مجوعنا.. مضيعنا

مجوعنا..مضيعنا
ولو قلنا.. ما يسمعنا
يسيبنا نلك ونفضفض
كلامنا عنده
ما له معنى !
وقلنا له فى يوم
احلم
بأرض وفيها
ألف شهيد
بيدوا دمهم
بلسم
يرطب حزن
طفل وليد
بيبكى كتير
ويتألم
ونفسه يقول
ويتكلم
شهيدنا مات
من الحسرة
ومستقبل
مهوش ف الإيد!
يا ناس اصحوا هنا
وفوقوا
شهيدنا مات وكان
طوقه
بيخنق شعب ومبلم
ساكت ع الحق
ما اتكلم
ولما شهيدنا قال يوم
لأ
قالوا له السيف
هيتكلم!
يا ناس اصحوا بقه
كفاية
وطننا حكايته دى
حكاية
مطمع فينا كل
غريب
سكوتنا ف حده
ده جنايه !
وم الأول
وم الآخر
نقول للنوم بقى
اتأخر
هنبنى بإيدنا
مستقبل
يشاوروا عليه
ونتفاخر !
يا أرضى وأرض
أجدادى
هصونك غالية
لولادى
ومش هسمح
لأى عميل
يبيعك يوم
لحسادى
هكون صابر
وصبرى جميل
وهحفظلك
تراب النيل
هصون بلدى
وهارعاها
ومش هنسالها
أى جميل
ولو طلبوا
ف يوم دمى
هاروح وأنا
راضى متهنى
ولو سألونى
ليه ملهوف
هقول الدم ده
... لأمى
ولما النصر يوم
ييجى
هصب ف كاسى
وأسقيكى
من الدم اللى كان
ظالم
وبحلف والله
لأرضيكى
يا نكسة ورايحة
مش جاية
ده كان ظالم
وله نهاية
ولما الناس
قالت له
اتهد
وقع بلسانه
ويايا
وقالى الظلم
آه له حد
لكن ظلمى
ما له نهاية
ده لو هدوا عليا
السد
هاقوم وارجع
لدنيايا
يا شعب وجهله
فاض واتمد
أنا معايا
كذا حماية !
فهمتوا اللعبة
ولا نقول
تانى ونشرح
وشرح يطول
يضيع م الزمان
أعمار
ويقتل فينا
فين ما نكون
هنصحى ولا
هنضيع
ف حق الشهدا
ونبيع
لأهلنا باقى
أملاكهم
ويبقى أمانهم
اتروع
رسالتى ليكوا
ف حكاية
روتها بدمعى
وأسايا
ولو طلبى
مهوش مفهوم
فرب الشهدا
ويايا