أسفين يا رئيس

أسفين أسفين يا رئيس أسفين = بنقولها صريحة فى الميادين
أسفين إنى صبرنا عليك = سبناك تحكم فينا سنين
سبنا بلدنا الحلوة الغالية = تبقى ضحيه وفيها تايهين
سبنا الوطن الطاهر ينزف = غم وهم دموع وأنين
شفنا الذل بشكل مُجسم = سَلْب ونَهْب وجهل لعين
شفنا الحلم معانا متكتف = صوت الحق بيبقى سجين
أسفين ألف ومليون مرَّة = سبنا قمرنا بيبكى حزين
ناس مش لاقيه رغيف العيش = وناس فى الشهر تاخد ملايين
ناس فى العشه وجوا مدافن = وناس بتسقع فى الفدادين
كانوا عايزنها تبقى وراثة = خانوا العهد وألف يمين
كانوا يشوفوا الباطل يرقص = عزفوا اللحن لظلم مبين
إللى يوافق وإللى منافق = تحت القبه يقولوا أمين
خلوا الشعب عايش متخدر = باعوا دهبنا بسعر الطين
لحم حمير وقمح مسرطن = كرهوا بلال وجرس برنين
عبُّوا الوهم باعوه فى قزايز = قتلوا الفرحه فى قلب جنين
مهما شكينا ومهما بكينا = يقولوا البنك مافهش خزين
"أسفين"عايزه تعيد أيامك = ناقص يقولوا احنا الخاينين
جايين فوق الجرح يدوسوا = بالتأكيد فيه سر دفين
أسفين إحنا حقيقى بجد = سبنا بلدنا فى إيد تعابين