قولوا لمعالى الرئيس

ضربونى رجالتك
وأنا إليك بشتكى من ألمى لعظمتك
أخوانك اللى أيديهم بهدلت وشى
هيبهدلوا سمعتك ويقلّوا بمكانتك
.............................
قولوا لمعالى الرئيس ضربونى إخوانك
علشان بانادى وأقول رافض لإعلانك
ورافض إن القضاء يكون شخشيخة فى أيديكم
ورافض إنك تكون فرعون بأعوانك
..............................
قولوا لمعالى الرئيس أبعد عن الإخوان
خليك رئيس للمسيحى واليهودى كمان
ورئيس لكل البلد الشافعى والمالكى
قولوا لمعالى الرئيس خليك رئيس إنسان
...........................
قولوا لمعالى الرئيس مصر مهيش لعبة
ولا إمارة ولا قرية ولا عزبة
مصر كبيرة قوى أكبر من الإخوان
ومستحيل حضرتك هتحطها فى علبة
...................
قولوا لمعالى الرئيس ابعد عن المرشد
عندك بيوت ربنا روح صلى فيها وأسجد
خلى مقامك كبير عن لعبة الأحزاب
أما الجماعة فحاول عنها تبعد
....................
قولوا لمعالى الرئيس الشعب فايض بيه
أصل الرئيس اللى قبلك شال وحط عليه
فيه فرصة لسة يا ريس تسحب الإعلان
وتبوس دماغ الوطن وياريت تبوس رجليه
.......................
قولوا لمعالى الرئيس حمل الرياسة صعب
لكن يهون لو تكون رئيس لكل الشعب
وللمسيحى تكون أقرب من المسلم
ولليهودى عشان الدين مهواش ذنب