ثورة الشك

(أكاد أشك فى نفسى لأنى أكاد أشك فيك وأنت منى) الله عليكى يا ست أم كلثوم.
زى ما كلنا عشنا ثورة يناير وأحداثها، إحنا برده دلوقتى بنعيش ثورة جديدة .. واسمها ثورة الشك ، كلنا بقينا نشك فى بعض واللى ادامى لو ما اتفقش معايا فى وجهة نظرى السياسية.. هاشك فيه وفى نواياه السودة، وقبلها هكون شكيت فى عقليته وإنه بيفهم أصلا.. وإما هاشتمه هو وأهله فى وشه، أو هاشتمه هو وأهله برده .. لكن فى سرى.
يبقى خلاص مش ناقص غير إننا نشك فى نفسنا، بعد ما شبعنا شك فى بعض زى ما قالت أم كلثوم.
المسئول عن انتشار الشك بينا هما القيادات السياسية.. قيادات النظام ومؤيديه.. وقيادات المعارضة ومؤيديها، وطبعا الإعلاميين مسئولين هما كمان.
قيادات المعارضة والإعلاميون.. معندهمش أى ثقة فى الحكومة وأى خطوة تاخدها الحكومة ولو ممتازة.. لازم يشكو فيها ويطلعولك فيها القطط الفطسانة ومية نية سودة زرقة مهببة ورا الخطوة دى، ده حتى القضاء.. اللى دافع عنه بعضهم بسبب الإعلان الدستوى إياه.. كلهم شككوا فى نزاهته بعد الاستفتاء، واتهموه بالتزوير وأنه حصل مخالفات مقصودة من ناحية القضاء.
وقيادات النظام.. بيشككوا فى كل خطوات المعارضة، وإنهم عايزين يهدموا البلد، ووراهم خطط لإسقاط النظام والوصول للحكم.
كلامى للسادة السياسيين من الطرفين ..
قبل ما تتهموا أى حد بأى حاجة لازم يكون فيه دليل واضح وحاسم لكلامكو.
ماتقولش على حد انه عميل لأمريكا وخاين إلا ما يكون عندك دليل .
ماتقولش إن المعارضين ليك بيجهزولك مؤامرة ومجرمين إلا ما يكون عندك دليل وتطلعه للناس.
ماتقولش إن اللى فى التحرير أو الاتحادية مسلحين أو بتوع خمرة (وتفاح) إلا ما يكون عندك دليل .
ماتقولش على المختلفين معاك إنهم مسلحين وعندهم ميلشيات إلا ما يكون عندك دليل .
ماتقولش إنهم بيخدوا تمويل من بره إلا ما يكون عندك دليل .
ماتقولش إن غرضهم مصلحتهم مش مصلحة البلد إلا ما يكون عندك دليل.
ماتقولش إنهم بيخدوا تعليمات من أمريكا وشوية من قطر إلا ما يكون عندك دليل .
أتمنى من كل السياسيين والإعلاميين يفرقوا بين التحليل والمعلومة.. ويوضحوا كلامهم للناس، وأتمنى أكتر تنتهى موجة الشك اللى بينا دى أو تقل شوية.. عشان مانغرقش فيها وتغرق معانا البلد.