البرادعي:طبعا محمد صلاح: نشوف الدمايطة بتوع الاثاث بيقولوا ايه فاصل مواطن1:مشاكل الاثاث في دمياط اولا فتح باب التصدير لان احنا عندنا انتاج كويس جدا ومن انضف انتاج يمكن في العالم ونفوق أي دولة في تصنيع الاثاث لكن عملية التصدير هي اللي واقفة البلد شوية لان عندنا انتاج كبير مواطن2:الصيني هو اللي عامل البلد دي كلها كده وانت عارف دمياط كلها صنايعية من الصنايعية الكويسة بس الشغل الصيني دا هو اللي طلع وبوظ البلد خالص فاصل محمد صلاح: انا مش هسال اسئلة الناس اتكلمت يعني فيه اضافة لموضوع الصيني والماليزي فيه كمان موضوع اخر مسالة التصدير ؟ د/فتحي البرادعي:انا عايز اقول لحضرتك حاجة الناس اللي بتتكلم دي ناس مكافحة وانا شخصيا باعتز بيهم اعتزاز كبير يعني هما دول اللي قام عليهم النسيج الصناعي الحقيقي الصنايعية المحترمين قوي دول بس انا عاوز اقول لحضرتك انه التصدير في دمياط تضاعف في ال5 سنين اللي فاتوا يمكن على الاقل 8 مرات من الرقم اللي كان بيتصدر النهاردة التصدير في دمياط وانا كنت احب ان الجانب الاخر اللي يتحدث في هذا الموضوع اخوانا اعضاء غرفة الاثاث والغرفة التجارية في دمياط لان عندهم دمياط اكثر اتساعا في الرؤية محمد صلاح: طب لو اتكلمنا بشكل عام ؟ د/فتحي البرادعي:بشكل عام انا شايف ان التصدير جيد جدا دلوقت في دمياط وفيه كفاح حقيقي لاصحاب الورش والمصانع في دمياط ان هما يفتحوا اسواق مفيش معرض من المعارض الكبيرة في العالم بتاع الاثاث اللي وفيه جناح دمياطي قوي جدا وبيجيلي ردود فعل رائعة يعني لو اعرف ان حضرتك هتفتح الكلام دا كنت هجيبلك شهادات وجوابات جميلة جدا جاية لي من الخارج بالنسبة للمنتج الدمياطي طبعا احنا عندنا امل ان الارقام تتضاعف لكن انا عايز اقل لحضرتك انه النهاردة فيه تصدير اثاث بشكل جيد جدا من دمياط وانا عايز اقول لحضرتك كمان انه اذا كان يفهم انه فيه نوع من الركود في السوق اطلاقا دا احنا مش مكفيين طلبات التصدير ولما حصلت الازمة العالمية في الفترة الاخيرة سبب ان دمياط ما اتاثرتش تاثير كبير طبعا فيه تاثير ولو بنسب لكن لانه حجم اللي كان مطلوب مكن دمياط كان اكبر من قدراتها فلما نزل الطلب نزل على قد قدرات دمياط يعني المطلوب دائمات من المنتج الدمياطي كان اكبر من قدرة الورش على ان هي تشتغل محمد صلاح: انا كنت هسال حضرتك على المعارض داخل مصر لانه مفيش معارض كتير للاساس الدمياطي الا بشكل شخصي او الموجود في ارض المعارض بشكل دائم وهكذا الصناع هناك والتجار مش محتاجين منافذ اصلا ؟ د/فتحي البرادعي:قطعا محتاجين منافذ واحنا بنساعدهم دلوقت مع السيد وزير الاسكان ادانا قطعة ارض كبيرة جدا في التجمع الخامس وارض في اكتوبر وارض في دمياطالجديدة دي كلها هتكون نواة لمعارض كبيرة لهم محمد صلاح: لكن انا كنت عايز برضه اكمل لحضرتك الجزء عن الصيني هما لما بيتكلم عن الصيني هو مش بيتكلم عن الاثاث الصيني في دمياط هو بيتكلم عن الاثاث الصيني بصفة عامة يعني السوق في دمياط المعارض مش هتلاقي غرفة نوم مثلا صيني مش حتلاقي سفرة صيني وزي حاجات كتير صيني بقت موجودة ومنتشرة في مصر بس الاثاث كان في بعض المناطق اما في الوجه البحري والقاهرة والصعيد وبعض الصناع المهرة جدا بالاضافة طبعا للشركات اللي طلعت معظمها شركات استثمارية انتجت انتاج محترم وظلت دمياط مركز أي اتنين هيتجوزوا يقولك اروح ابص في دمياط الاول من المؤكد ان هذا الغزو الصيني من الاثاث الصيني لمصر كلها بيهدد الصناعة اللي موجودة في دمياط د/فتحي البرادعي:انا بؤكد لحضرتك ان التهديد محدود لان برضه معلش اسمح لي ان انا اقول الجزئية دي انه الصيني فيه الرخيص وفيه الغالي حضرتك لما تقارن لازم تقارن حاجتين زي بعض يعني لما اجيبلك حاجة ضعيفة ما انا ممكن الاقي اوضة ب2000 جنيه بس يعني غرفة متواضعة انما الصيني فيه الرخيص وفيه الغعالي لو دخلت في الخشب اللي بنقول عليه هتلاقي الصيني اغلى من الدمياطي المقارنة هنا ظالمة لدمياط لان باجي اقولك والله الصيني لكن لو دخلت في نوعيتها ما انت هتجبها وهتبقى حاجة هترميها بعد سنتين بعد تلاتة بعد خمسة لكن الغرف الدمياطي اعتقد ان احنا في بيوتنا حاجات متوارثة من الاجداد يقولك دي من دمياط النوعيةبتاعة الصناعة دي انا شايف ان المقارنة هنا ظالمة يقولك الاثاث الصيني رخيص لا,اللي عايز كويس بيلاقية هو بيلاقي الصيني اغلى من الدمياطي لو في نفس مستوى الجودة وبالتالي طبعا فيه تهديد صيني لكل الصناعات زي ماحضرتك قلت على مستوى العالم يعني مش في مصر بس دا في امريكا بس عايزين نشوف في مصر ممكن نعمل ايه لكن انا عايز اطمن حضرتك انه حتى هذه اللحظة التهديد الحقيقي مش موجود فيه بوادر تهديد .... محمد صلاح: طب ما نشوفها من الاول كده نحل المشكلة قبل ما نستنى لما تكبر ؟ د/فتحي البرادعي:انا عايز اقول لحضرتك عل حاجة قيل احيانا او نشر في بعض الصحف لما تنزل دمياط هتلاقي الاثاث الصيني مالي المعارض ..لا ما تلاقيش ما حصلش .. يعني تلاقي حاجة صيني زجاج معدن كرسي مكتب اللي هو المعادن والجلد والبتاع دا لكن الغرف الصيني لا مش موجودة في دمياط مفيش الكلام دا الحقيقة بالعكس فيه انتاج محترم جدا في دمياط وبعدين فيه عملية تطويرانا هقول لحضرتك احنا عندنا جمعية تطوير الاثاث في دمياط و الجمعية قايمة بدور مهم جدا ليه النهاردة بنقول التصدير زاد وتضاعف والكلام دا كله لانه احنا زمان لما كنا نتكلم عن الاثاث الدمياطي حضرتك تقول يعني الذوق فاقع شوية والالوان مش قوي وضخم شوية انا عايز حضرتك تنزل السوق دلوقت ، بقى فيه تنوع لان المنتج كان بيحاول دايما يفرض ذوقه هو بيعمل الكرسي دا وشايفه جميل قوي وضخم زي ما حضرتك بتقول لكن هو دا اللي عنده النهاردة المعارض الدولية كل المنتجين بتوع دمياط بيروحوا المعارض وبيشوفوا الزبون عايز ايه حضرتك لو دخلت النهاردة مصنع من المصانع الكبيرة انت لوحدك من غير ما تسال تعرفان دا هيتصدر فرنسا ودا هيتصدر للولايات