لمن يهمه الأمر

يا كل ثائر ف الميدان يا كل صوت ف البرلمان
الدماء سالت غزيرة والدموع ملو المكان
ارحموا مصر الجريحة وابتروا الزمرة القبيحة
اللى بتخرب وتحرق واللى بتهدم وتسرق
واللى بتقتل واللى بتدبح واللى ضد الثورة تسبح
عاوزة مصر تكون خرابة للكلاب ويا الديابة
والوحوش الآدمية معدومين الإنسانية
دمنا ملطخ إيديهم والشرر جوه ف عينيهم
والأمان ضاع من بلدنا والسؤال ف عيون ولادنا
بابا إمتى تخلصونا دول خلاص حايموتونا
إنتوا ليه سايبينا ليهم صيدة سهلة بين إيديهم
والسؤال مالهوش جواب كل شىء أصبح سراب
والخطى عالأرض تاهت والكوارث لينا لاحت
وابتدت من بورسعيد والنيران فضلت تقيد
تاكل اليابس والأخضر فوق من السبعين شهيد
مين حاياخد دول بتارهم شوف شبابهم شوف صورهم
لسة فى عمر الزهور واريناهم ف القبور
نفسى أعرف مين قتلهم واللى خطط واللى جالهم
لو عدمته مش حايكفى ولغليلى مش حايشفى
القصاص منهم ضرورى قبل ما اخرج عن شعورى
الألم جوايا ساكن والدماغ واقف وراكن
احموا مصر وطهروها م اللى عاوزين يحرقوها
قبل ما يجينا الطوفان