هو احنا ايه ؟؟ غاويين نعاند نفسنا غاويين ايدين الخسة تسرق حلمنا غاويين نضيع حقنا؟ فين حقنا ؟؟ ولا الكرامة غرَّبتنا و الحق مش بنلاقى فيه نفسنا؟؟ يادى الميزان اللى اتقلب ضاع الغضب و الحق مات و الحقيقة بتتولد الحقيقة ... هى اننا ملناش حقوق ماحنا بايدنا لبسنا الف طوق سيبنا تعابين الفساد تبنى الشقوق ينفثوا سم الوجع جوا العروق و احنا راضيين بالحقيقة من سمهم غاويين ندوق و دى الحقيقة مفصلة ازاى بقا عاوزين نفوق؟ م البداية ... انتصرنا و سبنا تانى ارضنا للى كسرنا و اتراجعنا و اتقتلنا و ضاع املنا و قلنا تانى مكملين لما نزلنا توهونا فى القضية وسط الورق .. خلونا ننسى التمثيلية حولوها مسرحية و ضحكونا على حالنا دم الشهيد كان البطل جوا الميدان و كان ياما كان كان فيه هنا فى نفس المكان انسان مهان حاول يدور ع الكرامه مات فى وشه الابتسامه و احنا جبنا الحق ليه و آدِى العلامه خمسين قضية للى قتلوا و اللى سرقوا و اللى حرقوا و البراءة للى خنقوا و احنا عايشين ع الطريق مفيش مهان اصبح برئ و الى كان ايده فى ايدنا باقى للتِعبان صديق قلنا نجرب جايز نقدر م الحقيقة يوم نقرب و اتفرد تانى الورق و الامل تانى اتسرق لما قعدوا ع الكراسى نسيوا طارنا و اما ثورنا ... قالوا ده كان اختيارنا و اتقتلنا و اتسرقنا و اتحرقنا و قلنا صح كان قرارنا و انقسمنا بقينا ناسيين الوطن و عدى تانى يا زمن و احنا بندفع التمن نعترض بيخونونا نتقتل فجأة يبيعونا يسرقوا النور من عيوننا و نقول كفاية .. يمنعونا و تانى رجعوا يتوهونا سابوا نارنا و اتلهوا ويا المعونه ضيعونا و اللعبة رجعت من جديد وسط الورق انزل يا شعب الوطن بيتحرق انتخاب انتخاب بينا نقضى على الكلاب يلا نمنع اللى ساب حق الشهيد ايدك فى ايدنا خلينا نرجع من جديد يا اما نرجع م العبيد و قمنا تانى قلنا طريقنا مش بعيد نزلنا نختار حلمنا عشان يجيلنا حقنا و قلنا زى كل مرة .. الف شكرا للشهيد اللى خلا بلاده حره و اتقلنا لما شوفنا ضاع املنا و ادينا لسه مكملين لعبة ورق و فى الاعادة بتتسرق و الدم لسه بيتحرق لا اللى قتل كان اتشنق ولا اللى موجود كان فرق ورق ورق و لسه بلدى بتتخنق و اللى نفسه طويل شوية فى بحرهم قدره الغرق يادى الميزان اللى اتسرق فى النهاية لجنتين و مجلسين محتارين و برده لسه مكملين ناس طيبين فى النهاية حتى لو بين السطور بس نفهم الحكاية