المتحدة ودا هيروح الدول العربية الخليجية من الطابع هو نجح انه يعرف الدول الخليجية عايزة ايه فيديها اللي هي عايزاه اوروبا عايزة ايه فيديها اللي هي عايزاه ويصدر لكل مكان في العالم النهاردة يعني الاثاث الدمياطي موجود في كل حتة لانه بدا يشوف الزبون عايز ايه وبدا يطور ذوقه والجمعية دي نفسها عملت تبادل اخرها كان مع مدرسة في باريس لان احنا عندنا مشكلة تشطيب الجمعية دي خدت مجموعة من بتوع الدهانات وودتهم مدرسة بالاتفاق مع اتحاد الصناعات والاتحاد الاوروبي تطوير الصناعة تحديث الصناعة الاوروبي وودوا مجموعة راحت فرنسا وشافوا التشطيب .. المجموعة اللي رجعت دي انا كنت احب الحقيقة تلتقي بيهم بداوا هما يقولوا لزمايلهم ويعرفوا زمايلهم حاجات بسيطة جدا لكن هو عامل محترف وعامل ماهر بتقدر ملاحظة صغيرة يلقطها بسرعة جدا وفعلا بدات تتطور عملية تشطبيب الدهانات وكل مجال من المجالات دي ، النهاردة الجمعية بتحاول تجيب خبراء او تاخد مجموعات تسفرهم الخارج يعني يه اهتمام انه يحدث تطوير حقيقي لهذه الصناعة وانا الحقيقة مازلت شايف ان لدينا مزايا نسبية مش موجودة في الصين كمان محمد صلاح: فكرتني سيادة المحافظ وانت بتتكلم على راس البر بالعشش بتاعة راس البر بتاعة زمان واللي سكن فيها عدد كبير من نجوم المجتمع في زمن سابق من مجالات مختلفة في السياسة في الثقافة ليه مابقاش كام وانت بتطور راس البر كام عشش من دول هي العشش عيب ولا يعني مابقتش تتوافق مع المجتمع ؟ د/فتحي البرادعي:لا لا العشش دي هي الزمن الجميل الرائع انا متفق تماما معاك وخلي بالك كلنا متفقين مع اللي حضرتك بتقوله بس الحقيقة الظروف الاقتصادية اتغيرت بمعنى ان النهاردة لو تشوف سعر الارض في راس البر علي جدا عشان يتعمل عشش اصبحت اقتصادياته مش مناسبة بس انا عايز اقول لحضرتك دا مش معناه ان احنا برضه بنلغي موضوع العشش المخطط الاستراتيجي بتع راس البر هتجد منطقة فيها نخيل جميل قوي اللي هو منطقة جزء من السنانية نخيل السنانية الشهير دا المنطقة دي احنا خاليا بنسمح او اتحط في التخطيط انها تحت النخيل في العشش زي العشش القديمة لان الاراضي دي احنا طبعا مش هنشيل النخيل لكن ممكن تحته تتعمل مشروعات العشش اللي حضرتك بتتكلم عليها لان عههنا الاقتصاديات مش زي الاراضي اللي على البحر لان هي اصلا ارضي زراعية لكن هنسمح ان تحتها نفس نمط العشش الجميل اللي هي بتاعة الزمن الجميل اللي حضرتك اتكلمت عليه وانا اعتقد ان راس البر ان شاء الله باذن الله قادرةعلى ان هي ترجع شوية شبه الزمن الجميل مش بقول الزمن الجميل بالعشش لكن الجديد بتاعها يبقى جميل برضه ان شاء الله محمد صلاح: بحسابات الناس وبتقديرات هندسية دقيقة لقينا بين المحافظ والمحافظة وشعب المحافظة عرفنا اللي حصل في دمياط قال محافظ دمياط الدكتور فتحي البرادعي كلامه معانا النهاردة كام كلام جميل كام معقول المهم انه كان كلام .. مسئول ,خلص الكلام سلام نلتقي في الحلقة القادمة .
