أول يوم فى الشغل

بعد اجتيازنا المقابلات الشخصية للالتحاق بعمل والضغط العصبى الذى نتعرض له وقتها جميعنا يسأل يا ترى هيقبلونى ولا لا؟
ضغط عصبى آخر نتعرض له.. وهو أول يوم فى الشغل..
هذا اليوم من أصعب ما يكون على البنى آدم لأنه بيكون عامل زى اللى تائه فى الصحراء مش عارف يعمل إيه؟؟
خلينا ندخل فى الموضوع ونشوف هنعمل إيه؟
1- اشتغل على نفسك:
فى البداية عايزين نشتغل على نفسنا شوية... يعنى مثلا ابتدى نظم ساعات نومك علشان تعرف تصحى بدرى مش تروح الشغل عينيك مقفلة ومش نايم كويس... دى حاجة مهمة جدا.
كمان ابتدى راجع على المهارات التى تمتلكها مثل الكمبيوتر واللغات واقرأ عن الشركة، وعن الوظيفة اللى أنت هتشتغلها ومتطلبات الوظيفة دى... إلخ.
2- ارتدى زى النجاح:
من المهم أن نعرف أن الانطباع الأول يدوم... لابد أن لا تقلل من قدر الملابس إلى سوف ترتديها فى أول يوم عمل أنت مش خارج مع أصحابك رايحين تتمشوا فى المول ولا رايحين كافيه.... لازم تاخد بالك من لبسك ومن شكلك وكمان النظافه الشخصية.. هناك أشياء ممكن تغفلها ولكنها فعلا مؤثرة ومنها رائحة النفس والعرق... الحاجتين دول لازم تاخد بالك منهم جدا.
كمان لازم يكون اختيارك للملابس بسيط والألوان هادئة خصوصا البنات... والأهم من كل هذا أنها تكون مريحة لأنك ستقضى فى مقر عملك أطول وقت فى حياتك... فاختر الملابس المريحة القطنية التى لا تعيق الحركة ولا تحتاج مجهودا فى كيها فعامل الوقت مهم جدا.
3- احترم مواعيدك:
الالتزام بالوقت موضوع مهم جدا... لأن الالتزام بالمواعيد واحترامهما من أهم مميزات الموظف الناجح، خاصة أننا قد أشرنا من قبل إلى أن الانطباع الأول يدوم... فأرجوك متخليش الناس تقول عنك أنك مش ملتزم.... لابد من الذهاب فى الميعاد المحدد ويفضل أن يكون قبل الموعد بربع ساعة يبقى كتر خيرك بجد.
4- قابل مديرك:
مش لازم أول ما تدخل من باب الشركة تقابل المدير على طول لكن خلال اليوم حاول إنك تقابل مديرك المباشر، وتفهم منه أكثر المطلوب منك وطبيعة العمل، ومهم جدا أنك تعرف ما الذى يتوقعه مديرك منك.. حتى تكون عند حسن ظنه.
5- قابل الزملاء:
ابدأ فى التعرف على زملاء العمل بهدوء، وشياكة.
6- اسئل ومتتكسفش:
اللى يسأل يستفيد سيدى الفاضل... ومن أجل هذا تحتاج أن تسأل كى تفهم طبيعة كل شىء فى العمل، وحتى لا تتعرض لمواقف غير مفهومة من البداية وكمان علشان متعملش حاجة غلط؟
ومن أهم الأسئلة التى ستقوم بطرحها ولمن توجهها.
سؤال إدارة الموارد البشرية عن التالى:
نظام التأمينات الاجتماعية والصحية.
نظام الإجازات سواء كانت إجازات رسمية أو إجازات خاصة بك.
مواعيد دفع المرتب.
السؤال عن اللائحة الداخلية للمؤسسة.
السؤال عن وجود ميثاق أخلاقى للمؤسسة.
لو كنت بتشتغل فى مصنع اسأل عن دليل الاستخدام الخاص بالكوارث والأزمات لا قدر الله.
الهيكل الوظيفى للشركة.
أما بالنسبة للزملاء فيتم توجيه الأسئلة كالتالى:
مواعيد ال Break.
السؤال عن أماكن الملفات والأدوات المكتبية.
السؤال عن الجو العام للشركة هادى مشحون.. إلخ
أقرب المطاعم وأماكن الشراء.
إذا ما كان هناك منطقة محددة للأكل أو التدخين... إلخ.
بالنسبة لمديرك أنت محتاج تسأله التالى:
ما المهام المطلوبة منك.
هو متوقع منك إيه؟
لو محتاج مساعدة من الذى سيقوم بتقديمها، والطريقة التى يمكن بها رفع تقاريرك وما هو نظام التقارير المتبع.
أرقام التليفونات والإيميلات المهمة.
7 – اكتب ملاحظاتك:
موضوع مهم جدا إنك تقوم بكتابة ملاحظاتك طوال اليوم، خاصة أن هذا اليوم يكون فيه شلال معلومات، عقلك مهما كانت قدراته لا يستطيع تجميع أو تذكر كل ما حدث... ومن أجل هذا أنصحك بتدوين كل ذلك فى مفكرة صغيرة شيك وتظل معك طوال يوم العمل، وتدون فيها كل المعلومات التى عرفتها من غير تفكير لأنك حتما ستحتاج هذه المعلومات.
8 – اسمع ولاحظ:
فى هذا اليوم لابد أن تلتزم الصمت الرهيب... استمع كثيرا لاحظ أكثر، ولا تدعى المعرفة بكل شىء... "الفتى مش هيفيدك بحاجة".. وعلى فكرة السمع والملاحظة المفروض يستمر معك لفترة حتى تستطيع فهم كل ما يدور حولك وبعد ذلك يبدأ تصرفك.
أول يوم فى العمل بيجى مرة واحدة بس... فأرجوك استغل الفرصة ليكون يوما لا ينسى، ستكون موظفا له وزن وقيمة فى الشركة إذا قمت باستغلال الوقت صح وبذلت المجهود الكافى... جهز نفسك وخلى أول يوم فى عملك أول خطوة فى طريق نجاحك.