: آمين آمين

عجبى على ناس كانوا من قبل الصفر بادئين
كانوا بيحلموا يشوفوا القرش كانوا مطحونين
كان العيد يدخل عليهم من اللحمة محرومين
كان الشتا بيفكرهم دايما من اللبس عريانيين
كان الصيف يقول لهم اشربوا الهم ياعطشانين
اطماعهم خدتهم لسكة اسيادهم الملاعين
قالوا نمشى فى ركابهم مشيوا مع الشياطين
سرقوا نهبوا ظلموا شعب مصر ياولداه مسكين
سكنوا القصور والفلل بعد ماكانوا مش لا قيين
كلوا بملاعق دهب وحاجات احنا مش عارفين
الاكل استوردوه مايصحش ياكلوا زى المساكين
وطازه يوم بيوم يوصل من بره مايحتاج تسخين
والبواقى فى الزبالة نعيش واكلهم مش عارفين
ياما قضوا الليل فى سهر وعربدة طبعا سكرانين
عن ثرائهم يقولوا ميراث واهاليهم كانوا شحاتين
ودارت الايام عليهم بقوا مع اسيادهم مساجين
وانكشف المستور لبسوا لباس الذل مكسورين
لو سألت كم تساوى ليلة فى السجن يامسكين
يرد خدوا كل اموالى اخرج اشم حرية المسروقين
خسئت يالص خليك مع حبايبك احفاد الشياطين
خلف الاسوار بتتقابلوا انتم سوا نقابة الغدارين
عجبى على ناس مايملاش عنيهم الا تراب وطين
المريض يهاجمه المرض جيوبه خاويه يصاحب الانين
لو المودام بتاعة حضرته عايزه تركب رموش للعين
طيارة مخصوص من دمنا وطقم ضيافة على برلين
ترجع محملة من كل اشى لا جمارك ولا زفت الطين
واذا حضرته كح مره يبقى لازم النوم فى قصر التين
التانين غضب ربنا عليهم باللى وصلوا له مش راضين
عدم الرضا خلاهم فى الشباب عواجيز بالهم كسلانين
كفاية عليهم فضايح مذلة وخوف فى السجن مرعوبين
الحر بيموت فى حياته مره وهمه كل يوم ميتين ميتين
أنا اعصر على دماغى لمونه يروح الصداع بلاها برلين
وآكل من بينتا مش مهم اورديحى بالرضا هيبقى سمين
والبس جلابية وطاقية اخويا شلبى من صنع عمى امين
واحط ايدى تحت دماغى بعد العشا وانام نوم السلاطين
اصحى مع الفجر ساعة تقسيم الارزاق من رب العالمين
امامنا يدعى يحفظ لنا مصر والكل وراه بحب يقول آمين
عجبى على ناس نسيوا ربنا وكانوا لمتعة زايلة فاكرين
نسيوا ان دعوة المظلوم لا ترد فما بالك بدعوة الملايين
يارب توب عليهم رجع حقوقنا سامحهم اذا اصبحوا تائبين
ومصر المذكورة فى القرآن خليها دايما فى اعلى عليين
اللى يفكر تانى بظلمها انت قادر يكون اسفل السافلين
ياريت تقولوا معايا فى ركوعكم وسجودكم آمين آمين
***