والمجرم مجهول

شفته واقف هناك وسط الثورة بيثور
ماسك ف ايده حجارة وحاله مش مسرور
طفل شايل هموم اكبر كتير من سنه
طفل إن شفته تخاف .. وإن شافك يقول مغرور
عدد سنينه قليلة لكن الواحدة ب ألف عام
شاف الدنيا الصعبة .. قبل ميعادها بأيام
بيخاف إن ضحك نحسده ..وان بكى نعطف عليه
بيحلم ب نفس عزيزة .. فى زمن موت الأحلام
قرب منه .. اتكلم معاه .. حاول تطبطب عليه
حتلاقيه بيقول كلام .. مش فاهم كل معانيه
بتحب تلعب ايه؟ ... سؤال مكسوف تسأله
وإن سألته يجاوبك ... هو معنى اللعب ايه؟!
طفل مابيلعبش ..... وإن لعب يخاف
طعم السعادة الحلو ... خلى قلبه خواف
محروم من كل فرحة .. متصاحب مع الحزن
مش عارف معنى الحب .. كل سنينه عِجاف
إن شفته فى اشارة .. تشاور له يبعد عنك
وإن شفته فى مظاهرة .. تخاف يقرب منك
وهو لسان حاله لسان حال مظلوم
بيقولك انا مش وحش .. انا إنسان زيك
اصعب حاجة تشوفها .. موجودة جوا عينيه
واصعب حاجة عليا .. اوصفلك انا شفت ايه
حصان بيجر كارو .. على ضهره نقش كرباج
لا عارف يقول اه ... ولا عارف يحوش ب إيديه
جريمة عايشة بينا .. والمجرم مجهول
اب وام ومجتمع .. وجهل جوا العقول
مش هو دا سؤالى ولا هى دى مشكلتى
سؤالى هو ببساطة .. هو انا عنه مسؤول ؟