"أنا والقناع" أيمن بهجت قمر يكشف عن دور "شريهان" فى حياته.. ويؤكد: "والدى كان شغال مع زوج أمى".. وفاة والدى نقطة فاصلة فى حياتى وأتجنب المشاكل بالابتسامة.. وندمت على أغنية "أنا بعشق أمك" بس كنت محتاج فلوس

قال الكاتب والشاعر أيمن بهجت قمر، إن 1989 سنة فاصلة فى حياته، عندما توفى والده، موضحا أن المنزل كان مليئا بنجوم العالم العربى، ولكن بعد وفاة والده تغير.
وأوضح خلال لقائه ببرنامج "أنا والقناع"، عبر قناة الحياة، مع الإعلامية منى عبد الوهاب، أنه يحاول استخدام قناع "المبتسم"، مردفا: "بخبى مشاعرى وراء الوجه المبتسم، لما يكون عندى مشاكل أو ضغط كبير بحاول أتحاشاها بالابتسامة والشغل، حتى الشغل بيبقى فيه سعادة".
وتابع الكاتب والشاعر أيمن بهجت قمر: "دائما يقال للى بيعمل بهجة للناس، ما ينفعش تبقى بتمد الناس بالبهجة تبقى مضايق وكشري".
وأوضح أن والديه كانا منفصلين، وقبل وفاة والده كان يعيش معه، وبعد وفاة والده بدأ يعيش مع والدته وعمره 15 سنة، لافتا إلى أنه اضطر أن يعيش مع والدته عام فى مشاحنات مفتقدا والده ومجتمعه، وانتقل لمكان أخر، ثم عاد لمنزل والده يعيش بمفرده وعمره 16 سنة.
وأشاد الكاتب والشاعر أيمن بهجت قمر، بدور الفنانة شريهان فى الوقوف بجواره فى حياته، قائلا: "كانت بتاخدنى أنزل أجيب لبس وتبعتلى ناس يبيضولى الشقة، وحاجات رفاهيات غير الفلوس اللى كانت بتديهالى، ومرة اتخانقت مع مرات خالى، وبيت فى قسم الدقى، ولما كلمت صاحبى من الشباك قلت له كلم شريهان، كانت السند وهى من أجدع وأوفى الناس، بسميها شريهان جدا".
وأوضح، أن بعض الأقارب لم يكن يتصلوا به ولم يسألوا عنه، مردفا: "لو والدى كان عايش كان هيرد أمى تانى، بعد طلاق 13 سنة، ى ابن كان نفسه دا يحصل، عمرى ما شوفت أبويا وأمى فى كادر واحد، هى كانت متزوجة من المخرج المرحوم عادل صادق وأبويا وأمى مكانوش بيتقابلوا، وأبويا كان بيشتغل مع جوز أمى وهم كانوا أكبر من كده".
وتابع: "بعد ما والدى توفى فى 3 يناير 1989، أمى اتطلقت من أبو أخواتى فى شهر 5، من المرحوم عادل صادق، وأبويا لو موجود فى السنة دى كان هيرد أمي".
وقال الكاتب والشاعر أيمن بهجت قمر،"لما عملت سيدتى الجميلة حلمت بأبويا وبعد أسبوع حلمت بسمير خفاجة والاتنين كانوا مبسوطين جدا، بعد ما كنت هعيده تاني".
وأوضح، أن العام الماضى كان عام ضبابى له، وأخذ قرارات مهمة فى اهتمام بنفسه وصحته وعمله وعلاقاته، مؤكدا أنه أصبح يهتم بنفسه.
وتابع الكاتب والشاعر أيمن بهجت قمر، "أغنية أنا بعشق أمك فى فيلم المش مهندس حسن أغنية وحشة، وبندم عليها ومكنتش حابب أعملها، وكانت إفيه فى الفيلم، وكانوا عاوزينها فى أغنية، كان عليا التزامات وأقساط وكنت محتاج فلوس، واضطررت أعمل كده، ودى من المرات النادرة، ودى غلطتى ويمكن عشان عاوز الفلوس بسرعة محاولتش أقنعهم، ولازم أعترف عشان الشباب اللى طالع يعرف إنه ميعملش كده وميغلطش زيي".