أرملة الموسيقار الراحل عمار الشريعي: أشعر به بجواري رغم مرور 10 سنوات على وفاته

قالت الإعلامية ميرفت القفاص، أرملة الموسيقار الراحل عمار الشريعي، إنه على الرغم من مرور 10 سنوات على وفاة زوجها الراحل عمار الشريعي، إلا أن تشعر وكأنه مازال موجودا بجوارها، مشيرة إلى أنها بوفاته افتقدت الكثير من الأمور.
وأضافت خلال لقائه مع الإعلامية منى الشاذلي ببرنامج "معكم" الذي يذاع على قناة "cbc": "عمار سايب حتة منه، مراد ابننا، ساب لمراد كل خبراته قبل ما يتوفى، لأنه كان حاسس إنه مش هيكمل، وده طبعا بسبب ظروف مرضه لأنه كان مصاب بمرض القلب، وجبنا مراد ابننا وكان عمار وقتها عنده 50 سنة".
وقالت: "خلال 7 سنين قبل ما نجيب مراد للدنيا، عمار محسسنيش أن في مشكلة، مقاليش ولا مرة روحي للدكتور أكشفي شوفي المشكلة فين، مكنش بيقول، والفترة اللي كنا فيها قبل الزواج، كان في قصة حب كبيرة، وكان صحابه بيقولوا إنه مش هيتجوز، وكان إحساسي إنه كان جاد مكنش بيلعب".
وتابعت: "كان عندي برامج في البرنامج الأوروبي، وكان طبيعي إن يكون عندي ضيوف مثقفين وكتاب، وكانوا دايما بيقولولي عمار الشريعي بيعرف إنجليزي، فقررت إنه يجي عندي في البرنامج، وروحت سجلت مع عمار الشريعي، وبصراحة مكنش قصادي غيره يطلع معايا الحلقة دي، وكنت جايبة واحدة صحبتي معايا، فقال دي جايبة معاها محرم".
وتابعت: "قبل ما يطلع معايا في الحلقة دي ب 3 سنين، أنا شوفته أول مرة، لما كنت رايحة مع واحدة صحبتي تعمل شريط للأطفال، وبعد مرور السنين دي، ولما قابلنا بعض بعد كدة وعرفنا بعض، قالي مبتسلميش بحرارة ليه، وبعد ما سجلنا الحلقة، قربنا من بعض وقالي هعلمك الغنا، وأنا قولتله هقرالك بالإنجليزي، وكل ده محصلش، بدأت صداقة بينا، وأنا انجذبت له وقولت هكمل معاه".