حلم مواطن

افرحوا ياولاد بلدنا
النهارده يبقى عيدنا
الشوارع رايقة خالص
والولاد رايحة المدارس
والحياه مية فل وأكتر
والجناين لونها أخضر
والحاجات ف السوق رخيصة
لحمة وكنافة وهريسة
والهدوم الله عليها
خد وماتقلبش فيها
حاجه أحسن من أوروبا
والحسود له ألف كبة
والسلوك الاجتماعى
حاجه بتوقف دماغى
الشباب ماشيين ف حالهم
والتحرش مش جماعى
الأدب ماتقلش قطة
والكلام من غير زغطة!
مستحيل تسمع شتيمة
أوتفوت جنبك بهيمة
والجيران دايما لجارها
مستحيل تسمع نميمة
النضافه ميه مية
والنظام إدمان وغية
ماتلاقيش أطفال شوارع
أو مريض للموت يصارع
أوفقير مش لاقى ياكل
والغفير بالبندقيه
كل حاجه شيك وراقية
يمكن أحسن من مراقية
والنعم بانت علينا
والفلوس ف إيدينا باقية
نفسى اقابل حد عاطل
أو أشوف واحد يماطل
الحياة وردية فعلا
لما يبقى الحق باطل